اعلن معنا

فجأه طلعت ماوراي ودوني



---------- Forwarded message ----------
From: زوزه زوزو
Date: 2008/11/20
Subject: فجأه طلعت ماوراي ودوني :)(الصحاف احذف ايميلي )
To: als7af.group@gmail.com


 
 
الصحاف احذف ايميلي لو سمحت
 
<<سويت لك قلق ادري بتسطر
 
 

بسم الله الرحمن الرحيم

 

 

 

مــدخــل

 

ماتقبلت الفراق وما ليدي فيه حيله
آه لو ان الظروف المقبله تكشف قدرها
لو يعرف الشخص منّا وش مع الغيب بيجي له
كان جنبنا المشاكل من قبل يوقع ضررها
ما هقيت الليله اللي جابت الفرقا طويله
لين صارت ليلة امس بعيني اطول من شهرها
والعذاب اللي يذوب بعين من يفقد خليله
عندي اكبر من عذاب العين لو تفقد نظرها

 

 

مرحبا بالجميع

 

بما اني من جنبها بالمقدمات وماعندي ماعند جدتي قررت

 

اترك المقدمه عليكم <<بتتسطر هاها.لاامزح

 

 

احب اشكر بالبدايه الاخ الصحاف و كل اللي شاركوا باايميلات

 

على ايميلاتهم اللي تفتح النفس

 

مره استمعت فيها <<تعشق الايميلات

 

عن جد قروب اروع من الروعه حبيت حماسكم

 

ونشاطكم في القروب

 

 

 

انا شاركت بكذا قروب

 

ولا فكرت بيوم من الايام اني اشارك

 

فهذي اول مشاركه لي بقروب

 

قريت ايميلات كثيره وكانت يدي تحكني

 

على اني ارد على كل ايميل

 

وكنت في كل مره تحكني يدي فيها  اقولها لو سمحتي اهجدي

 

مو هذا وقته

 

لكن اليوم للاسف ماقدرت اهجدها لانها شاشت علي

 

فقلت الشكوى لله استسلم للامر والواقع

 

فيه عندي اعترضات على افكار الشباب ونظرتهم لنا

 

اتنرفز واولع لما اسمع كلام شاب عننا

 

انا مااتكلم عن السب ومالسب اللي قطعوا جلودنا فيه

 

لانه مهما الواحد سب فينا ومدح بالمغربيات والسوريات و..الخ

 

تلاقيه لما يفكر بالزواج مايرضى بغيرنا

 

وكثير شباب اعرفهم يحسون ان اللي يتزوج اجنبيه فيه عيب

 

ماعلي منهم انا وعمرهم لايقتنعون بحلانا

 

طالما انو حنا عارفين بعض ولنا عيون ونشوف

 

وعلى فكره اللي يسب فينا اعرف ان محارمه مو حلوين ههههههههه

 

وعشان كيذا المسيكين ماشاف خير فعمم على كل السعوديات

 

لا حظوا كل هذا ترى ماهمها

 

لا عن جد اللي يفقع مرارتي نظرتكم الوسخه للبنات

 

تعتقدون ان البنات تفكيرهم كله قلة ادب و انهم ميتين يبون يتزوجون

 

والله العلي العظيم اني قبل مااتزوج وللحين اذا ناظرت اي واحد ماافكر فيه

 

بتفكير خاطىء (ركزوا على خاطى ترى متعوب عليها)

 

 كل اللي يهمني بالواحد شكلو حلوو ولا مو حلوو

 

واذا حلوو بس ودي اناظره وانا مغطيه عيوني بعد

 

هذا قبل الزواج لكن الحين مايملي عيني غير بعلي حبيبي عسى ربي يخليه لي

 

ولا يحرمني منه

 

ع فكره السكسوكه تعجبنا لا نها تحلي الرجال

 

تلاقي الشين اذا حط سكسوكه طلع وسيم مو عشان قلة الادب

 

كل الشباب عمومآ ينظرون لنا نظره اننا مره قليلات ادب لييه ؟

 

طبعآ فاهمين قصدي بقليلة ادب

 

والله العلي العظيم انو اخر مانفكر بهالدنيا فيه تفكيركم الوسخ هذا

 

كل اللي يهمنا بالرجل وسامته انو فلان حلو وفلان وسيم

 

بس لااقل ولا اكثر

 

وانا مع الشاعر اللي يقول

 

الزين ماهو من شروط الرجوله

 

الزين يلقى عند لباسة الشال

 

ولا الرجال زينن ان زانت علومه

 

اذا كان فيه بنات تفكيرهم كيذا قلة ادب هذا مايعني انكم تنظرون لكل بنت بالنظره هذي

 

الموضوع الثاني

 

وراكم ع المسيكين اوباما

 

يخي خلوه يعيش حياتو قطعتوا ابو اللي جابو حش مايصير كذا

 

مسيكين ترى ماسوو ا لكم شي

 

ههههههههههههههههههههه

 

الموضوع الثالث

 

 يقرقع ببالي من زمان

 

ادري انه قديم شوي بس حرام من زمان وانا كابتته جواي

 

وبما اني اليوم طلعت كل ماوراي ودوني خلوني اكملها ولحد يقوول ياقدمك

 

كيفي شي يقرقع بقلبي وابي اقوله

 

الحين الصجه اللي سووها العالم بمهند وبلميس

 

يالله ماكان ربي خلق غيرهم

 

والشباب حالتهم صعبه عند لميس والبنات شوي ويصيحون اذا شافوا مهند

 

على ايش ياحظي تكفون لحد يقول انهم حلوين

 

لان اللي يقول انهم حلوين هذا يسمع بالحلى وماقد شافه

 

بالنسبه للميس اهون شوي من مهند لان فيه لقطه يجيبونها لها حلوه

 

واللقطه الثانيه كانها كوريه

 

لقطه يجيبونها مره بيضاء وبشرتها واو

 

واللقطه الثانيه مره سمراء والمسيكينه وجهها مليان حبوب

 

وين الحلى فيه انا اعرف ان الحلوه حلوه بكل اللقطات

 

مو لقطه الاضاءه لاعبه دورها فيها ولقطه لا

 

اما مهند على ايش ياحظي لاخشم لا شكل

 

انا مالومكم لو حبيتو شخصية مهند بالمسلسل

 

انو مره رومانسي وحنا ماعندنا الرومانسيه بتماسيحنا الا قليل 

 

اذاع كيذا انا ما الومكم

 

لكن شكله استغفر الله ياربي

 

انا اكثر مااكره نمونة مهند

 

لغير المتحدثين باللغه القصمنجيه نمونة يعني مثل

 

اشقر وابيض تقل بنيه انا مااحب كيذا

 

وش عندي بعد ممممممم

 

ايه لورانس فاقع مرارتي

 

والله اني رحمته ع تفكيره المنحط هذا

 

مسيكينه اميمته ياعسى ربي يصبرها

 

وزوجته هذا اذكان متزوج

 

استغفر الله ياربي

 

الله يعافيه ولا يبلانا

 

كل الي اقدر اقوله

 

عسى ربي يهديه ويصلحه

 

ياربي ارزقه الهديه قبل الموت

 

مره يحزن

 

 

وبهالنهايه حابه اطلب طلب اخير وياليت تلبونه لي

 

اطالب بعدم خدش الحياء لو سمحتوو

 

 

اكيد فيه معنا بالقروب مراهقين وصغار

 

فحرام تدشرونهم من الحين

 

يعني بالله وش تستفيد اذا نزلت صور قلة ادب

 

طيب لو طاح فيهم مراهق

 

وصار يدور الخرابيط هذي

 

مو حرام هو اللي يشوف وانت تاخذ الذنب

 

طيب فكر اذا مت انت بقبرك وسيئات قاعده تجيك

 

من ايش من ايميل قد ارسلته وتأثر فيه مراهق

 

راح تستمسر سلسلة الاثام تجيك لما يموت المراهق

 

ومابالك لو كان المراهق طيح غيره بهذي الخرابيط

 

قلي وش الفايده اللي استفدتها

 

طيب يمكن تأثر فيك هذي

 

هذا واحد مات وشاف صديقه بالحلم

 

ان فيه كلب يقعد فوق قبر صديقه ويتبول عليه وانتم بكرامه

 

شاف الحلم 3 مرات راح دق على شيخ حتى يفسره

 

قال له الشيخ فيه عمل يسويه صديقك قبل لايموت مو زين

 

وشو؟ فكر الولد وتذكر انو كان يرسل ايميلات قلة ادب

 

قال الشيخ هذي اثام اللي ارسل لهم صديقك الايميلات

 

لانهم للحين يشوفونها والاثامي على صديقك

 

تخيلتوا كيف

 

والله شي مو بسيط لاتستهينون فيه

 

اتمنى مااكون ثقلت عليكم

 

والعذر والسموحه

 

مــخــرج:

 

لو هموم المفارق مثل كل الهموم

ماتشوفون عيني بالدموع سبحت

ولو تحن المشاكل عقب حب الخشوم

كان حبيت خشم المشكله واستحت

 

وسلامتكم

 

تحيتي:

دلوعة ماما

 


سبحانك اللهم وبحمدك أشهد أن لاإله الا انت استغفر واتوب اليك اللهم لك الحمد ولك الشكر كما ينبغي لجلال وجهك وعظيم سلطانك سبحان الله وبحمده عدد خلقك ورضا نفسك وزنة عرشك ومداد لكلماتك 

0 التعليقات: