اعلن معنا

يوم استرجلت



---------- Forwarded message ----------
From:
ســــيــدة الـــمـــســاء <co0ol_3la_6to0ol@windowslive.com>
Date: 2009/4/23
Subject:
To: als7af.group@gmail.com


كنت في العمل مشغولة وحالتي  حالة  وقتها كنا الصبح وطرت في بالي فكرة يمكن

عشان مخي تعب من الشغل فبدأ يخنبق  عشان يهرب من الواقع شوي ويريح

الفكرة قررت اني انفذها في نفس اليوم

 

وانا طالعة من الدوام قبل اركب السيارة دقيت على امي وعلمتها اني بمر للمشغل وانا راجعة

 

قالت لي طيب بس لا تتأخرين

 

وسبحان ربي كل ماقالت لاتتأخرين ... غصبا عني اتأخر

 

المهم دخلت المشغل .. وطلبت اقص شعري مع انطوانيت

 

ولاني ماكنت حاجزه من اول قالوا لي عندا زبونات معلي تنتزري شوي

 

قلت عادي انتظر

 

وانا جالسه انتظر دخلوا 3 بنات وحجزوا الخدمات اللي يبغون وجوا جلسوا جمبي ينتظرون

 

سواليفهم كانت تدل على انهم بنات فله حتى اني كنت اضحك على سواليفهم

غصب عني  وشكلي صاير غبي

 

دق تلفون وحده منهم  وردت اهلين الله يحييك

بخير الحمد لله

طيبه الله يسلمك

بعدين قالت مين حضرتك

اللي فهمته ان المتصله مديرة مدرسة تئل عن معلمة رياض اطفال تاركة السيرة الذاتية حقتها عندهم

 

البنت قالت لا انا اختها ببلغها عشان تجي بكرا

 

ونفس البنت قالت طيب ماتبغون مدرسات تربية اسلامية

 

كن المديرة قالت لا

لان البنت قالت يااختي والله اني رهيبة وسنعة واعجبك

من جد وش تخسرين بكرا اجي معي اختي وسوي لي مقابلة وجربيني اسبوع لو ماصلحت مشوني

ضحكت ضحكة اعجاب

لان اسلوب البنت ماكان بثر كان مررره حلو وخلت المديرة توافق عليها مبدئيا

 

جاء دوري ورحت اقص شعري

 

قالت لي : شو يالبي شو بدك اصه

 

قلت بدي حته

 

قالت شو

قلت يعني حتيه حت مثل شعري الاولاد

 

طارت عيونها وتسمرت شوي لانها موب متعوده اني اطلب هيك طلب

 

بس قصته لاني كنت مررره واثقة وانا اطلب تقص شعري

 

خلصت وقالت نعيما وجابت لي مرايه صغيره عشان اشوف الشعر من ورى

 

قمت .... ناظرت يمين... يسار

 

تمام تسلم يدينك حلو

 

رجعت البيت ... وقفت عند باب المجلس واهلي مجتمعين فيه يتقهوون

 

قالت لي امي وش سويتي وهي تناظر في وجهي توي ابغى ارد الا اشوف  ابوي

 

وقتها طقني صفار ... وركبي قامت تنافض ... وبغى يصير فيني انهيار عصبي

 

واللي كملها علي ان الطرحه اللعينه انزلقت وبان شعري

امي واخواني طارت عيونهم

 

ابوي سكت على غضب ووجه حمر وعض على شفته السفلى وهو لو بلغ فيه الغضب مبلغه يسوي كذا

 

ماعرفت وش اقول بس جد جد بغى يغمى علي من منظر ابوي

 

 

ماعرفت وش اقول

 

 

 رحت داخل وتحممت

 

لبست بنطلون جينز لونه فاتح قصته واسعه

 

مع تي شيرت نص كم اصفر ... وتعليقة بخيط اسود

 

حطيت عطر بلو جينز من فرساتشي طبعا هو عطر رجالي

 

وانا تعمدت اسوي هالحركه

 

رحت للمجلس وانا ادعي الله اني مااتمردق

 

دخلت لقيت ابوي طالع برا البيت

 

قلت تمام امي واخواني ممتاز اجل اكمل الباقي

 

جلست .... وتمركيت

 

ناظرت اصغر اخواني وقلت صب لي قهوة ولا قلت لو سمحت ولا حبيبي

 

صب القهوة ... مد لي الفنجال وقال سم يانواف وهو وده يصكه براسي بس شكله تعوذ من  إبليس

 

شربته وهزيت الفنجال وقلت  شاي ياولد

 

جاب لي البياله ومدها قلت نزل البياله

 

وقتها ناظر اخوي الكبير وقال دخان يالحبيب .... ومد سيجاره

 

قلت والله مهي شينه جت في وقتها

 

  طبعا اهلي يحسبون انها حاله وتعدي لاني غالبا اخنبق

 

 

ولعتها .... واخذت نفس

 

طبعا هو صار كنه تنين لدرجة اني قلت الحين بموت لا محالة

 

بس عشان الشخصية لاتخرب تظاهرت بعدم الخوف وقلت

 

ليه تحسبني ماراح اشربها ...  قلبي طار من محله ولا ادري وين ولى

 

رجعت السجاره

 

وصرت اناظر التلفزيون

 

 

كنه ماصار شيء

 

وانا بس اقول يارب سلم سلم

 

الله لايعيدها من مهايط

 

امي طيرت عيونها ... واخواني شوي ويسون فتة كوارع فيني

 

قلت بس يابنت قومي بدل لا تتصطرين ومايسوى عليك  الهياط اللي انتي عايشة فيه

 

وابوك زعلان عليك يعني بتاكلين هواء من قلب

 

قلت يالله ياشباب تصبحون على خير وراي دوام

 

واطير على غرفتي عشان الحق اهرب قبل الجلد

 

بقفزة وحده وصلت لغرفتي وسكرت الباب

 

حتى ان اللي يشوفني يقول هذي ابد مركبة مكينة جربوع

 

ماعرفت انام وانا اقول وش المصيبة اللي سويتها شعري وسكتوا عنه بس الدخان بيوروني شغلي فيه

 

وذلك لان اهلي مره مررررررره ديمقراطيين يعني ابد ماراح يسوون لي مكياج في وحده من عيوني اول يوم لونه اخضر عقب يومين يقلب على موف

ولا مكياج بسام فتوح بيصير مرسوم رسم

مدري كيف نمت من جد  ... صحيت الصبح وامد راسي برا الغرفه اشوف مين فيه قدامي عشان اهرب قبل لا انقفط

 

ناظرت مافيه احد الحمد لله رحت الدوام

 

وصدري ضايق من عمايلي الله لايعيدها من مهايط

 

كل ماقربت الساعه على اربع كل مازاد المغص

 

رجعت للبيت وانا ادعي ربي واحلف اني مااعيدها

 

دخلت وناظرت مافيه احد واهمهم ابوي

 

غيرت ملابسي للبس يشبه حق امس

 

 

ماتبت لان ابن ادم اسيود راس >> المثل علمني اياه اخوي

 

بس عجبني

 

ونسيت اني مطلوبه امنيا

 

رحت لمجلس الرجال وطلبت شاي وقهوة

 

حطيت جوالي عندي ... وشغلت اللاب توب

انسدحت وحطيت رجلي على طاولة التلفزيون

 

دخلت امي وعطتني نظرة قلبت معها قد النملة

 

قالت لي ارقيلة ياولد

 

قلت لا مشكوره يالحبيبة

 

راحت وخلتني ... وتوقعت انها راحت تدور على لي تسوي لي فيه مساج لظهري

دخل اخوي  ومسك جوالي فتح الأستديو

 

وقال عسى ماشر وش توجسين انتي

حتى المقاطع الي عندك زاحفة

شكلنا عطيناك وجه

 

تعدلت وقلت ياخوك ان طاعك الزمان ولا طيعه

 

يعني صار فيني انفصام في الشخصية من عيشتي بين اولاد

 

مافيني من الانوثه ذره قلت يالله اغير الشكل عشان يزبط الموضوع

 

قال لا والله لا تطيعين الزمان خلك مثل ماانتي

 

واحمدي ربك مادرى ابوي عن السجاره

 

وقتها طارت حشره مدري من وين

 

نطيت وصرخت وطلع شكلي غبي

 

قال ترى الشباب مايخافون من الحشرات يأم الشباب

 

ماخفت اصلن بس حسبتها عقرب >>> الله من قل الصدق

 

قال صح صدق كلامك بس هذ لو صارت العقارب تطير

 

 

عيشتي بين اولاد مره خلتني كني ولد

 

يوم تخرجت من الثانوي دخلت كلية الطب وفي السنة الاولى كان عندنا مادة تسمى biology

 

وفيها جزء عملي جزء كبير منه تشريح في المعامل

 

طبعا كنت مبسوطه اول ماده تعكس التخصص

كانت كل طالبه معها ادوات التشريح حقتها ومصايبها الزرقاء

 

دخلت يوم الاثنين مبسوطه بالمعمل الا اناظر ما شفت اوادم شفت سطل مليان ارانب وفيران تجارب بيضاء

 

قلت وعععععععععععععع وش ذا ماني مشرحه شيء

 

البنات مجرمات قسم تناتفوا السطل كل وحده تسحب ارنب وتروح تشرح

 

من زين الحظ مابقى لي الا الفيران

قلت يابنتي لاتشرحين  والدكتورة مهي دارية

 

يازين وجهي تقول امي وش سويتوا اقول طلعنا دكاترة فيران

الا تقول الدكتورة انتي يابنتي وين فارتك ليش مابتشرحيها

 

انجبرت واخذت فاره وفتحت بطنها عقب ملبست ستين كمام وكبدي حايمه قسم اني جلست ادعي وتحلطم واتافف طول المعمل

 

بس هالترم لازم نجيب معدل لايقل عن 3:5 ولا بيحولونا غصب عننا

 

شوي الا تقول الدكتورة الي تشرح لي المخ بدون ماينخدش وبشكل محترف لها علامات اضافية

 

قمت ركضت على ادواتي وانا اطلع المخ بكل احترافية واحطه بالمحلول واوديه لها

 

قعدت فتره بعدها كارهه نفسي وكني اتوحم اكره ريحة المعمل وكل شوي بستفرغ

 

المهم عدينا وخلص الترم  وجاء يوم نروح فيه للمشرحه عشان نشوف بني ادمين من جد

 

اول مادخلت وشفت العالم يد هناك ورجل هنا وجثة يمين وراس يسار انخرشت وبالغلط صارت يدي على طاولة عليها يد وتخيليت انها تسكر على يدي

خفت وطلعت وحولت

قلت اروح اسنان ... بعدين حامت كبدي من اسنان العالم

 

اخر شيء تركت الكليات الصحية بكبرها قبل لا يجيني مصيبة وحولت لكلية ادبية بحتة

 

لو ماكنت بين اولا د ماكان قدرت اتحمل شكل الفيران على الارانب على الجثث

 

 

 

 

المهم في الموضوع

 

كل شيء في الحياة يطلع منه ذبذبات كهرومغناطيسية  تؤثر على حسب كميتها في الجسم اللي تصطدم فيه

 

جسم النساء والرجال على حد سواء ينبعث منهم موجات كهرومغناطيسية  الحجار الكريمة الالوان

كل شيء ممكن تتخيلونه له طاقه مؤثرة

 

فأي شاب يعيش مع مجموعة بنات بتصير مفردات حكية 90% منها تكشف في اي بيئه عاش

 

غير عن اسلوب الغنج الواضح والمنديل اللي يمسكه بيده

 

عشان كذا البدو اللي عايشين في البر ابدا مايخلون اولادهم الذكور مع امهاتهم في البيت اول مايصير سنيتن ياخذه معه لمجالس الرجال

 

ماكان علم عندهم قد ماكان فراسة وفطانة

 

 اذكر ولد اخوي عشانه دايم مع بنات وهو صغير كان يقول عمتي انا اسفه

 

قلت وش اسفه يامال الصلاح  انتا رجال عيب

 

والعكس لو شفنا بنت مسكينه مغلوبه على امرها ماعندها اخت في البيت

 

بتصير تصرفاتها غصب عنها زي الأولاد

 

وماذاك الا لان ذبذبات الذكور لخبطت جسمها

 

ولعبت في حسبتها

 

وهذا حقيقة علمية تمت دراستها وتجربتها واثبتت

 

بالعربي انا والبنات اللي زيي معذورين

 

 

وبنفس الوقت مساكين

 


0 التعليقات: