اعلن معنا

قــبــل و بــــعــــد !!



---------- Forwarded message ----------
From: CoNnEcT 
Date: 2010/3/26
Subject: قــبــل و بــــعــــد !!
To: als7af group <als7af.group@gmail.com>


اسعد الله اوقاتكم جميعاً

ان شاء الله الجميع بخير وبصحه و حالهم احسن حال

 اولاً / احب اشكر الاخت جيجي لامارا على التهنئه

:d:الا جيجي لامارا هذا مهب وكيل اعمال البقره نانسي بنت عجرهـ >>>

:d:عاد الله والاعمال  شخابيط و مفيش حاقه تقي كده

واشكرك خيتو على النصايح بجد نصايح خنفشاريه خصوصاً موضوع الساندويتشات و التهميز

:d:تخيلت نفسي رايح الدوام ومعي ساندويتشات ..جبن وزعتر كني ابو شكيب

:d:ولارجعت البيت تمسكني المدام تهميز كني شايب

ثانياً /اخر كتاباتك عن موضوع الزواج هيضت كيبوردي ودعته للكتابه

وهذا سبب .. وسبب ثاني راح اذكره في السطور القادمه

مع ان موضوع الزواج موضوع كبير وفيه جوانب كثيره تطرح للنقاش

لكن انا راح اتكلم عن مسأله معينه كثير على ما اعتقد يتفقون معي انها حاصله في اغلب الزواجات

اللي هي .. تغير تعامل و طباع الزوج مع اهله بعد الزواج

وخصوصاً امــه

وركزو على كلمة الزوج .. لان نادراً ما نسمع عن زوجه تغيرت على اهلها بعد ما تزوجت

/

/

 سؤال يمر في بالي دايم .. ليه الرجل بعد الزواج يكون غير عن قبل الزواج مع اهله ؟

اعتقد فيه كذا سبب بس اولها واهمها هي الــزوجـــه

ولما اقول الزوجه ما اعفي الزوج من تحمل المسؤوليه لانه بضعف شخصيته قدرت تغيره و تغير تعامله مع اهله

,,

ملاحظه هاااامه

ما اعمم على كل الزوجات .. لان بعضهم بنت ناس وتعين زوجها على بر اهله

وبعضهم فيها خير لاهل زوجها اكثر حتى منه

,,

السبب الثاني اللي خلاني اكتب هالايميل هي قصة حاصله الان مع احد قريباتي مع ولدها المتزوج

مثلها مثل اي ام تنتظر يوم تفرح بولدها وتزوجه وتشوف عياله .. ربت وتعبت وسهرت وعطته كل شي وكان من ابر الناس فيها

جا اليوم الموعود او بنظري المشؤوم اللي غير مجرى حياة هالام مع ولدها 

راحو يدورون على بنت الحلال عشان تكمل فرحتها بولدها ..

لقوها بنت ناس وحموله طيبه .. حصل النصيب وخطبها وبالبدايه كانت تعامل اهله بكل احترام وماشيه على مبدأ

تمسكن لين تتمكن

بعد العرس وبعد مادخلت بيتهم طلع وجهها الحقيقي و خربت الولد على اهله وخصوصاً امه وخواته 

صار طالع يسب ونازل يسب .. وينتقد اي شي منهم ... راح الاحترام وراح التقدير للي ربت وتعبت 

وكل هالشي عشان يرضي زوجته !!!

ومع ذلك صبرت هالام الحنون و قالت الايام بتعدله والله بيهديه .. وهو من فتره لفتره يصير اسوأ

ووصل لمرحله طالب بورثه من ابوه وامه مع انهم مازالو عايشين !!!

وكله عشان طويلة العمر اللي داعسه على خشمه !!

تبي تفتح مشغل !! 

صبرت الام وقالت بعطيه فلوس يعطيها لزوجته عشان تسكت عنه .. راحت ورهنت ارضها وعطته الفلوس

تخيلو ترهن ارض ماتملك اي شي غيرها .. عشان ترضي ولدها وتخليه مبسوط مع زوجته رغم كل اللي سواه معاها وعقوقه فيها

يوم صارت الفلوس معه .. تخيلو وش سوو فيها هو وزوجته !!

سافرو فيها !!

كانت من البدايه مبيته النيه وتلعب على الغبي اللي معاها انها راح تفتح مشغل ويوم ظمنتها قالت نسافر

وطبعاً بحكم انه يفتقد ابسط معاني الرجوله مشته على كيفها !

سافرو و استانسو بفلوس هالضعيفه .. يوم رجعو

امه كانت تنتظره .. مو عشان تسأله ليه ضيعت فلوسي على سفره

بس كانت تبي تطمن عليه انه بخير و تقعد معاه لودقايق

بالله من بيسوي كذا غير الام ؟

وصل طويل العمر مع المدام الله لايمد في عمره ولاعمرها

حصل نقاش حاد بينه وبين ابوه على الشي اللي سواه مع امه

يرد على ابوه يقول معاها فلوس وحارمتنا من حقي اخذها منها !

ظنكم ببقول هالكلام غير واحد نفسه دنيئه ؟

وكل هذا عشان يرضي وحده ما تسوى 

الام ما تحملت اكثر وطاحت عليهم .. جتها جلطه بالقلب

,,

مثل هالنوعيه من الزوجات دمرت بيوت كانت عامره وكانو اهلها متراضين بس عشان تفرض سيطرتها وتصير هي اللي تتحكم !

لكن اللوم مو عليها .. اللوم على من يسمي نفسه رجل اللي هان نفسه ونقص من رجولته عشان يرضي زوجته   

كيف تسمح لك رجولتك انك تعق امك عشان زوجتك ؟

تنسى فضل اللي ربتك وتعبت عليك سنين عشان وحده توك تعيش معها ؟

/

 ظنكم مثل هذا الشخص زوجته تناظر له انه رجل ؟

تناظر له بحب واحترام ؟

لو تحبه اصلاً او حتى على الاقل تحترمه ما قسته و خربته على اهله

,,,

وعشان لاتطلع الاخت جيجي تقول كونكت يهاجم الزواج

راح اذكر نموذج ثاني مختلف للنوعيه الثانيه من الزوجات  اللي تستاهل مسمى زوجــه

شخص اعرفه من الاقارب واستشهد بقصته .. كان اكثر شخص شفته في حياتي لا مبالي و اهله هذولي اخر همه بالحياة

من العمل للاستراحه او المخيم و البيت ماخذه فندق بس للنوم و الاكل 

قرر يتزوج و الله يسر له ببنت الحلال

ما كمل شهرين من الزواج الا كل احواله تبدلت .. تبدل هذاك اللي كان عاد بيتهم فندق للنوم و الاكل وبس

كل يوم صار يمر على اهله ويقعد معهم ويجيب زوجته معاه لانها هي اللي كانت تحثه اصلاً على هالشي

بعد فتره اخذ امه واخته مع زوجته و راحو يعتمرون

بعد زواج اخوه الثاني فضى البيت على امه واخته اخذهم يعيشون معاه هو وزوجته بجزء خاص فيهم 

واجر بيتهم وصار ايجار البيت لامه واخته هو ماياخذ منه ولاريال

  وكل هذا من اقتراحات زوجته عليه وهو ذكر لي هالشي بنفسه

ويحمد الله انه رزقه بزوجه صالحه ومحبه له وجهته للشي الصح 

//

اللي ابي اوصله بايجاز

ان الزوجه هي السبب الاول و الرئيسي في تحسين علاقة الزوج بأهله او العكس

يا تكون زوجه صالحه و محبه لزوجها تساعده على بر اهله وخصوصاً امه

يا تكون زوجه سيئه ومحتقره لزوجها و تحاول كثر ما تقدر تخرب علاقة الزوج بأهله

وطبعاً ما نغض النظر عن شخصية هالزوج .. لانه اذا كانت شخصيته قويه بيعرف يوقف هالزوجه اذا تمادت على اهله عند حدها

او العكس اذا كان ضعيف شخصيه بيمشي وراها ويطاوعها في اهله ...

//

اعتذر على الاطاله

لكن شي بالخاطر وكنت ابي اطرحه لكم

//

و الى لقاء في الايميل القادم



1 التعليقات:

بنت جيران الصحاف يقول...

يامال العافيه ان شاء الله يسعدك في حياتك ويوفقك دنيا واخره ... اميلك في الصميم .. والله في بنات ما يخافون الله ما يدرون ان الدنيا دواره