اعلن معنا

الوطنيه وحب الوطن !! ليتني مانيب سعودي .. ؟؟



---------- Forwarded message ----------
From: الـــصــــوت المــجــهــــول - <al900t@hotmail.com>
Date: 2010/3/23
Subject: FW: الوطنيه وحب الوطن !! ليتني مانيب سعودي .. ؟؟
To: ايميل القروب <als7af.group@gmail.com>




بسم الله الرحمن الرحيم 

السلام عليكم ورحمه الله وبركاته 

مساء وصباح الاعضاء التوسوناميين كلن بوقته

 

 

 

بالله كيف وانت تشوف الصورتين الحلوه هذه والعلم قسم بالله ان تصرف احلى تحيه لهم

واحلى تحيه مني لابو متعب وابو خالد << يارب احد يشرهه  << حتى الفيس اخضر وابيض

وربي تكيفكم كلمة لا اله الا الله محمد رسول الله بعلم دولتكم افخرو بالاسلام ووطن على نهج الاسلام ...

اليوم وانا كعادتي متطبح بشات الصحاف البيه الكبير وكنا نتناقش بموضوع الوظايف والزواج انا ودريمر وانتر. ولا يهونون الباقين ...

قلت دام انا فاضي وتاكي بالبيت ولابس بجامتي الزرقاء الجديده الي استوحي منها الهام الكتابه << صدق نفسه

سؤال شاطح ؟؟

بالله فيكم بنت تبي تتزوج واحد عمره 57 سنه ؟ يالله انك تعافينا مقدر اقول اكثر من كذا ؟؟؟

........

نط واحد اليوم بالشات كعادته نط عرق اللقافه فيه وتكلم بكلام يناقض تفكيره ودخل بموضوع مالنا فيه تكلم عن السعوديه واعتقد تكلم بمفهوم وعقول ناس كثيره خاطئه

وانه مايبي يصير سعودي 

ومتسعد احلف بالله ان اغلب بنات وشباب السعوديه الا من رحم الله  < لا احد يجي يقول غلطت عليه تراني قلت الا من رحم الله .

 طيب احد مسكك حالف عليك تقعد هنا الله لايهينك اقرب مكتب للاحوال وانطل عليهم جنسيتك يعني وقفت السعوديه عليكم

اجل وش رايك تاخذ مكان ابو متعب والا هيلاري كلينتون والله ان تبطي << بداء يخورها 

حبيبي الصحاف البيه الكبير مدري اذا موضوعي ذا بينزل والا لا بس حبيت افهم بعضهم وش وضعه بدولته؟؟

كتبت موضوعي ذا ولا انتظر اي رد من احد من الاعضاء والا اتناقش معه لان موضوعي ذا اكبر مني ومن اي شخص يجي يتكلم اويتناقش فيه

بس ياعمي ياصحاف والله تنغبن وتنقهر لمن تسمع وتشوف كلام مثل كذا

 حنا ننقهر من شخص من برا السعوديه يتكلم اجل لو واحد من نفس ديرتنا يجي ويقول السعوديه فيها وفيها ومدري ايش وحنا شعب ناقص ينكر خيرها عليه

يجيك الواحد يقول والله اني ودي اتنازل عن جنسيتي طيب وش السبب عشان تقول كذا ..؟؟ يقولك ياخي انا ماعندي انظمه امشي عليها ولا عندي حقوق بالدوله هذه ولا ادري وين يروح خيرها وبترولها .. وش رايك يشرهونك ببرميل كل شهر تسقي به بصل بحوش بيتكم!!

والي يقهرهك صاحب الكلام ذا ليته فقير والا مولاقي ياكل ولا يلبس لكن صاحب الكلام ذا وقسم بالله عيشتهم اطلق مني بمليووون مره منهم من يدرسه ابوه بالترم بحدود 45 الف الناس << ترا مايقصد احد

وانواع البطاره فيه وكاشخ وراز بالله من رزك كذا وعيشك بامن وامان بعد الله سبحانه وتعالى؟

من ساترك بعد الله وحاميك ومخليك تنام وانت مرتاح ماتفكر....؟ الامثله كثيره حول الامن وانت لاحول ولا قوة لك بعد الله سحبانه الدوله موفرتها لك بدون اي مقابل ولا ضريبه ورسوم تدفعها

 

(( ربي اجعل هذا البلد امنآ )) صدق الله العظيم

 

حتى ربك ذكر بلدك وعزك عن غيرك ونزل الامان عليك

،،،

ندخل دوغري وسريع ونسالك؟

طيب طلعت براا شفت وضعهم والخوف الي هم فيه؟؟

طلعت براا وشفت من هو يكنس وينظف شوارع ديرته علشان لقمة ياكلها طلعت براا وشفت من هو ماخذ ظل زباله ( اعزكم الله ) ينام تحته

ماقلت مافيه فقرعندنا ولا انكر الشئ ذا بس الفررررق كبير ولا اتكلم عن الفقر انا اتكلم عن عز وامن وامان واستقرار..

بس فيه منهم اصحاب عقول مدري وش تبي ..

يعني لو نجي للحريم والله انكم بنعمه وبدوله تحترمك وتقدرك وتعزك اقلها انك مصدقه بكل شئ حتى لو تبليتي على احد

سحبوه مع مقفاه ولعن ابو الطيب فيه عشانك

والا علشان ماخلوك تسوقين زعلتي والا تبين حريه مطلقه لك بكل شئ وتتحررين تجين ترمين لومك على السعوديه وانا مابي السعوديه ولاعاجبتني انظمتها ابي اطلع براا واتحرر.!!

يعني ليه ننظر للموضوع من زاويه وحده شوفي وش عندك وش تمليكن وايش هم فاقدين وبعدها احكمي

خلاصه الكلام ونعجز نجمع وش تملكين وغيرك فاقده ..

والله انك عزيزة وعفيفه وكل شئ عندك بس مدري وش يملي عينك؟؟

طيب انتي تنظرين لمن افضل منك بدوله اوروبيه والا عربيه..؟

الفرووووق كثيره وربي

دول اوروبا الي اغلب بناتهم يشحذووووون بالشوارع مع ان اقتصادهم اطلق مننا بكثير والا الي منهم ماسكه سرا باقسام الشرط تقدم شكوى اغتصاب من ابوها والا اخوها والا من سكران بتالي الليل ومتهجم على بيتها بدون اي حمايه لهم ولا شئ والا تبي تتعالج والا تولد عند اقرب رصيف

شوفي اغنى الدول براا عجزت تلقى ضمان طبي لمواطنيها وانتي هنا معززه ومكرمه

والا دوله عربيه كل يوم هي بسجن وحالتها حالها بسبب الفساد الي طايحه فيه بسبب دولتها والاسباب كثيره وكلن يعرفها

الامثله كثيره وربي ولا بذكرها والظاهر كل شخص يعرفها

شوفي نفسك والله انك بنعمه محد درى عنها الا الي فاقدها شوفو الي براا وش كثر يحفر ويتعب وحالته حاله علشان بس يوصل لديرتك

ناس تتعب وتكد سنين علشان بس يوم والا يومين تجي تعتمر وتحج

ليه ننكر فضل ونعمه احنا فيها هذا جزاء المعروف يعني 

يعني بالله وش تبين تقدرين تاخذينه شغاله وعندك وسواق وغيرك مالقاها وربي اقلها تروحين للسوق تمشين ابن امه يعترض طريقك ويقولك 1 + 1 كم

يعني لو جينا من ناحيه ثانيه وهي الشغل موفر لكم بس الوحده منكم نطت لاخس قسم شك وتطريز وتاريخ وجغرافيا تبي ترتاح بدراستها  ونشبت ليه ماتوظف

طيب اشتغلي ببيتك محد نشدك عن شئ ثاني والله بتقولين وين بيتي وزوجي بقولك اكثرهم رافضه تعرس تنتظر براد بيت يجي يخطبها

وش العيب اذا اشتغلتي انتي؟؟ << شطح بس منقهر المره منكم ماغير تاكيه والرجال يكد ويتعب ويلقى نفس شينه اخر الليل

بدل الخادمات الاندونوسيات ( المعروفات بالسحر ) و الفلبينيات ( شينات النفس )

وغيرهم كثير .. بس مو شغلة قطع رزق بس احمدي ربك ان الدوله وفرت لك الشئ ذا ..!!

....

نرجع لموضوعنا..

بالنسبه لكل رجال مواطن سعودي يحمل الهويه الوطنيه ويجي يقول ياكرهي للسعوديه  ماعندي حقوق ولا عندي وظيفه ولا عندي شئ منها طيب تعبت مثلك مثل غيرك درست دورت كحيت على وجهك والا تبي كل شئ موفر لك يدرسونك وتتوظف وانت تاكي وصايع بالشوارع

ولا فوق كذا تلقى عشيته مرتاحه ويدرس طب والا هندسه باطلق جامعه واهليه يعني بالله من وين جاب ابوك مصاريفها زرعها وطلعت له والا من دوله اشتغل فيها ولقى من خيرها؟

احمد ربك لقيت لك ديره تصيع وتتسربت على كيفك وقالو لك ترويح عن نفسك براا لو شافوك لعنو خامسك

ياخي وقسم يكفي الدوله طلعتك تدرس براا على حسابها غيرك مالقى الشئ ذا باطلق الدول واغناها 

اليوم اسولف مع واحد يقول يقولي

( مدينة الرياض (46 في المائة) من الشباب مصابون بالشذوذ والمثلية الجنسية.. ))

يعني بالله ذا ذنب من ذنب الحكومه والا ذنب مين ؟؟

تبي الحكومه توفر لك مراقص وبنات علشان تغير ميولك

والا هذه مكشلة تربيه وفكر ؟؟؟

طيب يالي تجي تقول الوطن فيه وفيه وفيه وش الوطن بالنسبة لك ..؟
بالله يالي تتكلم بالسعوديه عرف لي وش هي الوطنيه؟؟؟؟...

تبي اعلمك وش هي الوطنيه؟
الوطنية هي الانتماء و أن يكون المواطن ساعي لرقي وطنه بإجتهاد.. أن يكون مصلح و طامح لكل خير لوطنه في كل وقت .. هذه هي الوطنية .. في نظري ونظر كل واحد يحب الوطن وتراب الوطن 

يعني اذا ماصلحت من نفسك من تبي يصلحك...؟

 يعني كيف تبي ترقى بدوله وانت مارتقيت بنفسك...؟

 

اسلئه كثيرررره اسال نفسك بس لاني انسان جاهل ولا اعرف الكثير منها بسالك سؤالين

 

1- السعودي اذا سافر لاي دوله يعاملونه على انه بنك او صرافه او مخزن اموال تقدرتقولي ليه السبب ؟
2- السعودي اذا سافر لاي مكان عين المتسوليين عليه ليه السبب ؟؟

 تتوقع علشان خشتك المشهبه ..؟؟  والا علشان مفهموم كل اجنبي انك من دوله رازتك وعازتك بين باقي الدول ؟؟

 

بالختام ...

يارب الموضوع يمر من الجمارك بسلام

اعتذر لكل انسان سعودي عن بعض العقول الجاهله

 

والمعذره ان طولت عليكم لكن والله الموضوع غبني وقهرني  والكلام كله مجرد غيره مواطن على وطنه بسبب نفوس ضعيفه مانقدر نقول الا الله يصلحهم ويهديهم 

 

وفمان الله وتصبحون على خير يالربع

 

 

 

 


0 التعليقات: