اعلن معنا

غرفـــة أخــــــــــــــو ي !!؟؟



---------- Forwarded message ----------
From: miaomiao . <bzo0ona-2009@hotmail.com>
Date: 2010/4/11
Subject: غرفـــة أخــــــــــــــو ي !!؟؟
To: 



  ملاحضه مهمه جدا"جدا"/اللي ما تعجبه مواضيعي وقصصي ترا ماهوب مجبور يقراها ويغث نفسه على طول الله لايهينكم على  الجينك ميل  ويرتاااااااااح    


 

 السلام عليم ورحمة الله وبركاته

 بعد التحيه والسلام....اما بعد <<<<<<<<< تسمع بالمعاريض هع

المهم  نخش بالموضوع .........!!!!!!

ولو تلاحظون اني ما قلت ترحيبي هذاك الطويل العريض لأن الموضوع طويل حبتين << بتتصطر

اليوم بقولكم قصه حصلت معي انا واخواني <<<< وش تحسين انتي

الزبده ابطال الموضوع هم كالآتي

  

 بزونه   واللي هي انا  والرأس المدبر لكل مصيبه تصير بالبيت  خخخخخخخخخخ

  دحومي  هاذا اخوي الصغير بس اطول مني  وهو فخذي ءء أقصد ذراعي اليمين ;we4e

 

 عبد الله   هاذا عاد اخوي الكبير((عزوبي+عربجي)) الملقب بالدب الداشر>>> راعي الددسن عرفتوه؟ وهو بطل القصه

 

   فهودي   اخوي الهطف (متزوج) خخخخخخخخ

 

  رورو   أختي الدافوره >> هذيك الفاهيه تخبرونها اللي تاكل الكتب <-- مالها ذكر بالقصه بس كذا حطيتها زيادة عدد
 
  أمي وخواتي أم مساعد وأم تركي   هذولا  كمبارس القصه  ههههههههه <<< عايشه الدور

 ايه عاد نبدأ قصتنا

هاذا يا طويلين العمر ومحافيظ السلامه السالفه وما فيها أنه في مره من المراريت..ال..المرارير..المر..مريتات..<< المهم انها جمع مرَهـ

كان التلفزيون اللي عندنا بالصاله خربان /وكان وقت بداية برنامج شاعر المليون المهم أمي عاد الله يخليها لي ولا يحرمني
منها تمووووووووووووووت بشي اسمه شاعر المليون هي واختي ام مساعد المهم اشلون ! كيف!؟

 

مافي الا حل واحد تلفزيون اخوي اللي بغرفته!! راحت الوالده و طق طق طق اقول عبودي>>تدلعه حق المصلحه

عبدالله/هاه >>> قايله لكم عربجي

أمي/افتح لنا الباب ياوليدي  خلنا نشوف شاعر المليون بغرفتك

عبدالله/ليه وش فيه تلفزيونكم ؟؟>> يموت ولا يخلي احد يدخل غرفته

أمي/خربان

عبد الله/والله مو مشكلتي انا الحين بنام مانيب فاضي ازعاج ومهايط شعراء>>أجل بتنام هاه

أمي/اقول استح على وجهك وافتح الباب من زين غرفتك عاد ولا من زين ريحتها اقول افتح الباب وانت ساكت دام النفس عليك طيبه احسلك

>> وانا اقول اخوي من وين ماخذ العربجه >>وين الدلع اللي قبل شوي!!

عبدالله/طيب طيب هالحين بفتح الباب امري لله

وبعد ربع ساعه ..فتح الباب.. وتتلقاه أمي

أمي/اخيرا" فتح الباب والله لو انها بوابة قصر المصمك !!

عبدالله/ اشلون يعني الواحد ما يغير ملابسه >> علينا يبو تغير ملابسك

المهم دخلت أمي هي وأختي وجابو الشاي والقهوه والزهورات والحب والمكسرات الحلوى العمانيه وما خلت شي الا وجابته

وجلسو يتابعون شاعر المليون .... واخوي قاعد على طرف السرير ويناظر بنظرات

 كن وده يقول -الحمد لله ان غرفتي ماهي بر ولا كن جابت بيت شعر ومشب

بس اللي لاحضته ان اخوي قاعد بالغرفه معاهم مو من عوايده ولا طلع ولا تزحزح

قلت لاااااااااااااا اكيد في سالفه المهم رحت لخوي الفاهي دحوم وكانت واضحه على فيسي علامات التعجب

وأخوي ولا سأل فيني مركب هالسماعات وقاعد ينصب على بنات خلق الله بهالشات

يوم اني شفته ما انتبه رفسته وقلت له هيه انت ما تلاحظ شي

نزل السماعات وهو يقووووووول  ياااااااااليل مطولك وش تبين انتي 

 خير وش عندك بعد! شوفي اذا تبين شي من البقاله دقي على فهد تراه جاينا بالطريق

انا مانيب فاضي اروح مشي للبقاله عشان اجيبلك علبتين تونه مع مربى بطيخ

يلعن اوم المعده اللي عليك حشا موب تسبد اللي عليك احسها تسبد حمار على هالأكل

 وانا وجهي كذا<--     /صرخت عليه وقلت له اي بقاله واي تونه واي بطيخ انت وجهك ادري بك يالزلابه يالسوداني

والله لو يصير زلزال بالبيت ما دريت عنه ولا همك !!! انا اقصد اخوك عبد الله

نقز اخوي دحوم من مكانه وعيونه كذا <-- / وهو يقول وشو؟ وش فيه؟ وش صاير بعد؟ لا يكون اخوك ذا مفحط كالعاده وقاشينه الدوريه؟

هنا انا عصبت وحسيت اني بتهور مسكت مزيل العرق اللي كان موجود

 على التسريحه جمبي واهفه فيها على جبهته  وانا اقوله ركز معاي شوي يالفاهي

وهو يقولي خييييييييييييييييييييييير وش تحسين فيه انتي ؟؟ شايفه وجهي اباط عشان تحذفيني بذا

 وش تبيني الاحظ؟؟

قربت منه وانا رافعه يدي عشان احطها على اذنه بزعم اني بقوله سر  ولا اشوف الا هذاك اللي حط يده على وجهه وقامط مني يفكرني

بصطره على وجهه/// المهم اني قلت له تعال بقولك لا تخاف خخخخخخخخخ<<< مهجدته وانا مدري هع

المهم اني قلت له ما تلاحض ان  اخوك ما تحرك من غرفته ولا طلع ؟؟؟

التفت علي وطالعني بنظره حسيت منها انه وده يتفل بوجهي وقال هالحين كل هالفلم  ومستغربه ومسويه زحمه عشان اخوك قاعد بغرفته؟

اجل وين تبينه يقعد بالحوظ حق الددسن مثلا"!!

انا هالكلام ما خش مزاجي قلت لازم اكتشف السر / رحت جلست بالغرفه مع مجموعه الملاحيس اللي متسمرين على هالبرنامج

قال ايش قال شاعر المليون وكله كوم وهالمذيعات اللي كل سنه يزوجون وحده ويجيبون وحده جديده !!

ولا حليمه بولند اللي بكل موسم رازتن خشتها تقل عنز مظيعه أهلها

 هي وهالسنام اللي فوق راسها كنها تقولهم غصب طيب ابي اتلع <-- يعني اطلع بالبرنامج 

 لا واللي قاهرني انها ما ترتز ألا ورى لجنة التحكيم <-- غصب تبي تطلع بالتصوير لا وكله كوم ورموشها التركيب كوم ثاني بزعم ان عيونها وساااااااع

واذا جات الكاميرا عليها قامت تبوسم وتسفق<<يعني تصفق

كنها تقول تكفون اختاروني الموسم الياي<-- يعني الجاي <<< يالطيبه ترا طلعنا عن موضوعنا كملي

ايه احم شسمه سوري على الشطحه / المهم وقعدت اناظر معاهم وانا عيوني تحوس بالغرفه <<< تبي تصيد لخوها ذله

المشكله ان غرفته مليانه حوسه واغراض يعني ابطي عظم الاقي فيها شي

ويوم انه انتهى شاعر المليون وكلن طلع لغرفته ولا امي تقولي -بزونه شيلي الشاي والقهوه ونظفي المكان بعدنا  دام انك سهرانه ولا وراك شي

وانا اللي فرحت <<< بتشوف وش سر هالغرفه ما امداني استمتع بنيتي الشينه

الا اخوي يقول /لا لا لا خلو كل شي مكانه انا بعدين انظف غرفتي بنفسي <<الا فيه بلا ونص

واقوله انا ليش عادي خليني انضفها <<< ابوك يالأخوه

قالي لا لا  انا بطلع مشوار وراجع << قل قسم بس

قلت له وانا استهبل عليه -بتطلع!!وين اللي بينام قبل شوي ؟؟ ولا طارت النومه هالحين وش الشغل اللي جاك تالي الليل؟<< انا قصدي أمي تسمع

ناضرني  أخوي بنظره مخييييييفه وقالي اقول ما ودك اعطيك كف ينومك اسبوع كامل <<< يمه

هالحين وش السواه؟؟ اخوي طلع وقفل غرفته

ايه بس ما فيه الا حل واحد وانقز واروح لخوي دحوم

وأجيه طااااااااايره  دحوم دحوم دحوم ولا انتبه الا بهالمصك اللي واقف قدامي هو ونظارته الطبيه كنه غازي القصيبي على غفله <<< اخوي فهد

وانا اللي اناظر فيه واقول ياربيه كن اخوي فهد بوه شي متغير بوجهوه<<< مسكت على قصيمي ههههههه

وانا اللي اتبوسم على خفيف اثاريه زالطن اوم السكسوكه ومعاها شويه من الشنب<-- كنه هتلر

 يقالك دعايه ازلط سكسوكتك وناخذ معها نص الشارب مجانا"ههههههههههههههه

مالكم بالطويله اول ما لقيته بوجهي قلت له هلا فهود وين دحوم ؟ وخر شوي ابيه بموضوع

واحاول امر من بين ثكنات << متعوب عليها ثكنات ذي هع

من بين ثكنات كرشه عشان اروح لخوي التبن مدمن الشات الصوتي << حاقده عليه

 يمسكني فهد ويقولي وهو ما سكني من تلابيبي<<< ياليل النحو ليلاه

هيه هيه انتي على وين انشالله بعدين وين امي وخواتي والعيال ... ناضرته نظره غير اخويه

ثمن قلت له اقول فهد كم الساعه بالله  .؟ قالي مدري يمكن 12ونص ليه تسألين

قلت له لا ولا شي بس وين مرتك وعيالك ليه ما جو معاك ؟؟ قالي وش فيك انتي تبين اجيب مرتي وعيالي نص الاسبوع وبكره مدارس ودوامات!!

رديت عليه وانا ابتسم ابتسامه برضو مو اخويه وقلت له دام انك تبيهم ينامون بدري وراك جاي متأخر والا تفكرعيالك ومرتك ذا البطه بس هم اللي

عندهم دوامات وباقي الناس عطاله بطاله ماعندها لا شغل ولا مشغله غير انها تناظر شنبك ذا اللي كنه قطعة جبن ما كلها فار مسوي رجيم هههههههه

 لا يابابا, ياخي امي نايمه ماهي فاضيه لأمك هالحزه تجي تزورها نص الليول<<< جمع ليل خخخخخخ

عصب فهد علي وقعد يصارخ علي ويقول احترمي نفسك ولسانك هاذا يبيله قص الشرهه علي انا اللي جايبلك مكسرات من (باجه)

على طول قلت له تكفي يبو تراي مره خاقه عليك وعلى مكسراتك انا اقول لو تروح تزغد فيه مرتك هالبطه  احسن لك

ويرجع يقولي طيب اسمعي غرفة الضيوف فيها احد ولا فاضيه ؟؟؟

قمت سحبته من اذنه وقلت له ثاني مره لا تقعد تهايط وتسوي نفسك بطل علي فاهم

قالي ابشري طال عمرك بس اهم شي دبريلي عذر مقنع حق أمي

غمزت له وقلت له ابشر بسعدك يا خوي كم فهودي انا عندي بس بالله قولي من متى وانت تفرفر بالشوارع؟؟

رد علي وهو يفتح زرار ثوبه من العصر وانا ادوج بالسياره

حطيت ايدي على خصري ومديت الثانيه وانا ماده اصابعي السبابه والوسطى موب ناقصني الا زقاره واقوله ..وعلا ايش هالمره متهاوشين؟؟

وبهاللحضه دخل علينا دحوم وهو يسمي بسم الله الرحمن الرحيم ويحط ايده على صدره ويقول لخوي فهد انت متى جيت هنا

ووش فيكم واقفين كذا عند الباب كنكم بياعين حبوب في زاويه

رديت عليه بعد ما فتحت علبة البربيكان ومسحتها من فوق بطرف بجامتي وقلت له ننتظرك انت وهالخشه اللي كنها خشة (مقظَم )مقطوع يدور له من يعطيه (دفيَه) انت وهالوقفه كنك هشام الراشد على غفله موب ناقصك الا انك نفتح بلوزتك ذا الصفرا وتتفل داخلها من الروعه

المهم دخل فهد ينام وجلسنا انا ودحوم نفكر كيف الحين نفتح الغرفه حقت عبد الله

برب فاصل اعلاني ...............

http://www.youtube.com/watch?v=UdXYRiOdrBE&feature=related

      ههههههههههههههههههههههههههههههههههههههههههههههههههههههههههههههههههههه

باك  ايه وين وصلنا !

 

 بعد التفكير والتمحيص والتقليب <<< ياليل ابو لمبه

لا وتخيلو كل هاذا واحنا جالسين عند باب الغرفه

ودحوم يقولي اخلصي علينا هالحين وش السواة

ترا ماعاد احس بشي من كثر القعده على البلاط

وشلون نفتح الغرفه ولو اني داري ماراح نلقا فيها شي وبيطلع اخوي مظلوم كالعاده بسبتك

قلت له اصبر ياخي ما تشوفتي قاعده افكر بحل ؟؟

قالي -الله والتفكير عاد يا شارلوك هولمز<< محقق جرائم مشهور هع

رديت عليه وانا اسوي نفسي موب عاجبني .تتريق انت ووجهك

اقول ما ودك اروح اقول لأمي على باكيت الدخان اللي فوق جدار حمام الرجال اللي بره بالحوش

هنا عاد نط من مكانه وهو منصدم  وقالي اوووما وشلون عرفتي مكانه يالتسلبه وانا اقول وراه كل ما جيت ادخن الاقيه ناقص ؟؟

هنا عاد قاطعته وقلت له اقوووووووووووووول لا تظيع الموضوع خلاص كفشتك

المهم الحين على طاري امي بس لقيت حل

دحوم/ ها  وش حلك يأم الحلول الخنفشاريه!

قلت له اصبر خلك هنا شوي انا بطلع فوق شوي وراجعه!!

نقز ومسكني مع رجلي كأنه سيلانيه ما ودها كفيلها يسفرها  وقالي أقول بزونه تكفين انا دحومي اخوك حبيبك

سالفة الدخان لا تعرف فيها الوالده <<<< هع هع رحمته من جد

قلت له وانا نافختن خشتي ومسويه فيها اني ماسكه عليه ذله << مع العلم ان امي هي اللي كافشته بالأصل موب انا بس معطيته جوه ههههه

قلت له خلاص عشانك احسن اخواني وصديقي مانيب معلمه امي بس بشرط؟؟

قالي وش شرطك بعد !!

قلت له كل ما رحت تشتري بكيت من البقاله تجيب لي معاك علبتين تونه ومعاهم مربى البطيخ <<< هع هع هوووع  رديتها له كككككك

المهم مالكم بالطويله <--- احلفي بس

صعدت فوق ودخلت غرفت امي بشوييييييييش  وفتحت علبة المفاتيح <<عندها لكل باب نسخه

والاقي مليون طعش مفتااااااح ياليييييييل التراب هالحين وشلون الاقي مفتاح غرفة اخوي

قلت ما بدهااااااااش آخذ العلبه كلها واجرب المفاتيح وانا جايه بطلع واعثر هذيك العثره اللي يحبها قلبكم

خبركم الغرفه ظلام واطيح على خشتي  (( الله ياني حبيت الأرض هذاك اليوم))

 وطبعا" طاحت علبة المفاتيح وانواع الاصوات بالغرفه وتناثرت على قد الغرفه

وصحت امي مفزوعه بسم الله الرحمن الرحيم أعوذ بالله من الشيطان وش ذا

رديت عليها طبعا" وانا احاول امط خشمي اللي انفغص ودخل داخل وجهي من قو الجدعه

آهـ ياخشمي  / لا يمه بسم الله عليك  هاذا انا بزونه بس اني تكرفست شوي على البلاط

أمي /وش عندك بهالليل كنك جني انتي ما تنامين ابد وبس فالحه سهر بالليل

والصباح تطلعين عيني عشان تقومين ترا هالحال موب عاجبني اقول تعدلي

قبل يجيك شين ما يسرك وبعدين وش عندك ماخذتن هالمفاتيح كلها معك انتي وش قصتك؟؟

انا هنا بلعت العافيه وقلت لها // لا يمه الله يهديك بس انا قلت دام اني فاضيه وما  عندي شغل 

قلت يعني اروح افتح غرفة اخوي وانظفها حرام مسيكين شكله طلع زعلان بعد الدمار الشامل اللي حل بغرفته <<هع لعينه 

ردت علي امي وهي شبه نايمه -كفو والله بنيتي اني قايله هالبزونه محد مثلها بالحنيه <<< بالنذاله وانتي الصادقه 

ايه خذي المفتاح /رديت عليها قلت يمه بس اي واحد مفتاح غرفته 

قالت لي شوفيه عندك اللي مصدي من فوق <<<حتى مفتاح غرفته  مثل مخه ههههههههه

قلت لها طيب انا اذا قضيت برجع المفتاح ! المهم وانا طالعه من الغرفه تذكرت شي ورجعت للوالده وقلت لها

ألا وش بغيت اقولك يمه  ترا فهد عندنا نايم بغرفت الضيوف شكله متهاوش مع عجوز النار << يعني زوجته ههههههه

بس انتي اذا شفتيه سوي نفسك ما عندك خبر بالموضوع!!<<< ابوك يالنذاله

قالت لي امي وحنا هاذا حالنا مع هالبطه منيره كل يوم طالعه لنا بسالفه مع هالولد؟؟

قلت لها والله يمه الشرهه موب عليها الشرهه على ولدك الخروف هو اللي راضي <<< الله يهنيه يارب دامه راضي

المهم نزلت تحت وألاقي ذا المتنح ماسك الاب توب وجالس يسب كل من هب ودب بالشات الصوتي <<< ياليل البزران

المهم اني فصلت المودم وقلت له خل عنك سوالف البزران وتعال معاي خلاص جبت المفتاح

دحوم/اوووخص والله منتب هينه يالعنز<<< يسمع بالمدح 

اول شي خلنا ندق على أخوك نشوفه وين هو بوه<<ياليل القصمان هع

واذا كان قريب نكنسل عملية الاقتحام <---هاذي مشكلة الافلام البوليسيه على الشعب السعودي  هههه

طوووط....طووووط <-الجوال وهو يدق <-تسمع بالمؤثرات الصوتيه ههههه

دحوم/الو وينك ؟

عبد الله/موجود وش بغيت ؟

دحوم / موجود وين يعني قريب ولا بعيد؟؟

عبد الله /وانت وش دخل امك تسأل قلي وش بغيت اخلص علي <--ما يلاعب ابو الشباب

دحوم/ لا بس بعرف اذا انت قريب من البيت ولا بعيد لأن خالد خويك بره عند الباب يقول انه مسلفك فلوس وانت جاحده <-هع

عبد الله/هاه خلوَدي مغيره الدب ابو عراده يووووووه هالنشبه ذا اقول انا بطول بره واذا مشى دق على عشان ارجع البيت 

دحوم/طيب خلاص لاتجي الا اذا عطيتك رنه <--- والله المخ اللي يفكر 

بصراحه اعجبني ردك حلوه التصريفه يابطل من متى وانت ذكي كذا اخبر انك تنكه<--- لازم تغلط 

المهم الحين تأكدنا ان اخوي ماهوب جاي إلا إذا عطيناه خبر <-- مسكين ما يدري وش يدور من وراه   !!

  فتحت الغرفه ثمن فتحت اللمبات وعلى طوووووووووووول اخذت دلة القهوى وقعدت اتقهوى خخخخخ

ودحوم وجهه زي كذا<--  / ويصرخ على وهو يقولي  قسم انك ماعند امك سالفه وانك فاضيه

هالحين فاتحه الغرفه عشان تتقهوين انتي ووجهك هاللي كنه اباط الطقاقه احلام وهي تلعب يوغا

شربت قهوتي ثمن قلت له بكل برود وهدوء اهصاب 

 هدي هدي وراك متنرفز كذا ياخي شفت الدله ولا قدرت اقاوم اغراء القهوه <--عايشه في بر

الزبدا يالله تعال نبدأ الجرد <--خيييييييييييييير انتي

احم فاصل اعلاني ونواصل <--- قلق وربي قلق

http://www.youtube.com/watch?v=CULqSHMSA3g&feature=related 

 

كككككككككككككككككككككككككككككككككككككككككككككككك

ولكم احلاااا  بااااااااااااااااك (ترا ما جاب الغبار للرياض ألا دعاياتي )ههههههههههههه

المهم نرجع لموضوعنا اللي مدري متى بيخلص <-- يارب يخلص

الزبده اننا قعدنا انا واخوي نحوس بالغرفه نبي نطيح على شين عدل يستاهل كل هالفلم اللي سويناه ما لقينا شي

بعد ما فقدنا الامل فتحت التلفزيون وجلست افرفر <-يمكن البلا بداخله !!

يعني قنوات مش ولا بد ,افلام من اللي بالي بالكم وكذا !! ابد ما لقيت شي

سكرت التلفزيون وحذفت الجهاز وراي وهنا بالذات حصلت المفاجئه!!!

واذا بي التفت ايما التفاته<--- الفلمنكي على غفله ههههههههههههه

ألا على طاري الفلمنكي هو ليش دايم يقول ايما ذي وليش دايم مواضيعه لها بدايه ولا لها نهايه ؟؟؟

<--- احس اني بنجلد <-براااااااااااااااااااااااااااااااااا

المهم التفت وراي والاقي هذيك العلبه المغلفه بكرتونه بيضاء وانا اللي وجهي يصير كذا<-- 

  وامسك العلبه وافتحها ودحوم طبعا" رازن خشته كلها بالعلبه ههههههههههههه

تتوقعون وش لقيت؟؟؟؟؟؟؟ ما تصدقون 

لا لا مستحيل تصدقون /تدرون وش لقيت ؟؟

اقسم بالله العظيم اني ما اكذب عليكم <--- تسمع بعنصر المفاجئه

ألا الكلمه ذي وشلون تنكتب تسذا(المفاجأه)ولا تسذا (المفاجئه)؟؟؟

ماعلينا/ لقيت طقم ذهب بـ1800 ريال<--

وانا اللي كنت اشحذه بطل البيربيكان شحذه وهو يقولي ماعندي ,طفران,ادفعي واجيب لك, النذل هالحين مشتري طقم ذهب بـ1800 ريال

هين هين والله لأوريه ودحوم مو مصدق ويقول اووووخص هالحين اخوي ذا الداشر يطلع منه كل هذا؟

بس تتوقعين لمين هالطقم؟ومن هالي مخرفنه فيه وخلته يشريلها طقم بـ1800 ريال 

لا لا ما اعتقد لا تظلمين الولد يمكنه شاريه لأمي بعدين لا تنسين ان امي قبل يومين زعلت عليه يمكن جابلها هاذا الطقم رضاوه لها

أنا/هاه  أمممم انت تتوقع كذا والله يمكن كل شي جايز!!

المهم الحين خلنا نرجع كل شي مكانه بس قبل كل شي جيب جوالك خلنا نصور الطقم عشان يكون عندنا اثبات اذا انكر <-- وش يقربلك ابليس ؟

وفعلا" صورنا الطقم وصورنا معاه الفاتوره ثمن رجعنا كل شي مكانه وطلعنا وقفلنا الغرفه ورحت ارجع المفتاح 

ولا الاقي أمي تسألني -نظفتي غرفت اخوك ؟؟

قلت لها وانا اتبلعم هاه ءءءء لاء ما امداني انزل الا الاقيه راجع للبيت وخفت انه يشوفني فاتحه غرفته ثمن يقعد يهاوش<-- ياحيااااااااتشي

المهم اني عطيتها المفاتيح ورجعت نزلت تحت واروح لخوي الدلخ واقوله يلله خلاص دق على اخوك الدب خله يرجع للبيت 
قالي اخوك  بغرفته منذ مبطي ,وانا اللي افتح فمي واطير حواجبي واقوله اوووما متى جا ولا يكون حس بشي ولا شافنا وحنا بغرفته ,قالي لا لا ما شاف شي بس انتي الحين طسي خليني انام تراي من اليوم وانا ورا خططك الفاشله اقول ضفي خشتك خليني 
انام , قلت له طيب انخمد بس لا تنسى بكره اول ما تصى تروح لخوك ذا الداشر وتحاول تسحب فيه وتعرف حق مين ذا الطقم فاهم!!
قالي وهو يفتح نص عين , طيب طيب يجيب الله مطر 
وانا صعدت فوق ورحت غرفتي ولا قدرت انام مغير احوم بذا الغرفه كني ضب مختنق بدخان ددسن منفقع شكمانه<-- ابوك يالوصف
المهم مدري انا نمت ولا مانمت هاك الليل الوكاد اني ما حسيت الا اني طالعه من غرفتي ونازله تحت والاقي الشعب كله صاحي وقاعدين يفطرون ومستانسين ومسفهلين ولا عليهم , دخلت عليهم وسلمت وصبحت عليهم وحبيت راس الوالده وانا جايه بقعد عطيت اخوي الدلخ غمزه <--يقالك مسويه حركه!
قام هو ومدلي براطمه هاللي كنهم براطم بعير توه موسمينه مع رقبته ورفعلي كتوفه (يقصد يقولي مافي امل )!!
المهم اني قلت في بالي  وانا اصبلي قدح من حليب الخلفات <-- اوما قدح ذي كثري منها ,قلت هين يادب انا مطلعه خنابقك يعني مطلعتها
 الله لايعوق بشر
وفي هاذي اللحظه بالظبط دخل اخوي فهد وهو توه قاعد من النوم وعيونه شبه مسكره وحوالينها شي لونه رمادي ويوم انه شاف الوالده على طول ناظرني واشرلي بعيونه على امي ثمن غمزلي ويفر بيده اليمين كنه يقولي (هاه بشري وش قلتي لأمي عسى صرفتي الموضوع )ناظرته انا وغمزت له على جمب وانا ماده له اصبعي الابهام وكني اقوله (ok كل شي تمام )ما امداني اكمل 
الحركه الا أمي تقوله عساك تصالحت انت ومرتك بس ولا للحين متهاوشين <-- جابت العيد
رد عليها فهد بكل ثقه وقال لها اي هواش يالغاليه لاني متهاوش ولا شي !!!!
ردت عليه امي وهي تفقع وحده من بيض العيون اللي مسويته ع الفطور والود ودها انها تكون وحده من عيون اخوي فهد 
قالت له ,علينا يا مناحي؟ ترا بزونه قالت لي على كل شي امس يعني لاتحاول تتهرب <-- مصره تخربها الوالده
التفت علي فهد وهو يمسح على دقنه وكأنه يقولي (هين يالتسلبه حسابك معاي بعدين )
وانا من قو الروعه من شكل اخوي وهو يتوعدني حطيت بالحليب بدال السكر ملعقة جبن واحرك احرك احرك الين ما حسيت ان الملعقه ذابت من كثر التحريك <--ياشين الواحد اذا انقفط
المهم انها بعد كذا قام اخوي عبدالله من النوم ودخل علينا وما امداه يشوف وجه اخوي فهد الا وهو ميت من الضحك 
تصدق يافهد احس في شبه بينك وبين المسيح الدجال ,رد عليه فهد وهو مستغرب ليـــــــــه ؟؟؟؟,قاله لأن المسيح الدجال مكتوب على جبهته كافر وانت مكتوب على جبهتك انك متهاوش ومطرود من البيت ههههههههههههههههههه
ما امداه اخوي كمل كلمته الا وكل اللي بالصاله فاقعين ظحك  كككككككككككككك<-- مسكين رحمته
بس عاد ما خليتها تعدي على طول رديت على اخوي عبدالله <-- بزعم اني ارقَع 
قلت له بسم الله عليك انت ! لايكون بس انت اللي جبهتك صافيه انت وجهك ؟؟
التفت على وقالي وش قصدك ؟؟ قلت له وانا اقرب من امي وامسك ذراعها عشان اضمن ما يجيني مخمَس يفر وجهي 180 درجه 
مكتوب على جبهتك حسن النمر للمجوهرات!!!
رد علي بكل بروووووووود وقالي انا اشك انك موب صاحيه شكلي بوديك اشهار قريَب!!!
وفي نفس الوقت ناظرنا بعظ انا واخوي دحوم وكننا نقول لبعظ شسالفه ؟؟؟
طبعا" امي لاحظت الموقف بس ما تكلمت ويوم انها صعدت غرفتها وانا اللي اروح لها واجلس اسولف معاها واقولها عن طريق غير مباشر اقول يمه وش صار على شاعر المليون امس ؟؟؟  ردت علي , ماصار الا الخير !!
وانا وجهي كذا <---
واقول لأمي احاول الف الموضوع !!<-- محاوله فاشله 
المهم اني سألتها أقول يمه عبد الله اخوي ما جابلك شي ؟؟ قالت لي كيف يعني وش قصدك  وش يجيب لي يعني ؟
قلت لها يعني مثلا" جابلك هديه طقم ذهب ؟؟ قالت لي لاء من وين ياحسره اخوك ذا ما من وراه هدايا جلف ما يعرف يهدي !!!
المهم عدلت قعدتي ومسكت يد امي وقلت لها ,شوفي يمه بقولك على سر بس موب تنكبيني مع اخوي وتجيبين العيد مثل ما سويتي مع اخوي فهد !!!(وجه مسوي نفسه برييييييييئ)هع
المهم قالت لي امي , اقول اخلصي علي وقولي اللي عندك ولا يكثر !!!!!وش فيه وش صاير ؟؟من اليوم وانا اشوفك انتي واخوك الدلخ تتغامزون ؟!
قلت لها ,بصراحه يمه انا امس لقيت بغرفة اخوي طقم ذهب يجنن حلو مره ومعاه فاتوره بـ1800 ريال سعودي لاغير <-- يلعن اوووم الدقه 
المهم ان امي قامت تضحك تضحك تضحك وانا بوهتي طايره  كذا<----
وبعد ما خلصت ضحك قالت لي ايه ادري <---  وشو ؟؟؟(وجه من غير ملامح من قو الصدمه)
قالت يالعنز هاذا الطقم حق اختك ام تركي امس جابته لي عشان ابيعه لها اذا رحت سوق الذهب وانا اللي حاطته بغرفة اخوك امس يوم اني دخلت اتابع شاعر المليون !!!!!!!!!
ويوم اني صعدت انام نسيته بغرفته ///////// <------------ لقطي بس يالملقوفه 
وقسم احس ان وجهي نزل لسابع ارض سلم على ابليس و تقهوى ورجع <--ابد الجمله مو ملطوشه  
كككككككككككككككككككككككككككككككككككككككككككككككككككككككككككككككككككككككككككككككككككككككككك
هههههههههههههههههههههههههههههههههههههههههههههههههههههههههههههههههههههههههههههههههههه

وهاذي كانت قصتي مع اخوي اللي للمره الثانيه وبجداره على التوالي اللي اظلم فيها اخوي عبودي يالبا قلبه من جد رحمته<---- ارحمي حالك اول يالملقوفه (الشرهه على امي بالرضاع ,ام صالح ,<-- قصمنجيه,هع
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ملاحضه/جميع ما ذكر بالقصه من وحي الخيال ولا يمت للواقع بصله واذا حصل اي تشابه مع ابطال القصه بأشخاص من الواقع فهذا من وحي الصدفه لا اكثر <--- متأثره بالمسلسلات <--- صح عليك يا فجر السعيد هههههههههه

 

ولا اشوف احد ناط لي ويقول تستهبلين وقبايل ومدري وشو وكذا  ... ترا الدعوه مزوح تجي وتروح وكلنا اخوان وكذا وكلنا عيال قريه وكذا <---  محد خايف ابد 

ـــــــــــــــــــــــــــــــــــــــــــــــــــــــــــــ

 see ya

 

 

 



 

 

 

If u save this msg, it means I'm cute .
 If u edit this, I'm still cute  .
If u fwd this, u r spreading that i'm cute 
 if u erase this, u r ' jealous  ' of me cuz i'm cute &

ms_miao_2009 

 

0 التعليقات: