اعلن معنا

رتبتي جنــدي وفي الجيــش السعـــودي



---------- Forwarded message ----------
From: احمد الشمري <amed-999@hotmail.com>
Date: 2010/5/13
Subject: رتبتي جنــدي وفي الجيــش السعـــودي
To: قروب الصحاف <als7af.group@gmail.com>


 

السلام عليكم
 

هاااااااي وعليكم الهاي ادري تبي تقولون يسمع باللغه والتطور ولا يدري وشي

من البدايه يتمليح تسني اشوف عمري مطير بوز ولا يوقع موضوعي الا بالقراشيع

ومن قو الغبنه والتشويت اللي بيجيني ماهوب مراجع باوراقي الا حقوق الانسان

وش سالفته هالولد من بداية الموضوع متحطم

لا تلومنني يالربع انا باقولكم قصتي ووشلون فصلت من الجيش

ولو الولد يبي يعلمنا انه خادم بالسلك العسكري اخرس طيب المهم مالكم بالطويله

ملاحظه/ترى القصه تبي تدقيق شوي وعىل هالتدقيق يبي ينلحس مخك شوي اتمنى قضاء وقتا ممتعا في القراءه

انا من عرفت عمري وحظي مدبر ماهوب شينن فيني والا زود لعانه بالعكس

الا وش حبيلي زيناه اي مره اقول اخرس انت لا عاد تقاطعني يااخوي ماعاد قويت اصبر

على هالتسذب اللي تقول يااخي اهم شي انهم مصدقين ومستانسين ماعليك الا من عمرك انت

اي مره مستانسين تسني اشوف لو اني قدامك تسان مقطعيني بسنونك بس تحملوني شوي

لو انه على شوي ميخالف بس من مواريك انك مطول اخرس طيب

المهم مالكم بالطويله انا ولدت كاي طفل بالعالم يقالك جايبن شي جديد يااخوي خلني اكمل

بلا والله كلامك ولدت كاي طفل بالعالم اخرس طيب المهم وعشت براءة الكفوله بحذافيرها

وكان مالي بالشيطان طاري وكان ابي شديد اي مره ماعليكم منه باكمل تراه يتسذب ياعيال

انت تبي تخليه تعدي على خير والا وشلون طيب المهم تغيرت نظرة ابوي لي ميه وثمانين درجه

يبي يقنعنا ان ابوه يحبه خلاص كمل لا تصجنا طيب المهم تغيرت نظرة ابوي بسبب برنامج

يعرض هلى احدى القنوات الفضائيه وهو برنامج اطفال وهالكلام تقريبا يوم كنت في رابع ابتدائي

كان المذيع يسال اي بزقه عفوا كفل يمر من عنده عن اسمه وهوايته ووش يتمنى يصير بالمستقبل

المهم من قرادتي اني مريت من عند المذيع

المذيع:اسمك ياشاطر

وانا اتمسس عند المكرفون شوي وارد

انا:معاك سعادة الدكتور ابو رجة

ومستانس بعد معك نيننييي ني نيني ني ابو نيني للايضاح هذا اللي ناشبن لي بالموضوع يتهزا بصوتي وانا اتكلم

المهم ماعليكم منه

المذيع:هوايتك

انا:كتابة الذكريات على جدارن المدارس

شوي وابدا اسمع صوت سفتي دريت اني جبت العيد اقتنعتوا ياعيال ان ابوه ماهوب يواديه الاساس ماهوب توه يقلب

يعني لا يلعب عليكم ويقول انه تغيرت النظره عقب اللقاء مع المذيع قلنا اخرس تفهم انت والا لا لا بس ابي اعلمهم لا تعلم احد ابد عض على كبر راسك واسكت طيب

المذيع:وش تمنى انك تصير بالمستقبل؟؟؟؟

انا:والله بالنسبه لي افكر حاليا اني اكمل الابتدائيه ثمن بادخل المهني وباذن الله عقب المهني التقنيه وعقبه باذن الله باتوظف على مهنة سائق في البلديه

يؤيؤيؤيؤيؤيؤيؤيؤ ينعن ام المستقبل اللي تعرفه والله ياانت في ديره ومستقبلك في ديره

قلنا اخرس خل المذيع يكمل اللقاء

المذيع: مشكور اخوي ابو رجه واهنئك على تخطيطك لكن؟؟؟

انا:لكن وشو؟؟؟؟

اتلى علمي بنفسي ان فيه واحد لقطني مع قلاب ثوبي ونطلني في خيشه واسمع صوت مشي

وثنين يسولفون يقولون حتى الكلبشه حسوفتن تحط بيده والله ان يتظاهر المجرمين تحت شعار مابقى الا هالاشكال تكلبش

المهم وانرزح حدود الاسبوع بالتوقيف ولا فكروا يدودوني للاحداث لانهم يوم جو يودوني لقوني

قاعدن العب بلوت واتتن قال اللي يبي يوديني قضينا خله يلعن هنا وعسانا نسلم

المهم انا ابوي جاء وطلعني من التوقيف وهو متلطم ووجه اسود وانا بكل براءة الطفوله قاعدن

اسولف عن اللي صار لي بالتوقيف شوي واباغته بهالسؤال

انا:ابي لماذا لم تاتي لتخرجني من السجن؟؟؟

مسوي لغه فصحى يبي يقنعكم انه سنايدي ومتعلم من شاف مستقبلك درى انك من جنب امه قلنا اخرس للمره الالف طيب

ابوي:والله لو انه علي ياوليدي والله ان مااطلعك ابد لكن الشكوى لله واشوف دمعه نزلت على خد ابوي دريت اني مذنب ذنبا عظيما

ماشاء الله والا دريت انك مذنب اجل اخرس يااخوي وش اللي اخرس رحمتك ابوك هاللي صاح من القهر

انا وابوي نتصافى طيب احلف ان ابوك مافيه ضغط وسكر قلنا اخرس مااقول الا الله يخلف على ابوك بواحد ابرك منك وانا وش فيني وش اللي ماهوب فيك اخرس طيب

المهم وتتوارى الايام والليالي واتخرج من الابتدائي اللي عقب ماتخرجت سجل اسمي بالتامينات

لانه نزل في حقي مرسوم ملكي يقتضي بانه عندما اتخرج نت المتوسطه باذن الله احتمال كبير اني احال للتقاعد

اللي مافهم اللي قلت تو يسال واللي يسال مايتهوشي يقالهم فهموا كل اللي راح اللحين كمل بس

وش دراك انهم مافهموا كمل بس يابن الحلال كمل طيب

المهم عقب ماتخرجت من المتوسطه ويلقطني ابوي ويدخلني الجيش بما ان الجيش الويه متحركه وكل يوم في ديره

يعني باصد عن اهلي صدتن يحبه قلبك لو ادناة الدون يعرسون خواتي في غيابي لانه ماظنيت ان احد يبي يتقدم وانا موجود بهالبيت

بلا والله وجهك هالنحس اللهم طولك ياروح اخرس ترى صبري بدا ينفذ طيب

المهم واشوف ابوي يكلم الضابط وعيوني تلاقط طبعا يعني ولا كاني صاحب الشان

ابوي:المهم ياحضرة الضابط وين بتعينونه

الضابط:مالك هم ياعم دامك جاي من طرف ابو سعد باذن الله ست شهور مدة الدوره وتعيينه بالرياض كانه بعيد الخرج

ابوي: لاااااااااااااااااااااااااااااااااا الله يرحم والديك ابيه يتعين بابعد ديره عني

الضابط:ليه سلامات؟؟؟

ابوي:لا لان الولد مدلعينه انا وامه من يومه صغير ونبيه يعتمد على نفسه شوي اي هين مدلع اقول اخرس مالك دخل

الضابط:يابن الحلال خله قريب حلوك وبعدين الولد توه صغير واذا كبر يبي يبيض وجيهكم ان شاء الله

ابوي مسك الضابط وقال تعال ابيك شوي واشوفهم طلعوا من الغرفه واشوف ابوي قاعد يقنع الضابط شوي واشوف عيون الضابط تقدح شرار

وهو ملتفت يمي واشوف ابوي راح وجاني الضابط وقالي

الضابط:اسمع يابو رجه

انا مقاطعا:الدكتور ابو رجه لو سمحت...

الضابط:لا بعد تقاطعني انت وجهك الظاهر انك ماطمعت اني امسح بك البلاط ترى دورة فرد الاستجداد عندك بالطايف ان شاء الله

وعقبها صاعقه ومظليين في تبوك وعقبها الخ.........عدلي يمكن سبع طعش عشرين دوره والله من زين العدد اقول اخرس ازين منك

اي هين لا تحدى ياورع الا تحداك يالله اجل سولف بدالي ترى ان مسكت المايك باعلمهم السالفه الصدقيه ماهيب خرابيطك ذي

لا خلاص اخرس درو ان ماعندك احد من يوم قلت اذا مسكت المايك اي صح يااخوي انت لحست مخي الا اللي يقرون انلحست مخختهم كل تراب خلني اكمل طيب

المهم واروح لدورة فرد الاستجداد واتبهذل بهذله الله لا يوريكم من يد نشيط ليد نشيط صدق قول الشاعر اللي قال

فرقت الاقدار بيني وبين اوفى خليل
..............واظلم الوادي بعيني ولا عاد به طرب

والله ياانت مال امك دخل بالموضوع انت والشاعر اوووووووه صح نسيت طيب اخرس طيب

صدق قول الشاعر اللي قال

همي اللي كل مايهدا يزودي كل ماقلت انتهى جاله زياده
..........رتبتي جندي وفي الجيش السعودي عسكريا وين انا وين السعاده

المهم بعد مرور اسبوعين تقرر ان عندنا زياره وتشوف اخوياي بالدوره يشدون بساطيرهم ويتقيفون وانا طايرن بالعجه معهم

شوي ويصفوننا بالميدان وكلن يحتري اسمه واللي يسمع اسمه طبعا معناه ان جته زياره المهم

ويعدون اسامي كل اخوياي الا انا وبلحالي والله من زين التعبير اقول كل تبن طيب بسس انا باعلمك ان تعبيرك زفت

طيب وش اقول قل ولقد بقيت وحيدا اخس والله منتب عاقل اثرك تعرف تتكلم زينا اقول كمل لا يقولون تشوت طيب المهم

وانادي احد المدربين قلت يامدرب ابراهيم لو سمحت

ابراهيم:هاه وش تبي

انا:ماجاء ابوي يسال عني والا احد من اهلي

ابراهيم:انت سمعت اسمك مع هالعالم

انا:لا

ابراهيم اجل انثبر في محلك الين تسمع اسمك والا تدري تعال ويوديني بزواية الميدان ويقضبني مكنسه وقال يالله شف شغلك

ابي هالميدان يصير تسنه توه مزفلت فاهم والا لا

انا:ان شاء الله لان هالمدرب تراه ماهوب يروع ابد

المهم وابدا اكنس هالميدان واررد قول الشاعر اللي حرفت في قوله واقول

هنين لكم ياللي بذا الزياره فرحين هنين لكم يالابسين الجديدي
........كلن فرح بالزياره حتى المدربين وانا تحدر دمعتي فوق عيني

المهم انه عدت هالدوره على خير ولا ادري وشلون عدت تحطمت فيها تحطيم واللي زاد قهري ان محد سال عني ولا قال وشفيك

يقال عنده مشاعر الحين اخرس طيب لا تقعد تستعطف الجمهور طيب انت اخرس وماعليك من الجمهور طيب كمل خلنا نشوف

المهم وعقب هالدوره ارسلوني دايركت الى تبوك على اساس دورة الصاعقه والمظليين امحق ليل كمل

لاحول واتعدى دورة الصاعقه بنجاح بلاك حمار مكده يعني عايدي من رزة الدنيا وانت على رجل ماقد ذقت طعم الراحه

يااخوي لاتنكبني امام الجماهير تراي قايلهم اني دلوعة بابا وماما يعني كان في خاطرك شي تبي تقوله خله خلف الكواليس

طيب ميخالف انت على بالك مقنعهم الحين والتوقيف اللي اكلته وانت في رابع ابتدائي وشلون نفسره طيب اخرس انت وتزين الامور طيب كمل

المهم يوم تخرجت واكلم حدا المدربين وطلبت منه طلب وكان المدرب حبيب مره وقال

المدرب:امر يابو رجه؟؟؟

انا:الدكتور ابو رجه لو سمحت والله اني مستحي شوي لكن يااخوي مبطي مامريت اهلي ولا شفتهم وادري انهم مايبون شوفتي بس ودي اكلم اميمتي وابيي بالتلفون

الننون ابو ننه لو ننحت يتهزا بصوتي وشكلي وانا اتكلم ماعليكم منه

قال ميخالف ويمد لي الجوال

انا طو طي طيط طو ططو طي طاط طو اتحداكم هذا رقم امي والا ابوي وابيكم تطلعون كم الرقم

ذي مسابقه الظاهر ماهيب قصه يااخوي قاعدن الطف الاجواء لاكون محبوب لدى الجمهور والله من خفة الدم الزايده بعد اقول يامصلك بعد كمل الله يعدي عنك طيب

ويرد ابوي

يؤيؤيؤيؤ كبيت العشاء دروا اني داقن على ابوي ياااااخوي كمل الله يرحم امك طيب

ويرد ابوي

ابوي:نعم هلا يبه ابشرك اني تخرجت من ..........طوط طوط طوط طوط يااخي هالصوت قد مر علي انه يمر علي باستمرار خاصه

اذا دقيت على ابوي يالهي لقد اغلق المجولاني في خشتي قصدي في وجهي واصرف ام الموضوع قدام المدرب

قلت ماله داعي يدري اني منبوذ الا هالدرجه من ابوي والتفت على المدرب واقوله ماعنده ارسال

المدرب:طيب دق مره ثانيه

لاحول والله الحقنه صز وبصوت واطي طبعا احترام لمشاعر الاخرين ايه واضح كمل تسني اشوف اللي بالاردن سمعوا صوتك اخرس طيب

وادق مرتن ثانيه

ابوي:نعم

انا:هلا يبه طوط طوط طوط واصرف ام الموضوع واقعد اسولف كنه ماصكر الخط وسواليف مادريت الاالجوال يرن وهو باذني

ويبدا يتحمد ربه المدرب على نعمة العقل وقالي

المدرب:طيب دق على امك وكلمها ترى طقة تسبدي من حركاتك الرعنا حلوه الرعنا كمل بس

المهم وادق على امي

امي:نعم

وبدون اي مقدمات قعدت اصيح بالتلفون لاثير شفقتها وعلشان ماتصكها بوجهي المهم وتقعد تدرايني بالتلفون

يعني انت خابرين ان الام تحن على عيالها بليا هالتمثليه اللي سويت طيب دام انك داري وشوله تفضخ قلب اميمك مااقول الا الله يصبر امك عليك يالهيس اندري عاد جت تسذا هي

المهم سواليف انا واميمتي واقولها عن الدورات اللي تعديتها بنجاح وقلت لها اني في دورة مظليين الحين

امي:ياوليدي لا تطب من الطياره ابد

انا:ليه؟؟؟؟؟

امي:ياوليدي تراي محلمتن ان المظله ماهيب منفتحه وانك تبي تجاوب على الارض دايركت وانك تبي تطق ارتواز بالارض

وهالارتواز يبي يطلع منه بترول وانه يبي يسمونه باسمك ياوليدي طالبك اياه طلب انك ماتطب

وعساك بحرج ان طبيت

ياحظي امي تخاف علي اقول كمل ولا يكثر

انا:ان شاء الله يااميمتي مانيب طاب لو كلشن يصير

المهم واصكر التلفون وادخل في المعسكر وتبدا التدريبات على القفز المظلي ويجي اليوم الموعود اللي نبي ننقز فيه من الطياره

وتسمع العسكر يرددون قول الشاعر

والله لاصير مظلي ..........واقفز من الطياره

داري تبي تقولون والله من زين القول مع انه ازين من قصتي طيب دام انك داري وش تحتري الى الحين ماعليك من انا وجمهوري نصلح

المهم يوم طارت الطياره بالسماء واتذكر اغنية بدر غريب يوم يقول

طايره طارت وفيها نور عيني
.....ليتني طيارها والا المساعد

المساعد والا الياي هع هع هع هع ياحمار يقصد بالمساعد مساعد الطيار يالكمخه يااخوي لاتنافخ على مادريت طيب كمل المهم

ان الطياره وصلت للحد اللي نبي ننط منه بالبرشوتات بالعربي المظلات يبدون ينطون اخوياي من الطياره ويوم جاء دوري

وارفض القفز من الطياره ودار بيني وبين الضابط الحوار التالي

الضابط:ابو رجه اسمك ورقمك العسكري واقفز

انا:اي كانت بالعربي انني لا استطيع بالعربي مانيب طاب

الضابط:وليش منتب طاب

انا:ياحضرة الضابط اذكر الله

الضابط:لا اله الا الله حق

انا:ياحضرة الضابط انا امي محلمه ان البرشوت ماينفتح ومحرجتني حرج اني مااطب

الضابط:يااخوي كل هاللي طبوا محلمتن امهاتهم وشفهم يتندحون بالرشوتات الحين يالله بس اترك عنك الخوف وطب

انا:لا والف لااااااااااااا مانيب طاب

الضابط فكر شوي وقال

الضابط:طيب خذ برشوتي وطب وانا باخذ برشوتك وطب واعيي مرة اخرى يااخوي طب اغدي حلم امك يتحقق ونفتك من مصالك اخرس للمره الاخيره علم علم

الضابط:بالامر العسكري يابو رجه خذ برشوتي وباخذ برشوتك وباطب انا وياك وان عييت فانت متهم بعصيان الاوامر العسكريه

وستكون عرضتن للجزاء والمحاكمه العسكريه ويمكن يحكم عليك بالسجن المؤبد والقط برشوته من الروعه واشد حزامي واطب

واعد الين عشره واسحب حبل البرشوت وينفتح وتشوف السعاده تغمرني بشكل لا يوصف الحمد لله الذي لم يتحقق حلم امي

شوي واشوف الضابط شاطفن من عندي يمشي الف ويدور بيننا الحوار التالي

انا:وين ياسعادة الضابط؟؟؟

الضابط:باروح امسح القاع الطيب من اهلك واجي ياكلب واسمع صرخته بدت تبعد

ودججججججججججججج واشوف الغبار وانا بالسماء وبديت اكحكح

تراه نصاب ياعيال هو اللي طاب وتححق حلم امه ودق ارتواز بالارض وطلع البترول

وسمي البير عليه واحتمال انها تفتح جامعه عند البير حقه وتسمى

جامعة ابو رجه للبترول والمعادن وهو معارض يبيهم يضيفون كلمة الدكتور

هذا اللي ماهوب مرسيها على بر عن اذنكم ايها الاعضاء باروح اتفاهم مع ذا واحي

تعاااااااااااااااااااااااااااااااااااااااااال


انقذووووووووووووووووووووووووني من جور الدكتور ايها الاعضاء

اقول يامصلك بعد

اخواني الاعضاء هذه القصه من نسج الخيال

متمنيا ان تحوز على رضاكم

ترى فيها اقتباس بسيط من سالفتن قد سمعته للمعلوميه فقط
والسلام ختــــام
 
اخوكم احمد الشمري
 
amed-999@hotmail.com


0 التعليقات: