اعلن معنا

من علمني عبداً صرت له حرفـاً



---------- Forwarded message ----------
From: احمد الشمري <amed-999@hotmail.com>
Date: 2010/4/30
Subject: من علمني عبداً صرت له حرفـاً
To: قروب الصحاف <als7af.group@gmail.com>


ملحوظة : يوم كتبت ذا الموضوع .. كنت توني مابعد تشرفت بمعرفة نكهة ودعلج .. يعني لحد يتذيهن ويشبه على ابطال القصة تكفون




احب انوه اعضاء القروب والصحاف البيك براسه
 
ان في بعض الاعضاء لقوا مواضيعي في بعض المنتديات ويسألوني عنها
 
احب اقولكم اني انا مسجل في اكثر من منتدى واطرح مواضيعي دايم
 
لي مواضيع قديمة طرحتها في اكثر من منتدى وموقع
 
وبعض المواقع والمنتديات تنقل مواضيعي بدون ذكر اسم المصدر << وش عنده فجر السعيد
 
 
 
ندخل في الموضوع



الذكريات .. بعضها حزينة .. وأليمة .. ولكنها في النهاية .. كلها جميلة
 
 
للأمانة فكرة الموضوع ملطوشة << الاعتراف بالحق فضيلة
 
 ولكن عدلت فيه بما يقارب 40%
 
لقيت موضوع شوي سامج واضفت عليه نكهتي الكوميدية << منت بسيط يا حسن البلام





-1-


أبو ضروس : شاب وسيم يزيد من وسامته عدة ضروس تبرز من شدقيه ,,
ملامحه برئية ,,, اسلوبه في الكلام ابرئ,, ولكنه للأسف العن مخلوق يدب على الارض ,, بس تحس ان الولد توه مادشر .


كبدة : طوله شبر ونص , واملط مابوه شعرة وحدة بجسمه ,, يقول ان موية رديتر طشرت بوجهه علشان تسذا صار املط ,, بس ماخبرنا موية الرديتر تاصل للسيقان ,,الولد مخفة ,, بس طيب



أبو خشم : بثر وتوه بالغ ومسوي في امها داج ,,تحس انه مولود قيصرية بسبة خشمه ,, نصاب من الدرجة الاولى ,, فيه عادة غبية هي انه يحك خشمه كل ماجا يتكلم .







-2-



(( تتحدوني افصخ سروالي ؟؟؟ ))

نطق بها ابو خشم وهو مندفع اندفاعة تامة الملامح بحيث يتوجب عليك التاكد انه سوف يقدم على ماتفوه به ..


لكن ...

هذه ليست البداية .. فدعونا نطمر الى الخلف عدة ياردات ..

الى حيث البداية ..

ثانية رابع ط (( علوم طبيعية )) ,,, فصل من فصول السنة <<< تراه مقطع فكاهي << الا يضحكهم غصب


في هذا الفصل .. اجتمع نفور من الطلاب (( جمع تكسير لنفر )) منهم الي يتوجب عليك غسل يدك منه .. ومنهم من تضعه على جرحك فيبرى << ومازال ينكت

كان من ضمن هؤلاء النفور شخصين(( كبدة .. وابو ضروس )) .. دائماً تجدهم مع بعض ... في المدرسة وغيرو .. اذا رايتهم يخيل اليك انهم .. واحد فاصلة ( كما اسلفت طول كبدة شبر ونص ) ..


واذا رأيت ابو ضروس وابو خشم يخيل اليك انهم واحد ومثلث << ودك يستخير قبل مايشرح

كان كبدة وابو ضورس من الطلاب الذين مايمدي المدرس يخرج من الباب الا قلبوا الفصل سافله عاليه .. او كما قيل ..


عاد في يومن من الايام لم ياتي مدرس اللغة الاقلينزية ( الانجليزية ) والذي كان يحمل وبكل جدارة لقب ( قرقور ) فبدأ نشاط الثنائي اللطيف ..


أبو ضروس : هاه كبدة كيفك اليوم ؟؟؟

كبدة : انطم تكفى

ابو ضروس : افا كبدة وش السالفة ؟؟ << يوسع صدره عليه

كبدة : ياخي ريحنا تكفى انت ماينقالك شي ..


ابوضروس : ( يرسم على وجهه ملامحة براءة تامة ) كبدة حبيبي ترا الي بيني وبينك شي اكبر من الضحك والهبال .. يعني وقت الضحك ضحك ووقت الجد جد .. نسيت ياقلبي حضني الدافي ؟؟ نسيت قبلة الصباح ؟؟ << ابو رايش

كبدة وبعد تردد طويل دام اربع ثواني ( بدا يطير بالعجة ) : ياخوك خويتي تبيني اغنيلها .. وخايف مايعجبها صوتي .. <<<(( تراه ابدن مهوب جواد في بداياته الفنيه ))

ابو ضروس : ( كاتم ضحكة ) وش دعوة كبدة .. قسمن صوتك رهيييييييب (( << قام يتهجد من تسع ونص بالليل علشان ينغفر له ذنب هالكذبة ))

كبدة : (<< وهو متشقق ) فيصل اترك عنك النصب < << يقاله مستحي

ابو ضروس : عمري كذبت عليك ؟؟؟ <<< رافع عيونه لفوق وطلع فوق راسه حلقة ذهبية مصديه

كبدة : ابدن طال عمرك <<< على نياته (( ثور ))


ابو ضروس : المهم قم الحين وخلنا نروح عند طقاقتنا ابو حسن .. خله يضبط الايقاع وانت استلم المايك وتفنن .


كبدة : يلاااااع .. مشينااااع . <<< (( احبع << خخ على وزن احبج .. كيفج ))


وقام الشابين وكل واحد منهم يسحب ثوبه من الخلف بطريقته الخاصه

- 3 -

ذهب الشابين اللطيفين الى ابو حسن .. احد اعضاء احدا الفرق الطقية ( طقاقين ) .. وقد كان نائماً على ماصته ..



كبدة : هي ابو حسن .. قم انت وذا الراس

رفع ابو حسن راسه وهو ينظر الى كبدة نظرة اخترقت اعماق اعماق عقله الباطن ..

فاهتز جسد كبدة من الخوف .. وانتصبت شعيرات حاجبيه << املط ماهنا شعر ينتصب

كبدة : امسح السعبولة الي بوجهك .. عاد وجهك اسود وسعبولة بيضا .. طالع شوكلاطة بالحليب ههههههااااي << يقاله بيطيح الميانه

ابو حسن : اقول ورا ماتظف وجهك ياعقلة المصبع ( اصبع ) وتخلينا ننام .


ابو ضروس يتدخل مونقذن الموقف : لاتشره عليه ياابو حسن .. تعرف كبر بنتك الصغيرة . . بس الله لايهينك ابيك بكلمة راس .


كبدة : هههههاااي عاد راس ابو حسن من كبره يمفع يصير مقر لكلمة الراس الي بينكم هههههههاااي << (( ملحوظة : تراه حوطي - انت يا كبدة - ))


ابو ضروس : ضف ياشنب خلني اكلم الرجال .


يتجه ابو ضروس بكل ثقة وطمأنينة الى ابو حسن .. الذي ارتسمت على وجهه علامة استفهام ..


ابو ضورس : ابو حسن والله اني ارتاحلك .. واحس ان كبدة فاقع قلبك هو وبثارته .

ابوحسن وقد ارتسمت على شفتيه ابتسامة بلهاء : ياخوي من جد فاقع كبدي ولا ودي اطقه .. لاني ماتعودت اطق بنات ههههههههههههههاي << يقاله بيطلع حرته الظريف


ابو ضروس يطلع من جيبه علك اكسترا ويناوله لابو حسن : اقول ابو حسن وش رايك نسوي بكبدة مقلب ماينساه طول عمره ؟ << قليل خاتمه

ابو حسن : أي نوع من المقالب ؟؟ تبي ازبن له حبة مثلن بين دروسه ؟؟ <<< مسوي ذيب

ابو ضروس وقد بلغ منه الغضب مبلغه : اقول انطم يابثر .. هذا الي انت شاطر فيه .. المهم اسمعني ولا يكثر << خربها القوي

انا لعبت على كبدة وقلتله صوتك جنان .. وهو امبسط .. وتشجع اكثر يوم قلت له انك انت الي بتستلم الفرقة ... يعني ابيك طال عمري تستلم الايقاعات .. واختار لك افضل ماصتين ( طاولتين ) .. واقعد قربع فيها .. ابي صوتها يوصل لمكتب المارد ( وكيل من وكلاء المدرسة .. سمي بالمارد بسبب طلعته البهية .. وانسيابيته في المشي .. رغم حجمه الذي يعادل ضعفي طوله )

ابو حسن بلهجة حذرة : طيب وين المقلب .


ابو ضروس يرسم على شفته ابتسامة ( طبعن المخرج يحسبها ابتسامة .. والا هي ضروسه تسذا بدون ابتسام ) : اصبر يابو حسن .. ومالك الا الي يرضيك .. ( يرفع عينيه الى اعلى بحركة ملائكية وتظهر الحلقة المصدية الانف ذكرها ) عمري كذبت عليك ياابو حسن ؟؟


ابو حسن وقد شمله الانفعال : ابدن طال عمرك .



- 4 -


اخذ المارد يقلب الاوراق التي كانت على مكتبه الخاص .. ثم تركها واتجه نظره الى ذاك الكوب .. الذي لم يلبث ان تناوله بيده وارتشف منه رشفة قوية تنم عن لهفة حقيقية للاسترخاء .. ثم استند بظهره على الكرسي رافعاً يده الى اعلى لتصل الى ابعد نقطة يمكنها الوصول اليها معلنتن بذلك وقت الاسترخاء .. تفاعل جسده كله مع هذه الحركة .. لتدخل جميع اعضائه في حالة س ك و و ن ..

لكن للاسف هناك احد الاعضاء لم يتفاعل مع هذه الحالة .. وهو عضون هام .. عضون (( النون وضعت لتفادي الالتباس .. هاي عضو )) يسبب فقدانه الى فقدان احدى الخواس الخمس .. انها الاذن ..
جاهدت الاذن مراراً وتكراراً للدخول في عالم ا ل س ك و و ن .. ولكن هيهات ... هناك صوت ما تلتقطه الاذن ... ارسلت الاذن سيالات عصبية الى المخ الذي بدوره حولها الى صورة وهمية في العقل الباطن ..


تردد المارد في قبول هذه الصورة التي رسمها المخ .. فالمخ رسم صورتين .. صورة لمطرقة حديدة .. وأخرى لمكنسة كهربائية .. حاول المارد ردها الى مخه مرة اخرى .. ولكن المخ اصر على هذه النتيجة .. بل وتعدا ذلك باصداره امرن (( النون وضعت لتفادي الالتباس << ذهين )) لجميع الاعضاء بالوقوف واستكشاف الامر .. فقام المارد وكانه قد صعق بالكهرباء ليخرج من مصباحه .. (( مكتبه )) << من زود ذا الايضاحات حسيت اني مقدم في الاذاعة السعوديه

ويتجه مباشرتن الى الفصل .. 2/4 علوم طبيعية ..


- 5 -


بدأت الحفلة الراقصة في فصل 2/4 .. ابو حسن يطبل (( مطرقة حديدة )) وكبدة يغني (( مكنسة كهربائية )) والباقين يرقصون ..


ضحكة من هنا .. رقصة من هنا .. كرسي يميل .. وطاولة تسقط على اليمين ..
زاد تفاعل كبدة فاخذ شماغاً كان منطولن على الارض .. ولفه على خصره عدة لفات ... وبدأ بهز خصره .. صراحتن .. والحق يقال .. لقد اتقن كبدة الرقص .. حتى ان كل الحضور توقفو ليشاهدوا هذا الشخص الذي بدأ يتمايل يمنة ويسرة ..

في هذه اللحظة فُتح باب الفصل فجأة .. ليظهر من خلفه المارد .. وقد انتصب انتصابته الشهيرة ... تنبه الجميع للمارد الا كبدة الذي واصل الرقص مُنسجمن حتى انه لم ينتبه الى توقف الطق .. حاول ابو خشم ان يشير اليه بخشمه حتى ينتبه الى المارد .. ولكن هيهات ..


المارد : عبدالله وجعععع


قفز عبد الله بكل قوة الى اقرب كرسي وجلس عليه قائلاً : والله مهوب انا .. قسمن انه ابو ضروس .

المارد : هذا وانا شايفك بعيني ... قم ارقص عند جدار مكتبي الين نهاية الدوام .. يالرقاصة ...

خرج كبدة من الفصل مطئطئن راسه ..

ابو ضروس : ترا المساج يفرق سعره

الفصل : ههههههههههههههههههههههههههايليلي

المارد : فيصل انطم وامش اوقف معه ياظريف ..

خرج ابو ضروس بكل طواعية وانقيادية مع المارد .. ليصفا الجو لابو خشم الذي وقف وملء وجهه ابتسامة

ابو خشم : يلا شباب خلونا نكمل رقص ( يحك خشمه )


كفتة : ( وهو عريف الفصل ,, وسمي بكفتة وذلك لقرب لونه من الكفتة ) انثبر مكانك يا ابو خشم لااسجل اسمك . .

ابو خشم (( وهو يتجه الى كرسيه )) : ياخي مالك داعي << يقاله يبي يوقظ روح النخووة والمروءة والشهامة عند كفتة .


كفتة : ( وقد مسك ورقة وقلم ) انطم بس ..


وعاد الهدوء الى هذا المكان ...
مكان يحمل اسم ..
2/4 علوم طبيعية ..


- 6 -


الحصة الاخيرة .. امام مكتب المارد ..

ابو ضروس : هذا الي استفدناه منك انت وخويتك ..

كبدة ( وهو ممبسط لنجاح تجربة الغناء ) : مااحد قالك خلني اغني .. وبعدين بيني وبيننك انا ماتعبت من الوقوف << يبي يقهر ابو ضرس

ابو ضروس : لان ماعندك شنب يثقل عليك يالاملط .. وبعدين انت قريب من مركز الجاذبية يالعملاق هههاي . .

كبدة : اها بس انت وذا الزاوية المنفرجة الي بخشتك . .

طلع عليهم المارد ..


المارد : احم كح كح كح ..

كبدة وابو ضروس : احم كح كح ..


المارد : يلا روحو توضو علشان تصلون .. وبعدين توكلو على الله ..

كبدة وابو ضروس : سم طال عمرك .

وفي دورات المياه .

ابو ضروس : تدري وشلون كبودت قلبي .. انا منيب مصلي .

كبدة : وراه ؟؟
ابو ضروس : علشان يعرفون عيال الكلب يوقفوننا مرة ثانية . << الله من زين التفكير

كبدة : أي والله انك صادق .. انا كل ماصرخ علي ابوي والا نكد علي مااروح اصلي .

ابو ضروس : مشينا اجل دامهم يتوضون ..


وخرج الشابين في امان الله .. دون صلاة ..




فاصل :

يااخواني الصلاة الصلاة وماملكت ايمانكم .. تذكروا ان الصلاة هي عماد الدين .. واول ماينظر من الاعمال يوم القيامة .. فان صلحت صلح ساائر العمل ... وان فسدت فسد سائر العمل وكما هو معروف ان راس الامر هو الاسلام وعماده الصلاة وذروة سنامه الجهاد ,,

طبعاً انا منيب رجل صالح .. ولانيب مطوع .. واكيد لا يخلو سجلي من الذنوب والمعاصي والكبائر .. لكن هذا لايممنع اني اذكركم .. فالتذكير واجب علي زي ماهو واجب على كل مسلم .. ولاهو بشرط ان الواحد ينتظر حتى يصلح نفسه فلو كل واحد انتظر حتى يصلح نفسه وبعدين يذكر . كان مااحد ذكر او نصح .

وجزاكم الله الف خير ..


أقم الصلاة حاذف


<<<<< تفاعل مع الموضوع .. وبدا يتخيل نفسه فوق المنبر وماسك المايك ويهوش عمر ابو راس والمنطعج يومهم يتحرشون بالفلبيني الي جالس قدامهم







- 7 -


في اليوم التالي .. بعد نهاية الفسحة .. وبالتحديد الحصة الرابعة تاخر الطالبين كبدة وابو ضروس في الحضور الى الفصل .. حيث ان الاستاذ عصام ( مدرس الفيزيا .. وهو اردني الجنسية ) كان قد بدأ الدرس ..


كبدة: ياحوووول .. الحين مهوب مدخلنا ذا الحول.. وش السواة ؟؟


ابو ضروس : خلنا نطمر على الباب بقووووة .. عن قولت اننا ماندري انه فيه . . يلا .. واحد اثنين .. اطمرررررررررر



قفز كبدة مندفعن جهة الباب .. واصطدم به بعنف ثم بنط عند قدمي ابو ضروس وهو يتأوه من الالم .. فقام ابو ضروس وفتح له الباب ثم نطله داخل الفصل ليتدحرج الى قدمي الاستاذ عصام .. الذي معط اذنه الى ان اوقفه على قدميه (( عاد ذا الاردني مازال يواصل المعط يتوقعه جالس )) ثم توقف لبرهة ورسم على وجهه ملامح الدهشة .. حينما اكتشف ان كبدة واقف على اطراف اصابعه

فبادره كبدة قائلاً : معليش ياستاد .. والله مادرينا انك فيه ..


الاستاذ : ليش انتو كم واحد ؟؟؟

كبدة : انا و فيص ... فيصل ؟؟ كان معي والله

الاستاذ : امشي اولك ووكف ورا عند الجدار .. ياكداب


اتجه كبدة الى الجدار موطئطئن رأسه كالعادة ..


الفصل : هههههههههههههههههههههههايليلي

ابو خشم وهو يحك خشمه طبعن كالعادة : ياحليله كبدة ههههههااااااااااااااي <<< يحتك


الاستاذ : ياحذاء .. كوم وله وكف معو على الجدار ..

يقف ابو خشم .. ويتجه ناحية كبدة وهو مسرور . << هماي محذركم منه وقايل (ن) لكم انه داج ..


عندها دخل ابو ضروس بكل ادب وحنية .. (( راجع اعلاه بخصوص حركة عيونه .. والشي الذي يطلع فوق راسه ))


الاستاذ : فين كونت اولك ؟؟

ابو ضروس : طال عمرك منيب كاذبن عليك .. انا كنت افطر في المقصف .. وتراي كنت افطر زعتر يالغالي << يسمع بدهن السير


الاستاذ متردداً : طيب ليه تاخرت الله يهديك .. ( يسكت لبرهه وكانه يقلب الامر في راسه .. ينقل بصره بين الطالبين الواقفين وبين هذا الشاب المحترم ... هل يسمح له بالدخول ام لا ) (( اندهن سيره )) ياابني الله يخليك لا تتاخر تاني .. وكف ورا مع زميلك ..

ذهب ابو ضروس باتجاه كبدة وهو يرسم ابتسامة صفراء على خشته ..


ابو ضروس ( يهمس ) : هاه .. اعجبك المقلب ..

كبدة : والله لااردها لك ..

ابو ضروس : خلاص .. تردها بعرسي ان شالله ..

ابو خشم : ليش مهوب ممنوع اصطحاب الاطفال بعرسك ههههههههاااي ( يحك خشمه )


تنبه المدرس الى صوت ضحكة في الخلف ... فالتفت بعصبية : من الحمار الي طلع الصوت ؟؟؟



ابو ضروس وكبدة : ريان ( ابو خشم )

الفصل : ريان <<<< مايطيقون ابو خشم

الاستاذ وهو ينظر الى ريان : ايش السخافة هذي .

ابو ضروس : وش دخلني انا يااستاذ ؟؟ ( مدرس حول )

الاستاذ : انتا مين الي دخلك ؟؟ انا باكلمك الي جمبك .

كبدة : طيب انا وش دخلني ؟؟ <<<< ملكع .

الاستاذ : امشي اتلع بره يلاه .. هو انا قادر اشوفك علشان اكلمك <<<< يذب

ابو ضروس : هي هي عن الغلط .. هو الي كلمك اغلط عليه .. مهوب علي . ( يحلفون ان المدرس تعقد من الحول ضعيف )

الاستاذ : انته من الي كلمك يخرب بيتك <<<< خربت الاخلاق

كبدة : وش الي يخرب بيتي وهو الي يتكلم معك ؟؟ << مازال ملكع


الاستاذ وقد تطاير الشرر من عينيه : يخرب بيتكو كلكو .. وقسم بالذي خلق اني ماراح ادرسكو مرة ثانية .. وشوفو اسالة الاختبار ..


يحمل اوراقه وعدته ( حلوة عده .. صدق من قال كاد المعلم ان يكون سباكا ) ويخرج خارج الفصل الذي اطبق عليه صمتٌ غريب ...

ابو ضروس : ههههههههههههههههههههههههايليليلي

كبدة : ههههههههههههههههههههههههههااااااااي

الفصل : هههههههههههههههههههههههههههههايليلي

ابو خشم يتجه الى كبدة وابو ضروس ليهنئهم على انجازهم .

ابو خشم : كفو والله انت واياه .. والله انكم عيال كلب ( يحك خشمه ) <<<< يقاله يمدح الحين (( زي بعض الناس يومه يمدحني ويقولي حبّاب ))

كبدة : عيال كلب يالكلب <<< عصب

ابو ضروس وهو يقترب من ابو خشم ليفتك به : منهم عيال الكلب .


عندها يتدخل الطلاب لفض النزاع وسط صراخ من كبدة وتهديد من ابو ضروس ...


- 8 -

يوم :الاثنين .. التاريخ : الثالث من يوليو حزيران .. الوقت : مساءاً .. المكان : منزل ابو ضروس ..

قال والد ابو ضروس بكل حنية ووقار لابنه المجتهد : بارك الله فيك ياولدي .. اجل شاري كتاب مساعد في الرياضيات علشان تحضر لدرس بكرة ؟؟ مشالله عليك .. الله لايضرك .. بس تصدق .. يومي صغير .... (( وبدأ الوالد في سرد ذكرياته ))

يوم الثلاثاء .. التاريخ : قبل ثلاث شهور من التاريخ الي فوق (( الثالث من يوليو حزيران )) .. الوقت : مساءا .. المكان : منزل الاستاذ بومة (( مدرس الرياضيات ))

قالت زوجة البومة والتي كانت تنتعل النظارات على عينيها : يازوجي العزيز .. تراك تعبت نفسك ياغلاي ... من اربع شهور وانت تتدرب على ذا الطريقة الحديثة في الشرح والى الحين ماطبقتها

رد عليها زوجها .. ((والذي كان ينتعل احدى النظارات التي تنحدر من سلالة نظارة زوجته )) : ياقلبي .. اذا توفقت ومشى الوضع طبيعي .. فبإذن الله اني بابدا في هالطريقة من اربعه يوليو حزيران .. يعني تصوري ياقلبي فرحة الطلاب بهالطريقة الي راح تخليهم هم الي يستنتجون .. خليني اعلمك الطريقة ياقلبي (( يعدل جلسته ويقترب من زوجته الى ان تتلامس مناظيرهم )) اول شي ارسم الهرم وبعدي ..
قاطعته مكملة : وبعدين تنتظر الطلاب يستنتجون نوعه ومسماه .. قلت لي ياقلبي الف مرة بس يلا .. الله يوفقك يالغلا ..


- 9 -

حضرالاستاذ بومة (( مدرس الرياضيات )) الي الفصل في الساعه الخامسة والنصف من صباح يوم الثلاثا الرابع من يوليو حزيران .. ومكث يتخيل شكله وهو يشرح للطلاب بالاسلوب الجديد والذي اعده خصيصاً لهذا الدرس ... وهو في خضم تخيلاته اذ اندفع الطلاب كجيش جرار الى الفصل لينتفض البومة ويبدأ بمقدمة الدرس ... : اليوم عندنا درس جديد (( اجل قديم ؟؟ << عسى ماشر )) عدنا- قال الاستاذ بومة : اليوم عندنا درس جديد (( اجل قديم ؟؟ << بيتشوت )) وهو عن شكل هندسي (( اجل قديم << لا للمخدرات )) المهم >> وهو عن شكل هندسي يسمى بال ...
قاطعه صوت من آخر الصف : الهرم ... التفت الجميع الى مصدر الصوت .. والذي كان واضحاً انه طالب كان قد شرا كتاب مساعد وحضر الدرس في منزله قبل ان يأتي الى المدرسة ...هل عرفتم من هو ؟ نعم انه ابو ضروس ...
تجاهل البومة مداخلة ابو ضروس واستدار الى الطلاب ليكمل لهم الشرح ... : شكلنا يسمى بالهرم .. وشوف نتعرف على انواعه فإلى هناك ..
استدارالبومة وبدأ برسم شكل هندسي على السبورة .. وبعد الانتهاء من الرسم التفت الى الطلاب و....
هرم ثلاثي .. نطق بها ابو ضروس وهو يضع الكتاب المساعد على فخذيه .. اسفل الماصه ..
اكفهر وجه البومة وكاد ينفجر من الغضب .. ولكنه استعاذ من الشيطان (( طبعاً نص الفصل اختفى يوم تعوذ )) وتابع قائلاً : احسنت يافيصل .. يسمى هرم ثلاثي . ثم استدار الى السبورة وبدأ برسم شكل اخر ..
هرم رباعي ..نطق بها ابو ضروس وهو يضع الكتاب المساعد على فخذيه .. اسفل الماصه ..
..
تطاير الشرار من عيني الاستاذ بومة وهو يعض الى اسنانه وبقوة في محاولة يائسة منه للتغلب على عصبيته و .. خرج خارج الفصل ليذهب الي دورة المياه ويبدأ في الصراخ محاولاً طرد تلك العصبية اللعينه المستقره في نفسه ...
عاد بومة الى الفصل وهو يعدل نظارته مبتسماً .. وكأن شيئاً لم يكن ... وشرع في رسم شكل ثالث على السبورة ..
هرم خماسي .. التفت البومة الى مصدر الصوت و ... هرم سنجابي يا ( .....) ثم انفجر انفجار شخص كان يكافح لمدة سبع شهور ليبتدع طريقة شرح جديده

ذهب كلن في حال سبيله : فأحدهم تم ارساله الى مستشفى الشميسي لتعرضه لكسور مضاعفه في انحاء متفرقة في جسمه ... والاخر تم تحويله لشرطة الديرة بتهمة الاعتداء على احد الطلاب



- 10 -


قرع جرس المدرسة معلنن نهاية فسحة يوم الاربعا الخامس من آذار الثاني .. فاتجه الطلاب الى فصولهم كالعادة .. وفي فصل 2/4 كان هناك شخص متلثم .. ومن خلف شماغه .. وتحديداً عند منطقة الانف .. كان هناك برووووز كبير جدن .. اتجه هذا الشاب الا منتصف الفصل وقام بكسر زجاجة صغيرة .. لتنبعث في المكان رائحة كريهه جداً .. اقرب ماتكون الى رائحة الصرف الصحي (( اعزكم الله )) .. بدأ هذا البروز الضخم بالتحرك صعوداً ونزولاً كعلامة للضحك الخبيث .. ثم خرج هذا الفتى . تاركن خلفه مفاجأة كبيرة للطلاب ...




حضر الاستاذ بومة الى فصل 2/4 ليعطيهم حصة الرياضيات .. فتفاجأ بالمنظر .. كان جميع الطلاب قد خرجوا من الفصل ... وكلهم طاقين اللثم .. لم يتلفت اليهم .. ودلف الى الفصل مسرعا ً <<<< مسوي ذيب

و .... افففففففففففففففففففف . . وش هاااذي الريحة وججعععع ..

الطلاب : كح كح كح كح .. مانبي درس يااستاذ ..

البومة : اسكتو عمى ..

عند بداية الممر كان يقف المارد مندهشاً .. تقدم اليهم وليستفسر .. فاخبروه بالسالفة .. فقال : روحو ادرسو في المسجد .. فيه سبورة هناك ..

البومة : يلا ياشباب .. وراي للمسجد ..



تبع الطلاب مدرسهم الى المسجد .. وجلسوا في الصفوف الاولى (( يسمعون بخير الصفوف اولها )) .. وبدأ المدرس استعداده للشرح ...


اللللللللله اكبر ...

اللله اكبر ..

!!!!!!!!!!!!!!!!!!!!!!!!!؟؟؟؟؟؟؟؟


التفت الجميع الى مصدر الصوت ... فتفاجأو بان كبدة وابو ضروس هما المتسببين .. وقد بدأو بالصلاة ....


انتظر المدرس حتى فراغ الشابين من الصلاة ..


المدرس : خير ان شالله .. وش فيكم ؟؟؟

ابو ضروس : تحية المسجد طال عمرك ..

الفصل : هههههههههههههههههههههايليلي

المدرس : وتحية المسجد تصلى جماعة ؟؟ (( الله من الدجة بذا الاثنين )) انقلع انت واياه .. والله ماتدخلون الفصل مرة ثانية الا بولي امركم ..


كبدة : طيب حنا في مسجد الحين .. ممكن ندخل ؟ <<<< ملكع

الفصل : هههههههههههههههههههههايليلي <<< على الريحة

المدرس وقد بلغ الغضب اشده : انقلع ياسنجاب .. وابو ذيل ..

ابو ضروس : هههههههايليلي ياابو ذيل <<< يكلم كبدة

المدرس : انقلعووووووو يا (....)

خرج الشابين من الفصل ... وشطفو مكتب الوكيل .. الذي استوقفهم مستفسراً عن امرهم ..

ابو ضروس : رايحين نجيب دفاترنا من الفصل .. (( هالمرة قام يتعصر ساعه يبي الدويرة الذهبية تطلع فوق راسه .. بس ماحولك احد ))

كبدة : ايه صح ..

ينظر اليهما المارد نظرة شك .. ثم : مرو علي بعد ماتاخذون الدفاتر ...


كبدة : خلاص طال عمرك هونا مناب ماخذنينها ..

ابو ضروس وهو يلكز كبدة على صدره : الا بنروح ناخذها ..

المارد وقد تبين له كذبهما : انطم انت واياه .. وخلكم واقفين هنا الى نهاية الدوام ياحلوين ..

وكالعادة .. وقف الشابين دون نقاش .. وكالعادتي ايضن لم يصلوا ...



- 11 -


خرج مدرس اللغة العربية .. بعد حصة مملة .. وجاء دور قرقور الذي كان يبدع ويتفنن في الغياب .. (( مهوب بكيفه طبعن.. لان وزارة المعارف الله يطول بعمرها مسلمته مدرستين يدرس فيها .. وحدة في الناصرية ووحدة في الروضة .. فلله درك ياوزارتنا الحبيبة .. كيف اكرمتي ابنائك المدرسين )) << الموضوع مكتوب من ايام وزارة المعارف .. وقبل مايضاف الصفر للجوالات


كالعادة .. اتجه مجموعة من الطلاب الي مكان جلوس كبدة وابو ضروس لكي يدردشو معهم ... وفجأة ..


(( تتحدوني افصخ سروالي ؟؟))


نطق بها ابو خشم وهو مندفع اندفاعة تامة الملامح بحيث يتوجب عليك التاكد انه سوف يقدم على ماتفوه به ..


تبادال الطلاب النظرات ..

ابو ضروس : وش تبي بالله يالبثر ؟؟

كبدة : تبي تعلمنا ان فخوذك مشعره هههههههههاااي

ابو ضروس وهو يغمز لكبدة : احم .. الي فخذه املط .. لايرمي الناس بالشعر ههههههههايلي ..


المجموعة : هههههههههههههها .....



قطعت تلك الحركة المفاجأة ضحكة المجموعة .. فقد فصخ ابو خشم سرواله .. ( سروال السنة .. وفي رواية السروال الطويل .. لان بعض الناس يسمون السروال الداخلي سروال سنة .. والمعنى في بطن روما )


عندها دخل مشرف الغياب الى الفصل ... فقفز كُلن الى مكانه ...

المشرف : فيه احد غايب .

كبدة : لا فيه احد مفصخ صرواله ( سروال )


الفصل : هههههههههههههههههايليليلي


المشرف : وش تقول ياعبد الله ..


كبدة وهو يرفع بيده سروال ابو خشم من الارض : هههاااي هذا سروال واحد من العيال ...


المشرف : هذا سروالك ياعبد الله ؟؟


كبدة : لا هذا سروال ريان .. توه فصخه علينا .. هههههههاي

الفصل : ههههههههههههههههايليلي ..


المشرف : قم انت واياه ياقليلن الحيا ..


يدخل المشرف الى مكتب المارد .. ويشرح له السالفة بايجاز .. وخارج المكتب كبدة وابو خشم ينتظرون ..

ابو خشم : تكفى ياابو عابد قل للوكيل اني كنت في الحمام وامتلا سروالي مويه .. وفصخته ..

كبدة : اوتسي .

المارد من داخل المكتب : ادخل ياعبدالله انت وريان ..

المارد : وش السالفة ؟؟


ابو خشم : والله يااستاذ كنت في الحمام وامتلا سروالي موية وفصخته .. وحطيته في الفصل .. وجا البثر عبد الله وعطاه للمشرف ..

كبدة : انا بثر يالنصاب ؟؟

ابو خشم وقد سرت في جسده رعشة خوف : لا ياخوي امزح معك ..

المارد : انطم انت واياه .. عبد الله تعرف الي يكذب وش يصير له ؟؟ و ... (( بدأ المارد يرد الايات والاحاديث لكبدة الذي انتفض جسده خوفاً من الله و .. ))

كبدة : والله طال عمرك طمر علينا فجاءة وانا نسولف وقال تتحدوني افصخ سروالي .. والمشكلة مااحد رد عليه .. وفصخ .. <<<< خربها


ابو خشم : والله كذاب .. اسال العيال الي بالفصل ..

المارد : من الي شاف السالفة يا عبد الله .

كبدة : فيصل كان موجود .

المارد : رح ناده .. وانتظر ياريان برى المكتب ..


وعند الفصل ..

كبدة : هي ابو ضرس .

ابو ضروس : هاه؟؟

كبدة : امش .. ريان ورطك يقول انك انت الي فجرت الريحة ذاك اليوم في الفصل ..


ابو ضرس : صدددددددددق؟؟؟؟


كبدة : أي والله .. ويبيك الوكيل الحين <<<< الله من زود الايمان راحت كل احاديث المارد

ذهب الطالبان الى مكتب الوكيل .. والتقيا بابوخشم عند الباب ..

ابو خشم : الله جابك ياابو ضروس ..

ابو ضروس : ابو ضروس ؟؟؟ تلاحظ انك مطيح الميانة شوي يالحبيب ؟؟

ابو خشم : يارجال وسع صدرك واركب سدرك .<<< زاحف الولد .. المهم ابو ضرس تكفى باعلمك وش تقول للمارد .. اوكيه

كبدة : خلاص علمته بكل شي ..

ابو خشم : تسلم والله يالاملط .. والله انك رهيب << < ماش الله يخلف على اللسان


طق طق

المارد : ادخلو ..


ابو ضروس : هلا استاذ ابراهيم ..

المارد : وش الي صاير في الفصل ..

ابو ضروس وهو يلقي نظرة خاطفة على ابو خشم : والله طال عمرك .. جانا ريان وقال تتحدوني افصخ سروالي .. ماعطيناه وجه .. وفصخه .. وسلامتكم

ابو خشم : قسم بالله نصاب .. بس لان عبد الله خويه ..

المارد : ريان شوف رح جبلي خمس طلاب من الفصل .. وخلهم يشهدون على الي صار .. اوكي

ابو خشم : اوكي ..

طمر الذيب الى الفصل وهو يعدد خمسة اسامي في ذهنه ..

ابو خشم : هي ابو حسن تعال انت .. وانت يالفقمة .. محمد امش .. شيبوب اطمر .. امممممم من بعد .. فستق تعال الله لايهينك .. (( افتح ياسمسم مهوص فصل ))

خرج الطلاب الى ابو خشم متسائلين ..


ابو خشم : شوفو .. قولو للوكيل اني فصخت سروالي في الحمام .. واني جيتكم الفصل بدون سروال ... وتكفون كلكم جمعو اقوالكم .. موب نوصل هناك الا كل واحد قايل سالفة ..

الطلاب : عولم ..


عندما وصل الفرسان الستة الى مكتب الوكيل استدعا الوكيل الخمسة طلاب الذين احضرهم ابو خشم ... وامر الباقين بالخروج ..


وفي مكتب الوكيل .. تم الامر كما اراد ابو خشم من ناحية عدم اختلاف الاقوال ... حيث انهم جميعن اتفقو على ان ريان هو الذي اتى الى كبدة وابو ضروس وتحداهم بان يفصخ هو سرواله ...


الماارد : رياااان ياكذاب ادخل عندي المكتب .. وانتو يالباقين ارجعو فصلكم .....


اتجه الطلاب الى الفصل .. ودخل خمستن منهم ... وبقي اثنين في خارج الفصل ...


ابو ضروس وقد شبك يده بيد كبدة : الاتحاد قوة .

كبدة : الاتحاد قوة ...

وتعاهدو على ان لايفرق بينهم الا الموت ... ثم دخلو فصلهم امنين مطمئنين ...

(( الخاتمة ))


انتهت الاختبارات النهائية منذو اسبوع ... واليوم ياتي الطلاب لكي يحصدو ماقد زرعوه طوال العام الدراسي ... ابو ضروس كالعادة متفوق .. كبدة ايضاً كالعادة .. يحمل خمس مواد ..

اتجه الطالبين الى مكتب المارد لكي يلقو عليه تحية الصباح .. لكنهم لم يجدوه .. دخلو الى المكتب .. فوجودو اوراقن كثيرة قد رميت في سلة المهملات .. التقط كبدة احد تلك الاوراق .. و ...

كبدة : هههههههههههههههههههههههههههههههههههههههههههههههههه ههههههههههااااي


ابو ضروس ياخذ الورقة منه متعجباً

ابو ضروس : هههههههههههههههههههههههههههههههههههههههههههههههههه ههههايليلي


يرمون الورقة في الممر .. ويشبكون ايديهم مع بعضها ويخرجون من المدرسة استعداداً لبدء اجازة سعيدة ...... تاركين خلفهم على الممر .. ورقة كتب عليها ....


بسم الله الرحمن الرحيم


انا الطالب ريان ......

اتعهد بعدم فصخ سروالي في الفصل مرة اخرى ...





(( النهاية ))




ملحوظة : الرجاء قراءة الملحوظة الواردة في اول الموضوع << محلوف عليه يحط ملاحظيتن
 
 
للملاحظات
amed-999@hotmail.com



Hotmail: خدمة بريد إلكتروني مجانية وموثوق بها وغنية. اشترك الآن.

0 التعليقات: