اعلن معنا

خنبقيشن 3 / خذ نسختك ومشّ خشمك بها



---------- Forwarded message ----------
From: مدمن شاهي <samio_404@hotmail.com>
Date: 2010/6/1
Subject: خنبقيشن 3 / خذ نسختك ومشّ خشمك بها
To: als7af.group@gmail.com




 

مسائكم يجيب الهمّ لنظام ساهر 

شيكت اليوم على رصيدي من القسايم بموقع وزارة الداخلية ولقيتهم راصين علي مخالفتين .. والمبلغ المطلوب 800 ريال عليها مغّاطن طويل .. ياتدفع ياندبّل .. ياتعجّل علينا يانعجّل عليك .!
تذكرت ذاك المثل اللي يقول : يدن ماتقواها صافحها . لذلك أنا أمدّ يدي الشمال لنظام ساهر واقول : الله لايحللكم والا يبحيكم بهاللي تبون تاخذونه مني . لأني اخبر أمي قبل تسع شهور ونصف بالضبط كانت تقول لي وانا وياها رايحين لعمتي هيا : يازين سواقتك ليت ابوك ياخذك منك شوي .
رخصتي وش زينها . لافها ببلاستيك من زود الحرص . استمارتي تلقّ ماعليها باس . وسيارتي ماتتحرك إلا على رجلي وماتتقدم إلا لين احرك القير باصبع يدي اليمين ذاك المنتفخ .. وآخرتها علي قسيمتين .


 

قبل ثلاث أيام دخّلت سيارتي الورشة يسوون لها صيانه وركبت لموزين وانا راجع وسألته بالطريق . نظام ساهر كلب ( وجه يمهّد للسالفه معه ) . قال ايوه كلب ومافيه كويّس .
سألته لأن هالنمونه أخبر الناس بعلوم القسايم . ليش أنا 800 ريال وهذا قسيمه كلو مكان 300 ريال . قال وهو يضحك : إنتا مرة سوي طلب عصير خلاط ومرة ثانية سوي طلب عصير كبس

يذب الحقير يقاله ( ربيع ) اللي بجريدة الرياض وهو يتهزّا بالهيئة !


 

.


 

خنبقيشن 3


 

عقب طلعت الروح طلع هالموضوع . ادعو للفيروسات لأنهم ماخلوني بحالي . آذوني بنفسي وإيميلي ورسايلي الخاصة حتى وصل الإيذاء إلى الإتصال على اختي البكر وتهديدها : ياينزّل أخوك موضوع خنبقيشن ويصير رجال والا يصير رجال وماينزّل الموضوع !
الفيروسات هذولي حقنه . أفكر اعطيهم وكالة عني عن عمي ناصر عن ابوه عبدالله عن إمام المسجد ابو معاذ في أرض مطالبة لأرض مملوكة للدولة وودنا ناخذ عليها بناء مفتوح ونبني عليها مشغل نسائي فيه حمام مغربي عشان ناخذ أجر بناتنا ونخلي ركبهم بيض
 


 

على طاري المشاغل . يالبيه ياهالفكرة التجارية . 90 خدمة بـ 160 ريال وإذا جات الحرمه تسأل عن هالتسعين خدمة قالو لها بنشيل الشبّاصه عنك خدمة وبنفلّ شعرك هذي خدمتن ثانية وخذي ياهيك حكي على هالبنيّات اللي يمشي عليهم الكلام زي اللوز . تذكرت قريبة لي كل اسبوع تروح للمشغل تزيّن عمرها لرجلها وبالأخير طلع بوجهها نفر كبر الحصا عند عيونها وصارت يالله انك لاتبلانا كنها ( كرتون فقع ) توه جاي طازه من السوق .
لذلك ياحريم لاتصدقون كل ماينقال بالمشاغل وعروضهم اللي كاتبينه على باب مدخلهم . افردي شعرك لفيه وقصيه وغير هالثلاث اشياء فعندك محلات التجميل خذي لك منها المقسوم ولايكثر ( وجه قفلت معه
 
 


 

وعلى طاري القفل جعلي أقفل على أختي مع رجلها سبع سنين بغرفة 7 أمتار بمترين لين يملّون من بعضهم ونرتاح ونفتك من مسألة : يقول لي أمس بالليل ودي نخلي غرفة النوم حمرا وانا بصراحه من هاللون استاحش !
ومشكلة اللي يكلم زوجته قبل يدخل عليها يصير يكذب بالدقيقة تسعين مرة بالتلفون . وبالدقيقة الثانية يفضح نفسه لأنه نسى الكذبه الأولى هههههههههههههه
الحب عذاب والزواج زين بس مشكلته أن بوفية مطعم عمو حمزة مايتوصّون بورق العنب بعزيمة الحريم برابع أسبوع من الزواج .


 

باللهِ عليكم قد شفتو بنت تقول لامها قبل الزواج : هو اني آكل الحبوب بدري والا اصبر عليها !
هذا جيل البنات التالي . والا أول البنت ماتدري عنها أمها أنها حملت إلا قبل ماتولد باسبوع ههههههههههههههه


 

جيل بنات تعبان بصراحه والمفروض يقطعون عنهم النت وأي بنت تدخل موقع عالم الحياة الزوجية المفروض تقطع رقبتها وتحرم من أندومي الخضار شهرين !
وعلى طاري الشهور : ترى عرس اختي قريب والجميع معزوم وترى مافيه بطايق للحريم . حنا ناس مانتشدد وربي ارزقني وارزق غيري ههههههههههههههههه


 

الحب عذاب . يكفي انه قطّع قلوب البعارين ومصّع شحوم التباسي .
الحب ماله من العلم ماخوذ .. أجل حمد ولد خالتي يحب !
ماقد خبرت ان واحدن له خنفره يحب إلا ذاك المغني اللي قد مرة التقو به بروتانا وسأله المذيع ليش خنفرتك كبيره . قال : ان امي قد وطت خشمي وانا بالمهاد لافتني وصار الخشم مثل الخد متواسي .
ازين شي بالحب أنه سهل ممتنع . يقدر الواحد يحب مليون نفر بس " التسذب " وارد لأن الحب والقلب لشخص واحد مش لتنين .


 

قبل سبع دقايق ونصّ كنت اسمع الرادو على قناة إذاعة الرياض اللي كل صباح تُشنّف آذاننا الناشفه بصوت : إبراهيم ابو شراره وهو يعدد لنا كم حادث حصل بالرياض .. الرقم مايتغير كل يوم .. 34 حادث وتم التعامل مع 12 وجاري متابعة باقي الحالات .
طيب يعني ماعندكم سيارات مرور ؟ والا البنزين غالي ؟
والا خبرني ياسعادة ( المذيع ) عن الشوارع المرتصّه بالزحمه ليش ماتشوفون لها حلّ بدال نظام ساهر اللي آكل ماورانا ودوننا ( يالييييل هالنظام اللي عطوه قسيمتين وازعجنا ههههههههه )
كانت المداخله من بنت إسمها ريم .. دايم اللي اسمها ريم اتخيلها عصلا مصلا على خدها شامتن سودا مسويه فيها زحمه عند الناس ان هذي هي حبة الخال اللي تزيّن الوجه . وش جاب الشامه لحبة الخال ياريم ههههههههه


 

تقول ريم : السلام عليكم . ابغى اتداخل بالموضوع لو سمحت . صوتي واضح ؟ ( صوت اخوانها عندها يلعبون تركيبه ومسوين قلق بالغرفة ) . ابغى اقول اني انا خريجة أصول دين من جامعة الإمام اللي بالملز ولي سنة ماتوظفت وابي اتوظف . شكراً لهالبرنامج اللي عطانا فرصة نفضفض !
الشاب مالقى وظيفة من أربع سنين وهو خريج كلية عليها طلب وهذي متخرجة من سنة ومن كلية أزين مافيها أنها قريبة من عند بوابة الخروج وباصاتهم مكيّفة وجايه تقول ( أبي افضفض ) ههههههههههه . جعلك للفضيض اللي يفضخ عقيلك ياللي شعرك كنه لقاح نخلة برحي
 

غازي القصيبي قالها مليون مرة : عندنا فلوس بس ماعندنا وظايف . واللي يبي الفلوس يتوظّف !
يعني اللي ماعنده فيري بالليمون يشريه ويفركه بيدينه لين ينقّط من تحت وتصير يده صفرا ،
 

القصيبي يبي له فتوى سريع سريع بوجوب توظيف الشباب العاطل والبنات العُزّل عشان يقوم من كرسيّه ويجود علينا بالمقسوم .


 

القصيبي يحب العلم والعلماء ودايم يسمع لهم وأكبر دليل أنه شاربن كاسين حليب من صدر قريبه له يحب بنتها ويتطلّع لشوفتها بين الحين والآخر !!


 

من شقتي المصونه . من الشرقية اللي هواها ريح وحرّها يقطع المصير وبحرها ينشف مع أذان المغرب . أحب اقول لكم تقهوو معي ؟
تصدقون مدخّل الدافور والدلّه للشقة بالخفيه لأن الغاز سريع الإنفجار بأي لحظة .


 

،


 

يذكرني بمدمن : يمكن ينفجر باي لحظة ويحب ثم يندم !


 

كل عام وانتم ترضعون زين . وفالكم خنبقه رابعه من ديرة إسمها ( الأحساء ) عقب شهر ونص بحول الله .. والله يردني للرياض عقب اسبوع سالم ،
 


 

تلحّفو زين
 
 

www.coalles.com


،





0 التعليقات: