اعلن معنا

رقمـي اكـوس رقـم



---------- Forwarded message ----------
From: CoNnEcT  <connect-8@hotmail.com>
Date: 2010/6/6
Subject: رقمـي اكـوس رقـم
To: als7af group <als7af.group@gmail.com>


صبااااح الخير جميعاً

كيفكم يا بتاتيع ويا بتتاعات 

ان شاء الله الكل كويسون و كويسات .. شبابين وبناتات  

فيما مضى من ايام < من اولها فلسفه 

 قررت انا المدعو اني اتطور مع المتطورين واصير مميز < لاعادها الله من فكرهـ

 وهذي سالفتي مع فكرة التميز

اخليكم مع السالفه و عسى تكون عضه وعبرهـ لمن تسول نفسه يسوي سواتي

 ..................

في يوم من ليالي صيف 2007  في الرياض< يعني يقال ان عندهم اربع فصول:d:

يا حر يا برد .. وان نزل مطر غرقنا < اللهم لا اعتراض

   جالسين انا و الشباب في مخيمنا العامر بالخيرات

جبنه كيري .. جبنه كرفت .. جبنه بوك .. جبنه مراعي

:d:< مربين بقره جنب المخيم

المهم

و اخذ الحديث يدور دورانن < تذكر ايميل المحشش و القاضي

حول التميز و ماله و ما عليه < قلبو المخيم مجلس الشورى

بدا كل واحد يهايط برقمه وانه اطلق رقم مر على تاريخ السعوديه

 الموضوع ماكان يشدني لاني كنت ماخذ فكرة رقم الجوال انه الو ويرسل مسجات بس < عملي جداً

   كنت مطلع رقم من موبايلي كنت مسميه ( صعب المنال ) لانه مستحيل احد هالبشر يحفظه:d:

و في غمرة السواليف < غمرهـ

قال احد المهايطيه  يا شباب رقم خطييير للبيع لايفوتكم

كل المهايطيه قامو وبصوت واحد شريت شريت شريت

وين ارقامكم الخقق اللي تو تتكلمون عنها ؟

يعني المسأله طلعت مرض نفسي .. كل ما شاف رقم شراهـ وجمع بهالشرايح

طيب وش الفايده 

ما علينا

اليوم اللي بعده قدر الله على بالمقادير ويطيح الجوال من يدي في المويه و يدخل في غيبوبه

يمين يسار

محاولات انعاش وتنفس صناعي

برضو ماااش

الفقيد انتقل الى مثواه الاخير 

 و اخذ معاه بالطريق الشريحه اللي ما حفظت ارقامها من شريتها

حسبي الله عليه الله يرحمه < :d:

....

الجوال وراح و الرقم وراح .. يا غلبي يا انا

قررت انزل واشتري لي جوال موحترم من ابوكاميرتين عشان لابغيت اشخص < تفكير سليم

شرينا الجوال و بقى الشريحه .. لازم شريحه < يا شيخ

واطلع من الصباح الباكر للانفصالات السعوديه و نويت اني اطلع رقم مميز اهايط فيه شوي مثلهم

 اشوف الارقام واختار لي رقم اسهل من اسمي < يعني يقال من زود التميز:d:

 المراد ان سالفة الجوال و الشريحه سببت لي ازمه ماليه بذاك الشهر .. لكن ما عليه

جوال جديد ورقم مميز ..  وعييييييش يا عم

....

و اروح في ليلتها للمخيم و ناوي اهايط بقوه < اطلع حرتي من هياطهم

وادخل بالجوال في يدي و كاشخ فيه كشخه العالمينا

وانواع التباريك و يعطيك خيره ويكفيك شره <ذا العالم اللي ما تعرف تهني

 .....

و سواليف ويمر الليل وتدق الساعه 12 .. مع العلم ان مافيه ساعه اساساً :d:

ويدق جوالي .. < اووم التميز اللي كذا يدقون عليك العالم وانت باقي ماعطيتهم رقمك

وارد

الا بصوت بناتي فوشي على وردي

كونكت : هلا

؟؟ : مساء الخير

كونكت : مساء النور

؟؟ : مين معاي ؟

كونكت : انتي اللي متصله

؟؟ : انت عبدالله ؟

كونكت : لا غلطانه

؟؟ : طيب اسفه ع الازعاج

طوط طوط طوط

....

 وارجع اتابع المباره اللي كانت مدري بين مين و مين .. بس المهم لعبهم حلو

نص ساعه ويدق الجوال

..

كونكت : الو < بدون نفس ضيع علي الهجمه

و صوت بناتي اخر .. بس مدري هالمره وش اللون:d:

؟؟ : الووو مراااحب

كونكت : هلا .. من ؟

؟؟ : يؤ يؤ ما عرفتني عبودي ؟

كونكت : غلطانه مهب رقم اللي تدورين عليه

؟؟ : لااااااا انت تصرفني ؟

كونكت : اصرفك !! 

؟؟ : طيب عطني عبودي

كونكت : قلت لك غلطانه 

؟؟ : لااااااا لايكون غير الرقم .. < يا كثر الـ لا  عندها هالنشبه

طيب ما تعرف رقمه الجديد ؟

كونكت : ما اعرفه عشان اعرف رقمه

؟؟ : امااااااانه ما تعرفه ؟ < يالله لاتشغلنا

كونكت : شكلك ما سمعتي وش قلت

؟؟ : طيب انا اسفه شكلي ازعجتك < يقال ذوق

كونكت : حصل خير

وطووط طووط طوووط

........

بدت تساورني الشكوك < تساورني

ان الرقم مستعمل من قبل و انلغى من شخص مغازلجي ورجعو عرضوه للبيع

لكن قلت اصبر يمكن تشابه ارقام .. يمكن غلطانين .. يمكن و يمكن

نمت ليلتها وقمت الصبح و انقز على جوالي الجديد اتصبح بوجهه  < يحق له حاط فيه 1600 ريال

الا و الاقي 10 مكالمات لم يرد عليها

واشكال و الوان الارقام

بدا الشك يزيد لكن هالمره شكيت ان الرقم كان مع معقب بالجوازات:d:

على طاري الجوازات باركو لي  جددت الجواز

مر هذاك اليوم و الجوال  من رقم لرقم  يرن رن رن ويا قلب لاتحزن

اسبوع .. اسبوعين.. ثلاثه .. 

وصابرن صبر ايووب

يمكن يخلصون معارف هالادمي ويعرفون ان الرقم مع غيرهـ

انواع البشر يدقون .. وناس بثره وناس محترمه وناس ما تدري وش يبون من الحياة

انقلب رقمي مجمع للبشر

 حتى هندي حلاق يدق علي يقول فين فلوس انا ابدوالله يا هرامي 

وكل من دق من المعارف علي يقول يا اخي خطك ليه دااايم بزي او ويتنق

واشرح قصتي لفلان و علان .. عشان العالم مايفهمون غلط!

خبركم ربعنا من يدق ويلاقيه بزي و الا ويتنق

قال بس قاعد يغازل :d:

لعنبو من يغازل 24 ساعه في اليوم

....

كل الاتصالات اللي جتني كووم و اتصال عجيز كووم ثاني

ترن ترن ترن < تلفون قرص

كونكت : الووو < من كثر ما قلتها تعبت براطمي

العجيز : الوووووو < شكلها قايلتها كثير على عزها:d:

كونكت : هلا بك يا خاله .. من بغيتي ؟

العجيز : انا منب عبده وجع يصكك < انا لله وانا اليه راجعون 

صدق شر البلية ما يضحك < من القهر قمت اقول امثال

كونكت : طيب لبيه يمه من بغيتي ؟

العجيز : يمه .. تراني توني صغيره

كونكت : صبرن جميل و الله المستعان

العجيز : وش بك كني قاعدتن على قلبك

كونكت : ابد الله يحفظك بس من بغيتي ؟

العجيز : ابي ام عبدالله وينهي فيه ؟ < ياعبدالله ذا

كونكت : غلطانه يا خاله مهب رقمها

العجيز : اقولك انا منب عبده وش بك انت

>>> الضغط عنده وصل عشره الاف

كونكت : خلاص لاجت بخليها تدق عليك

العجيز : ايه ., قلها تدق علي وقلها ام فيصل وام علي وام سعد بيجتمعون عندي الليله

كونكت : ان شاء الله .. وماتبين ادق على ام فيصل وام علي وام سعد اعلمهم

العجيز : لا عندهم خبر  < يعني لاتستهبل علي انت ووجهك :d:

كونكت : زين تامرين شي ثاني

العجيز : لا يا ولدي الله يوفقك و يزوجك < توها تطلع الاخلاق :d:

و يالله انا بقفل معي مكالمه < اوخص يالعجيز عندها ويتنق

و طووط طووط طووط

...

و مع الصبر لين الصبر مل مني ومليت منه .. قررت اروح للاختلاسات السعوديه واشوف وش السالفه < بدري

لكن الصبر طيب  وحلو برضو

واروح لهم و عند الموظف

واشكي عليه الحال

طق طق على الجهاز

و يطق التبوسم في وجهي < ادري غريبه موظف اتصالات ويتبسم في وجهك بس حصلت:d:

 و الله يا اخي الرقم ملغي من فتره

طلع ظني في محله وان الرقم مستعمل

طيب دامه كان مع شخص ثاني و ملغي ليه تعرضونه على انه  رقم جديد !

والحل ؟

رجع طق نفس طقم الابتسامه .. بصراحه مدري وش اقولك بس اذا عليك ازعاجات منه تقدر تلغيه

ما  قال قدم شكوى ع الاقل .. على طول الغ الرقم

هذا الحل ! .. الغي الرقم

طيب و المبلغ اللي حطيته فيه ؟ .. قال مقدر افيدك تقدر تراجع الاداره

يالله ما عليه نروح الاداره .. وين دربهم هالاداره ..

المكتب اللي هناك ..

شكراً < مع ابتسامه بدون نفس

  مع اني عارف بروح وبردد ياليل ما اطولك

لكن لايأس مع الحياة

و لا حياة مع الاتصالات السعوديه

وعند المدير .. وبعد السلام و التحيه

و اشرح له السالفه اللي عدتها 9 الاف مره

رد علي .. غرررريبه كيف صارت < رد مقنع صراحه

طيب وش اسم الموظف اللي عطاك الرقم ؟ ومتى شريته ؟

اسمه  << بناسبه انا ؟!!

شريته اليوم الفلاني والتاريخ الفلاني من نفس هالفرع

وبعد الشيل و الحط مع هالمدير ..

اسفين على الخطا وممكن نعوضك برقم ثاني لو حبيت

حبيت .. انت تسأل اكيد حبيت ونص

وارجع للموظف

و يعطيني الارقام اللي عنده

كل رقم من ديره 

هذا تعويضكم ؟ 

و الله هذي الارقام المتوفره حالياً عندنا

كأنه يقول انسى الموضوع وريح راسك

و ارجع للمدير قائلاً بغضب < حسبي الله عليهم رجعوني لايام قريش

الحين بتعوضوني برقم ما يسوى ربع قيمة الرقم اللي شريته  

 و ببرود و ثقالة دم المدراء .. ما عندنا غير هالارقام الان 

لكن اقترح عليك تاخذ واحد من هالارقام بدل اللي معاك  

تمشي حالك فتره لين يوصلنا ارقام جديده مميزهـ  ونتصل عليك

تمشي حالك < ميكانيكي ذا مهب مدير

قال ايش نتصل عليك ايه طيب 

 و الادهي ياخذون الرقم مني ويبيعونه لغيري !!!! و نفس الموال يطب فيه غيري على اساس انه جديد

....

....

نهاية الفلم

....

طلعت من عندهم متجه لفرع من فروع موبايلي و اطلع بدل فاقد

لشريحتي اللي خبركم اللي ماتت مع الجوال في بداية الايميل :d:

....

عرضت الشريحه للبيع على مهايطية المخيم  و شراها واحد منهم بنص القيمه

 و فوقها يقول احمد ربك اخذتها منك

... 

 وتوبه من هالنوبه . 

و على قولة احلام 

بطلنا نتميز بطلنا ... مادام التميز يشغلنا

...

ما قد يستفاد مما كتب اعلاهـ

عزيزي الشاب .. حاول تبتعد عن الافكار المريضه الخاصه بالتميز .. مافيها شي لاصار رقمك عادي

افترضنا يا عزيزي انك مصمم تهايط وتاخذ رقم مميز  ..احذر من الذهاب للاتصالات وشف لك اقرب محل اصرف لك

...

سي يو في الايميل الجاي 

 




1 التعليقات:

بنت جيران الصحاف يقول...

هههههههههههههههههه .. اميل رائع

مرره دقيت على وحده كذا تكشخ برقم مميز وخرابيط وووو .. انضربت مره على مخي ودقيت على رقمها بس الظاهر اني كتبت الرديف لها لاني متاكده طلع لي اسمها لما دقيت بس كان مغلق الرقم
المشكلة انه الساعه 2 الظهر

دقت علي وتحلف انه مااجاء اي موجود مني ولما راجعت الرقن لقيتني غلطانة
يوم جاء الليل دق علي الرقم بس يطلعلي اسمها ورديت عليها لقت صووت شاب اهعم شي اعتذرت منه وقلتله اني غلطانة وسكر وكان شخص محترم كمان هو

ومن بكراا الساعه 2 الظهر بنفس الوقت الي دقيت عليه دق علي يمكن اربع دقا ويقفل المشكلة ان كان عندنا دكتور تونسي مرررررره شديد والبنات مايحضرون محاضراته افالقاعه فااااااضية صوت الدبوس يسمعه .. قال مين الي دق جوالها بكل برائة قلتله انا فلانه الفلاني .. قال برااا قلت دكتور بلييز ابي احضر لو ماتحضرني بس تطرني لااا مادتك صعبه اذا ماحضرت المحاضرة مستحيل افهم بليززززززززز .. اهم شي وافق قال خلاص اخر مررررره

ويوم جاء بكرا وبنفس الوقت الساعه 2 الظهر والدكتور هذا عندنا دق علي .. قال مين الي دق جوالها وبكل برااائه قلت له اسمي .. قال هالمره براااااااااااااا واترجى فيه براااااااااا

المشكله هالنذل جلس شهر كامل يدق علي بنفس الوقت الساعه 2 الظهر .. قلت طيب بوريييه احقره الحقران يقطع المصران وفعلا بعد شهر مل ولا عاد دق