اعلن معنا

!صور : إلى أين ذهب جورج ؟



---------- Forwarded message ----------
From: Mr. A <mr_azoz9@hotmail.com>
Date: 2010/7/21
Subject: !صور : إلى أين ذهب جورج ؟
To: als7af.group@gmail.com


السلام عليكم ورحمة الله وبركاته

 

معليش منيب أكرر الذبة .. بس من جد من أنتم ؟! .. أنت ياللي واقف في الزاوية من أنت ؟؟ أول مرة اشوفك هنا ؟! .. وأنت ياللي منسدح تناظر التلفزيون .. نزل رجولك عن الدولاب لا يطيح عليك الباب حقه !! .. ترى تونا مثبتينه بكرتون منديل  .. أحبتي  .. عودتكم دائماً أن أغيب لوهلة ومن ثم أعود مدججاً بالأكاذيب والتصريفات والأعذار كي أبرر لكم هذه الجحدة .. فـ مادام معودكم على كذا من زمان  .. سلكو لي وخلونا هالمرة نطمر هالفقرة ونبدأ على طول في الموضوع

 

*  *  *  *

 

لو أتيحت لي الفرصة لإكمال دراستي لأخترت وبكل ثقة مسار " التسويق " المتفرع من تخصص إدارة الأعمال .. قد لا تكون الشركات متلهفه عليه كغيره من المسارات والتخصصات ولكنني لطالما أحببت هذا المجال الممتع , فمن منا لم يشعر بالدهشة أو الإعجاب فور رؤيته أحد الإعلانات المطبوعة أو المرئية والتي غالباً ما تكون مكونة من ثوان معدودة ولكنها تحمل الكثير من المعاني والصور !! من منا لم يفكر يوماً في طريقة لإبتكار إعلانات تسويقية جديدة ؟؟ .. أو على الأقل وبشكل أبسط وفي نطاق المعقول دعونا نتكلم على مستوى الإنترنت .. من منا لم يفكر في إيجاد طريقة جديدة جميلة تعرض ما يقدمة ( سواء من صور أو رسومات أو حتى كتابات ) للأخرين بشكل جذاب ؟؟

 

لو تأملنا حولنا قليلاً لوجدنا أن غالب الأمور تعتمد على هذه النقطة بصفة مباشرة أو غير مباشرة !! ففي الأنترنت نتنافس لطرح كل جديد بأساليب مبتكرة , وعلى أرض الواقع نتسابق لشراء اخر صيحات الموضة من ملابس وإكسسوارات كي نلفت الأنظار ونشتت الأخرين عن النظر إلى وجوهنا المثلثة .. ولو نظرنا للموضوع بشكل أبسط وأبسط لوجدنا أن عمال البقالات أيضاً قد أتجهوا إلى هذه الإتجاه فصار الشخص منهم يقول لك بكل ثقة مع كل اتصال : صديق , نفر هنا بقالة فيه سوي توصل حق بيت أنتا لو فيه بس اشتري واحد كيس صامولي .. هذه كانت امثلة بسيطة وغير ملحوظة وفي الغلب الهدف منها غير مادي وتحدث بدون تبييت النيه !
 

لكن وعلى النقيض هنالك من يعتمد على هذا الجانب بشكل أساسي , فعلى سبيل المثال لو نظرنا لغالبية الشركات من حولنا لوجدنا أن مستقبلها مرهون بما تعرضه وتسوقة لنا ! لأنه وبكل بساطة الإعلان بالنسبة لها قناع ترتدية أو بالأحرى قالب تصب فيه منتجاتها بالشكل الذي يناسبك أنت كـ مستهلك , لذا نراهم يتنافسون لتقديم الأفكار الجديدة في الطرح والعرض ناهيكم عن إستخدام المسميات البسيطة التي تحفظ بمجرد سماعها بالإضافة إلى محاولة إقناعك بأنك تحتاج ماتعرضه لك وحتى لو كنت لا تستخدمها من الأساس !

 

هذا ما يفترض حدوثه وهو المنطق في نفس الوقت , ولكن ما يحزنني هو رؤية شركات ومؤسسات كبرى بميزانيات ضخمة جداً تعرض إعلانات غير مفهومة أو لا تمت للمادة المعلن عنها بصلة .. ولنا في هذه النقطة صولات وجولات  ( لحظه أتربع عشان امخمخ ) .. فدعوني أعرض لكم ما شاهدته وأنتقدته كـ مستهلك بسيط كل أمله أن يرى إعلان يعرض ما يلبي إحتياجته اليومية أو على الأقل يرى إعلان جميل يفتح نفس الواحد وهو رايح للدوام كل يوم صبح  <<– واضح إني متقعد

 

 

أول ما شفت الدعاية رحت لأخوي الكبير وقلت له : وش هالفلم شكله قوي متى بيعرض ؟ قال لي هذا مهوب فلم يا درج , هذي دعاية باقة جوال !! عصبت عليه وقلت له : لا انت نصاب , أكيد الفلم فيه اشياء ما تنفع لي وتناسب عمري , لو كذا عادي قل لي وقسم بسكر عيوني أو بغير القناة حتى !! .. يوم شفته ما علمني قلت أجي هنا عشان اسألكم , متى يعرض الفلم ؟ وليه هم ما كتبوا متى يعرض أساساً ؟! <<– للحين ما أقتنع أنه إعلان اتصالات

 

لا لا أمزح معكم .. أصلاً واضح أنها دعاية جوال  ( والله ما ندري عنك !! ) .. عموماً , أعتقد أن كلنا متفقين أنه من النظرة الأولى لها الإعلان بيتبادر مباشرة لعقولنا أننا واقفين قدام إعلان لفلم ( كاو بوي ) راح يعرض على قناة الأم بي سي .. صح ؟! .. لكن بعد ما ندقق ونتأمل ونتمحص فيه بنكتشف أنه تابع لأحدى شركات الاتصالات .. صح ؟! .. طيب أنا أبي افهم شيء واحد بس !!
 

وش دخل " الكاو بوي " في الموضوع ؟! عمركم شفتوا " كاوبوي" معه جوال ؟! .. يعني تخيلوا واحد " كاو بوي " يرسل لخوية رسالة وسائط مصور نفسه وهو صايد غزال مثلاً !! وإلا تخيلوا كاوبوي ثاني راكب فوق حصانة وجاي يركض بسرعة وفجأة يوقف عندك وينزل من حصانة بعد ما غبر عليك .. تناظرة بطرف عينك وأنت تهف بيدك الغبار عن وجهك وما تدري إلا وهو يقول لك وهو يلهث : لو سمحت عندي حالة طارئة .. ما القى عندك شاحن نوكيا صغير ؟

 

كان فيه إعلان لنفس باقة الجوال هذي ويحمل نفس الفكرة بعد لكن الفرق الوحيد هو أنهم  كانوا حاطين ثلاث شخصيات ( بات مان – سوبر مان – سبايدر مان ) واقفين جمب بعض بدال الكاو بوي .. لكن للأسف الشديد ما حصلته الحين في الشوارع عشان أصوره وحتى الموقع الرسمي ما حطه .. شكلهم حسوا أني ناوي أكتب عنهم وشالوه  .. لكن مهوب عشانهم شالوه يعني إني بتركهم  <<– حاقد عليهم من قلب 

 

معليش بنتعبكم معنا شوي , ياليت اللي ما شاف الإعلان حق الشخصيات اللي قلنا عليه يتخيل أنه جالس يشوفه الحين .. طيب مثل ما قلنا في الإعلان الأول .. خلونا نعطي الإعلان نظرة مبدئية ( الإعلان اللي جالسين نتخيلة ) .. وش نفهم منه ؟ .. صراحةً مدري شقول عنه لكن يعني خلونا نقول إني حسيت الإعلان " الكاو بوي " كان مناسب جداً ومعبر للمحتوى المعلن عنه بعد ما شفت ذا .. أسف قصدي بعد ما تخيلته .. عموماً الصراحة أول ما شفت الإعلان في الشارع أول شيء جاء في بالي هو هالمشهد ….

 

 

هههههههههههههههههههههههههههههههههههه

هههههههههههههههههههههههه شرايكم بالله ؟ .. قوية الفكرة صح ؟ .. قوية صح ؟ <<– حس أنه جالس يغرد لحاله خارج السور هو وإيا أفكارة 

 

كان هذا أحد الأمثلة والأن عزيزي أقلب الصفحة وأنظر للمثال الأخر , نموذج ( ب )  <<– كأن الموضوع انقلب درس علوم

 

من خلال النظر إلى النموذج ( ب ) سنجد بأنه يحوم الكبد ويسد النفس ويخلي الواحد يتحسف أنه جالس يراه .. هيئة الرجل وتسريحة الشعر المختارة له لا تعطي أي أنطباع جيد .. بالعكس تحسسك أنه توه طالع من كهف وما صدق لقى أكل قدامه .. وزيادة على كذا شعره بيخليك توسوس وأنت تأكل وتحس أنك بتلقى شعر وسط الكيس كل ما فتحته .. فـ بدال ما يغريك سوى العكس تماماً .. لذا أطالب الشركة بأنهم يسوون دراسة قبل لا يسوون إعلان زي كذا ويحطون أشكل تفتح النفس .. على سبيل المثال بنات لابسات قصير .. أو حتى رجال لابسين قصير مو مشكلة ترى <<– مرت أخته من جمبه

 

الأن ننتقل للنموذج ( جـ ) <<– ويستمر كتاب العلوم

على فكرة ترى النموذج في نفس الصفحة ما يحتاج تقلبون الصفحة ولا شيء

 

بودي أقول لكم " عذراً على رداءة التصوير " لكن صدقوني من صالحكم أن الصورة مهيب واضحة .. ونفس الحكاية ! بعد ما تشوف اللإعلان فكر وش جاء في بالك كإنطباع أول ؟! .. أعتقد كل اللي بيجي في بالك بعد ما تشوف هاللي مربط ورى أن الرز بيخليك تصير حرامي !! .. بعدين أبي أعرف وش معنى الجملة التسويقية حقتهم ؟ ( ما يمخمخ الراس .. إلا أبو كاس ) .. بس عشان الكلمتين جايه قافيتهم مضبوطه خلاص تحطها وبس !! .. معليش بس شلون تجي ؟! .. يعني ارجع البيت وانا حاط يدي على راسي واقول يمممه بسرعة سوي لي رز ترا راسي صاكني ومصدع مثلاً ؟! .. والا اروح للمكتب وانا ماسك في يدي كوب مليان رز عشان اعدل فيه مزاجي وأمخمخ ؟!
 

ننتقل الأن للصورة ( أ ) <<– الموضوع صار كتاب علوم وملخبط في الطباعة بعد

 

نعيد نفس الكلام السابق , وش المفهوم من هالإعلان ؟! .. إعلان زي هذا تحتاج يجيك الشخص اللي مصممه ويجلس فوق راسك عشان يشرح لك ويالله تفهمه بعد .. الإعلان يخاطب مين ؟ ..ليه كذا بس ؟! .. زعلتوني عليكم الله يهديكم ( ترفق يا وزير التجارة ) .. بجد والله المفروض يكون شيء سهل وبسيط والناس كلها تعرفه مانبي نشوف ألغاز في الشوارع !! .. عموماً زيادة على أن الإعلان غير مفهوم .. مدري ليه كل ما شفته اتذكر الرجل الحديدي

 

هاه .. فيه وجه شبه بينهم وإلا لا ؟!

 

الأن عزيزي الطالب أغلق الكتاب وركز على السبورة <<– ماسكه معه يدرس اليوم .. تكلمنا عن بعض الأمثلة المعلن عنها مرئياً والآن دعونا نأخذ مثال عن الإعلانات المسموعة .. يوجد هناك إعلان دائماً ما أسمعه عبر أثير الإذاعة .. وفي كل مرة أسمعه اقهقه ضحكاً لا أعرف لما ؟! .. لن أطيل عليكم , دعونا نقهقه سويتاً .

 

 (( دجاج دو .. ونعم التربية !! ))
 

أحد قايل لكم أننا بنخطب منكم ؟!

بما أننا قد استعرضنا سويتاً بعض الإعلانات والحملات المحلية والمدفوع عليها مبالغ طائلة , دعونا الأن نرى بعض النماذج الإعلانية التي تحمل بين طياتها العديد من الإبداع والإبتكار ناهيك عن البساطة في الطرح  ( غالبية الصور قديمة ولم توضع إلا من أجل المقارنة فقط )
 

 

 

يااااسلام .. بالله شوفوا كيف بكل بساطة وبكل سهولة وبكل فن مصورين هالصورة الإعلانية .. إعلان من شركة ببسي يورينا كيف أن العلبة القزاز أكبر من العلبة الحديد بمراحل عديدة !! <<– فاهم غلط من جد

 

 

وع .. سخيف  .. من جدي ترى أتكلم !! الإعلان هذا في نظري سخيف جداً .. لأن العامل الأنثوي اللي فيه سقط .. بس وشسمه ترى عادي العامل الرجالي فيه خير وبركة <<– مرت أخته من جمبه مرة ثانية .. عموماً مدري ليه حسيت الإعلان يقول : عزيزتي .. كرشك سيوقعك في العديد من المشاكل .. احد هذه المشاكل سيكون وقت زواجك .. لذا أشتري هالمشروب وإلا شوفي لك حل ثاني بسرعة , ترانا علمناك لا تقولين ما علمتوني إذا عنستي
 

 


 

امممم يعني شكل الشعر " حليو " ومهوب شين !! بس مدري احس المكياج شوي أوفر .. صدقوني لو بتمسح المكياج بتتغير مرة وبتطلع على حقيقتها !! .. وبعدين ترى واضح عليها مسويه نفخ شفايف وشد للوجه .. أممم مدري مدري بس ما ارتحت لها وبس !! <<– حركات البنات اذا سألتهم عن رأيهم في بنت ثانية

 

 

ليتنا دارين عنها قبل كان جبناها في عيد الضحيه  <<– حركات أمي

لاحظوا بالله كيف البساطة وكيف وصلة الفكرة بكل سهولة وتكون مرتبطة بالهدف الأساسي , ما نشوفهم حطوا ثلاثة كاو بوي ماسكين سكاكين !! .. ولا حطوا واحد لابس نص شماغ ونص غترة وماسك في يده سكين بعد

 

اللي قاهرني أنا أن الأسد ملتفت وتاركه  .. واضح أن الأسد ساكت له عشان حلمه يصير عارض أزياء .. عموماً مدري ليه حسيته يقول للرجال : هاه خلصت مصور وإلا لا ؟ .. علمني عشان اكلك

 

شوفوا بالله شلون شركاتهم تذب على بعض ! .. المهرج حق ماك متنكر وجاي يشتري من برقر كينق .. ذبة قوية وفيها تقليل من شأن الشركة الثانية بإحترافية .. مهوب حركاتنا هنا تلقى الدعاية تبدأ وتخلص وهي كلها تلميحات على الشركة الثانية وكأنهم يقولون لك : أفهم يا دلخ .. يالله وش نقول .. أهم شيء أنهم ما حطوا واحد كاوبوي جاي يشتري من المطعم <<– ذلهم

 

 إعلان يوريك أن ثلاجات كوكا كولا أبرد من ثلاجات الببسي <<– للحين فاهم غلط

 

هذا هو يا أحبتي سبب اختفاء سبايدر مان عن الساحة الفنية .. مات في دعاية مبيد حشرات !! .. زين لحقوا يحطونه في الإعلان حق باقات الجوال قبل لا يموت

 

دعاية مصاصة خالية من السكر .. حتى النمل تاركها

 

الحرمة جالسة تكنس المسرح والناس كلهم مفهين ولا أحد التفت لها وقال طفيها أزعجتينا .. دعاية تبين لك مدى هدوء المنتج حقهم

 

في نظري , نصف النجاح يكون معتمداً على طريقة عرضك للأشياء .. ففي نطاق المواضيع يكون أختيار الموضوع المناسب والمشوق والمبهم " بعض الشيء " له نسبة كبيرة في زيادة عدد القراءات مثلاً .. ومن ناحية البنرات الإعلانية ( الموجودة في غالبية المواقع ) يكون للتصميم والكلمات المكتوبة في البنر الدور الأكبر في جعلك تنقر عليه بالماوس .. فمثلاً كتابة ( اضغط وأنت ساكت ) أو ( اضغط ودردش مع بنات الخليج ) على البنرات ما هي إلا اشياء قديمة ولا تمت للإحترافية بصلة !! ناهيكم عن أنها مجرد كلمات تسويقية فقط وليست حقيقة , بدليل إني دخلت وما لقيت أي بنت خليجية !!<<– طلع أحد الضحايا

 

الكلام يطول في هالموضوع , لكن نرجوا أن الحال يتعدل ونصير نشوف أشياء بسيطة تناسب إحتياجتنا أو مفهومة على الأقل .. وأعتقد ما راح يصير هالشيء إلا لما تبدأ الشركات بتوظيف السعوديين بشكل أكبر , لأن السعودي دائماً ما يكون مخلص في العمل ومستعد للتطور كشخص ومستعد إيضاً لإكتساب أي مهارات جديدة !! بدليل إني أشوف في الإنترنت الآلاف من المبدعين في التصوير والتصميم وغيره .. ناهيك عن أن السعودي يطبق مبدأ الإثار والمحبة للغير كما يحب لنفسه ! وفوق هذا كله ما يترك أحد وقت الضيقة ودائماً تشوفهم متماسكين في وقت الشدة  .. وهذا اكبر دليل على ذلك

 

 

يالله أجحدوها عاد .. أي سعودي يتوظف هالشهر لازم يحول لي نصف راتبة .. برب أروح أشيك على حسابي وأشوف أحد حول لي وإلا لا
 

*  *  *  *

 

توضيح / عندي إحساس أن نصكم الحين متحمسين ويبون يعرفون وش قصة جورج ووين راح ؟!  ومتأكد أن النص الثاني بدأ يطلع عليه إشاعات قبل لا يخلص الموضوع حتى.. اللي يقول أنه مسافر واللي يقول مات واللي يقول رايح للحمام  .. لكن وبكل صراحة أنا مدري منهو جورج أساساً .. بس حبيت أكون مثال حي لفشل الربط بين المحتوى ( الجوهر ) والشكل العام أو الخارجي

 

صورة مع التحية لوزير الإعلام … 

صورة مع التحية لجميع الشركات …

صورة مع التحية لجورج بعد ما يطلع من الحمام …

<<– مهوب هو اللي طلع الإشاعة ابد

 

_________________________________________________

مـدونـتـي

www.mr-azoz.com

سبحان الله وبحمده .. سبحان الله العظيم


0 التعليقات: