اعلن معنا

مركاز العمده


From: waleed shalabi <waleed1152003@yahoo.com>
Date: 2010/9/25
Subject: مركاز العمده
To:

مركاز العمده

في فية عصرية وفي يوم متوسط الحرارة وقليلا من الرطوبة وفي قلب أحد أحياء جدة التاريخية تم نصب المركاز وتزينه بالطواله والمساند واتكايه كما تم رش البرحه بشوية مويه حتى تعطي بعض الطراوه لجلاس المركاز

العمدة : - هيا شوفوا الراجل كيف ممرض نفسه ، أخصروكم منه دا راجل متعافي

حمتو : - يا عمده أظنك نايم على جنبك الشمال ، دحين ما لقيت غير دا الضعيف تستعدى له

العمده : - عجيب يا واد وإنت إيش لك أنا بأهرج مع محمود

حمتو : - يا عمده انا كلامي زي الألماظ الحر ، وتعرفني ما أعرف أداري عين الشمس لا بخرقه ولا غربال

محمود : - هيا صلوا ع النبي ياهو فرعى وقرعى الله لا يقطع لكم عاده

العمدة : - إيش تسوي له يا محمود قايم حمتو بدي الدربكه ترى من أمس

حمتو : يا عمده عسى ما تظن اننا في الكتاب وانت الفقي حقنا واحنا بزوره قدامك ، ومن دا الكلك بطلوا وسمعوا وحلوا

العمده : - يا واد حمتو هو اللي بقي أحسن حطني في الفلكه وأفرشني

محمود وحمتو " في صوت واحد " : - سلامتك يا عمدة

حمتو : - والله معزتك ومغلاك هيا اللي خلتني أعدل عليك انا ما ارضا عليك الغلط

محمود : - كفايه يا جماعه هو إيه اللي نبات فيه نصبح فيه ما عندنا غير سيرة الراجل دا

حمتوا : - أصلوا الراجل دا زي ما انتوا عارفين كان يترزق الله ويسوي شوية سويك ودنجوه وطبطاب الجنة ويدور ع العيال يبيع لهم وجات سياره ولطشته كسرت له رجله

محمود : - لا حول ولا قوة إلا بالله الراجل على قد حاله وملصمق وعنده كيله من العيال الله يكون في عونه

العمدة ينادي على نقيب الحاره :- يا احمد هيا روح شوف لنا طريق عشان نروح نزور الراجل ونخفف من زنوبنا شويه

العمدة مرة تانيه يوجه كلامه لحمتو : - يا فالح لما انت عارف حال الراجل ومحتاله ليش ما قلت من بدري الله يسامحك بس

حمتو :- ياشيخنا والله ما كنت ادري عنك انك ما تدري عن حاله ولكن اهو نحن فيها دحين نقوم ونزور الراجل ونخلي النقيب أحمد يلم من أهل الحاره اللي فيه النصيب ونقضي للراجل وبيته

النقيب أحمد : - إيشينقاله دا الكلام والله من عيوني أسوي اللي تبغوه والساعي في الخير كفاعله

مع التحية والتقدير

وليد شلبي 

 

0 التعليقات: