اعلن معنا

فرضك واقضب أرضك !

From: مدمن شاهي <samio_404@hotmail.com>




 

يقول المثل الصيني ( شانوشي بوشي شوني ) .. يعني ( ياتحج زي الناس والا اقعد ببيتكم )




 

والمثل الصيني هذا ينطبق عند كثير من اللي حولنا حوالينا . حجهم مخيس وجيههم مخيسه حتى حملتهم مخيسه وبازّين قدام جماعتهم على بالهم كشخه ولاعبين عليهم قايلين ترانا رايحين مع حملة بدر عشانها فئة ( ألِف ) ونظامهم بوفية مفتوح ومريحينّا في كل شي . والحقيقة والواقع والقهر اللي يجيب المرورة في التسبد اللي لها سنة ماطقّها عرق دم أنهم رايحين مع حملة في البطحا . لا ومكاسرين المصري اللي يشتغل فيها يقولون ترانا واجدين خفّض لنا ههههههههههه


 

هالسنة من جماعتنا اللي بيحجون تقريبأً 16 نفر . من بين رجال وإنث   .. كللللهم ولا واحد معه تصريح . وكلهم عن بكرة أبيهم قايلين لهم اللي يشتغلون بالحملة ( لايهمك التصريح نقدر ندبّره لك ) هههههههههه احسّ اني نكبت عيال عمتي .. صدز والله هذا اللي صاير .. وقبل كم يوم طالع لنا وكيل وزارة الحج بالرادو يقول ( ان شفنا احد واصلن الميقات ومامعه ورقة خضرا مكتوب عليها تصريح " ان نشلع حرامه ونرجّعه لديرته مفصّخ " !
بس كل هالتصاريح تطييييير مع أوّل يوم من ايام الحج ، والحكِمة تقول " طاح الفاس بالراس " .. يعني " يابويا مشيّها ولاتندُر ندرت حالك " !


 

العام ماحجيت . خفت أسوي زحمة بالجمرة الوسطى ، والسنة هذي تأبى نفسي الحج .. عشان زحمة الجمرة الصُغرى ، !


 

أوّل سنة حجيت كان بإقتراح واحد من ربعي يقول وش رايكم نغيّر جو ونروح نحج ، عاد شاورت امي وقالت رح وان شالله تموت وتشفع لنا وشاورت ابوي قال رح وان شالله تموت وندخل الجنة انا وامك عشانك .. حزمت عفشي . حرام ومصحف وخلاقين اشكال وانواع ورادو عشان نسمع خطبة آل الشيخ يوم عرفه ، اللي اخبره ان اللي بيروح بس انا وخويي وواحد من عيال حارتنا عشانه بيكثّر القطّه ، واللي تفاجآنا فيه يوم جت حروة الروحه ان الجمس مليان وفيه اوادمن مستنكره ، قلت يابو فلان ذولي تبعنا والا جايين بالغلط ! . قال اركبو وهذولي تراهم راس المال هههههههههههههه ، عما في عينه ماعاد صرنا نسوى عنده ريال يوم جو هاللي معنا يبي يظهر منهم دراهمن تسايده ، 
وصلنا الميقات وكملو معنا لين مكه ثم اختفو وماعاد صار لهم حسّ ، اثاري الدعوة مواصيل ومشاوير وريال ينطح ريال ،


 

عاد شف حقين الكشافه كل واحدن معلقن هالخيوط على رقبته ذيك الخضرا مسوين فاهمين والعساكر عاد منتثرين في كل مكان ولو ترفع حصاتن لقيت لك جندي يشّر لك " امش لاتوقف " .. بصراحة ، منى . بقعة مبقّعه .. هذا منسدح على كرتون في الشارع ونصّ بطنه طالع وسرّه نافصن كنه واحد معشّقن له قير   .. وقاعدن بس يحتريهم يقولون تعال انطل حصاتك في الجمرة وذاك ضايعن ويدربي راسه مايدري وين الله حاطه فيه ، مارحمت ذيك السنة إلا اندنوسي شااايب منكسرن ظهره يقول ودني لحملتنا وجايّن لي يبتسي . عاد خنقتني العبره بغيت ابتسي معه ورقّ قلبي عليه وقعدت طول اليوم احومي به بين هالحملات واقول لكل واحد واقف على باب حملة : هالشويّب تبعكم وآخر شي لقينا حملة جاية من اندنوسيا وساكنين في خيمتين رابطينهن مع بعض بمعلاق ملابس . خذوه وتخمخمو فيه وشكروني يحسبوني ضابط في المباحث عشان واحد منهم يطقطق عربي يقول انكم تتعبون في خدمتنا . مادرى اني جاي قطّيه انا وربعي في جمس موديل 99 صدامه اللي قدام طايح كنه واحدن مبرطم على زوجته  .


 

قعدنا في منى ثلاث ايام . ناكل فطاير ناشفه عشان ماتخلّص قطتنا . عاد اللي ماسك الميزانية والقطه هو نفسه خوينا السوّاق اللي مقترح علينا نحج سوا . هو وزير المالية وهو السوّاق وهو الامير وهو كل شي . هو الأمر الناهي . هو اللي يقول سوو ولاتسوون واسمعو وعلى شحم انت وياه لايكثر   . والله ياهو ذالّنا بعد ذل مهوب طبيعي ههههههههههه ، لا واللي يقهر اننا قاطين اكثر منه ويوم رجعنا للرياض ودخلنا بيوتنا قمت انا وخويي نحسب المخاسير في الروحة واكتشفنا انه سارقنا ومضّحي بفلوسنا . لا ويقول تراي دافعن اكثر منكم عشاني ابي الاجر 


 

صرنا في منى نقوم إذا اذّن العصر عشان تطيح عنّا وجبة الفطور ويصير يبقى بس وجبتين . غدا وعشا .. ناكل الغدا فطاير جبن ذيك اللي تجي في قراطيس يابسه ويقعد الواحد ساعة عشان يفكّها ، لا وناكلها وحنا مغمضين عشان مانشوف التاريخ نخاف ننصدم انها مخزّنه من العام في مصنع من هالمصانع اللي حول الهياثم ، ونقعد نعفّط في هالفطاير ونحاول نطوّل وحنا ناكلها عشان نحسّ ان الاكل كثير ، وعقب المغرب نروح نتمشّى بين هالحملات نتفقد الرعية . هما اللوا - ولاأزكي على نفسي أحد - مسؤول عن هالأمه على قولة خويي الاندنوسي  ..


 

وكل شوي اشوف واحد من جماعتي والا اشوف واحد من حارتنا . وكل من شفته سلمت عليه عشان يقول لابوي تراي شفت ولدك وعلى وجهه آثار الطاعة ,


 

الموت الحمرْ يوم شفت إمام مسجدنا ابو عمر اللي ساحبن سلك من عداد الكهرب حق المسجد وشابكه في بيته ، وسلمت عليه وسألني معك الوالد ؟ قلت لا والله جايين قطيّه   . قال اجل الليلة عشاكم معنا في الحملة واشّر على حملتن واقفين حولها وحاطين في مدخلها شجرتين وحارس أمن ودباب صغيّر مربوط بسلسلة يقولون انه لراعي الحملة عشان يتنقّل به بين المشاعر  .. قلت " تم " . مير نطقتها قبل يعزمنا من زود الحرص اخاف يهوّن والا شي


 

قلت لربعي اكشخو الليلة ولاتفشلوني . ابو عمر عازمنا على عشا بالحملة ، 
ضبّطنا المرازيم وتوجهنا جنوب لمّ الحملة ، ويوم جينا عندها وبغينا ندخل قال السكورتي : وين رايحين ؟ 
قلت له وانا واثق : نبي ابو عمر طال عمرك . عازمنا اليوم بالحملة على العشا يوم انه درى ان حنا جايين قطيّه 
قال : من ابو عمر ؟ 
قلت : اللي ساحب سلك كهرب المسجد . قصدي الرجال الملحّى طويل القامة عريض المنكبين ؟ 
قال : هذي حملة إيرانيين وانا اخوك وماعندنا واحد إسمه ابو عمر !!
قلت طيب واللي جنبكم ؟ 
قال : كل هالصفّه حملات إيرانيه والآخيرة مرة حملة إندنوسيين بيتعشون اليوم إندومي روحو عندهم غدي جوّهم يصلح لكم 
آآآبوك يابو عمر  يعني عشان عشا تسحب علينا ؟ أجل لو قلنا نبيك تحججنا على حسابك وش بتسوي 
مشكلة اللي يصدّق اي كلمة تجيه ، وعشان كذا أي واحد يعزمه أحد يواجهه في أي مكان لايصدّق أنه بياكل شي إلا لين يدق عليه ويقول : تراك تأخرت علينا . أخلص علينا بسرعة !


 

قبل يوم العيد . اللي هو اليوم التاسع . صلينا الفجر أوّل الناس عشان بنروح لعرفة ونمسك لنا مكان قبل يجي فيه احد . وعاد ياهالناس كلّن يركض يبي يركب الباص عشان يروح لعرفه ، عاد امي موصيتني تقول اهم يوم احرص عليه يوم عرفه ادع لي ان ربي يسخّر ابوك لي ، وابوي بعد موصيني ان ربي يوفقه ويصير أمير شمل في قحطان . وكلّن يرسّل لي رسايل ذاك اليوم على الجوال . اللي يبي قطعة ارض واللي تبي تصير مدرسة بمدرسة حول بيتها وكني مير رايحن عشان ادعّي لهالناس وانا اكثر الناس ابي دعوتن لي تطلع من بؤي لباب السما يارب ،


 

احرمنا وتلفلفنا في هالاحرامات ، عاد عقدتي قسم بالله هالاحرام ههههههههههههه عجزت اعرف اربطه وان ربطته صار اليمين اطول من اليسار واقعد اسحّب فيه قدام هالناس كني اسحّب لي فراش نوم   .. عاد قبل ذيك الروحة جاني اقتراح من واحد من عيال عمتي يقول رح للخياط وخله يحط مغاط ويخيّطه وافتك من الحزام وريّح راسك ، وقال لي انه يجوز وان فيه فتوى تحلّه ، عاد حطيتها بذمته وسويت اللي يقول . وان اشهد انه احسن فيني وماقصر . اول من لبس حرام ذاك اليوم في الحج شكله أنا   . تليييته على طول وارتحت ، وعاد ذيك الايام جانا بردن يقطع القلب . كلّن يتنافظ من قوّ البرد . بردن يشخف القلب شخف . وطول الوقت وعظامي تحرّك من مكانها كنها مقروصه وانا اقول يالله الثبات بس متى يقضى الحج والله اني بديت اتململ .. ويوم ان حنا خلصنا ونركب مع اقرب موصّل لعرفة وناخذ لنا مكانن صاد ونقعد ندعّي ربنا تحت شجرتن ملتفّه لين حول المغرب .


 

وقبل يذّن المغرب أبعدت عن ربعي شوي قلت باشوف هالخلق وش انها تسوي ، ومير اوجعني قلبي يوم ابعدت وانا اشوف هالناس قامت تستعد للروحه تبي تمشي لمزدلفة


 

اوجعني قلبي وقلت ابي ارجع لربعي عشان نمشي . ادق عليهم مافيه ارسال ابي الطريق اللي مشيت معه ماعاد عرفته . وانا اللي اختبص وماعاد رجليني تشيلني واحسّ ان تسلاي انتفخت وعيوني غدن سود ، ابي ربعي ابي ربعي . اروح يمين وابعد ، أعوّد يسار أبعد ، ارفع الجوال ابيه يلقط لو نفس . مافيه !


 

وذا العالم كلن يبي يمشي . ادوّر الكشافة هاللي يقولون يدلون   بس ماش ماحولي احد . واقعد اقدّم لربي اشياء زينة سويتها بالحج . واتذكر يوم اني ادلّ الاندنوسي لحملتهم ويسلمون علي جماعته ويشكروني ويوم اني اوزّع كُتُب مع حقين الجاليات على البنقال اللي قاعدين على الشارع في مدخل مِنى . وكل ماتذكرت وجيه ربعي أوجعني قلبي ، واتذكر كلمت امي لي يومها تقول ان شالله تموت ، واحسّ بالموت يطعنّي وماعاد بيني وبينه شي  ،


 

المهم يوم شفت ان الوضع تأزم والناس موليه وتبي تروح . قلت مابدهاش ، بانطل عمري مع واحدن من هالباصات وباروح معهم ويحلّها حلال ذيك الساعة ، 
واتلفّت ادوّر باصن حق اجناب مهوب يفهمون عربي عشان لايسألوني من انت ولده والا يعرفني احد والا شي ،
وكل مابغيت اركب مع باص لقيته مليان وفيه ناس واقفه عند البيبان عشان لايدخل عليهم اجنبي مايعرفونه ، 
ويلهمني الله والقى ذاك الباص المخييييس وفيه حدود اربعين آدمي وآدمية . الرجاجيل مفاصيخن ماعليهم شي ورابطين حراماتهم من تحت ومن فوق مافيه شي ، والحريم عليهن مسافع ويتهيّا لي انهم من شرق آسيا ، 
وانا اللي اطمر معهم واكبّر وادعّي ربعي عشان مايشكّون فيني ، والقى عند الدريشه مكان فاضي واجلس فيه وكنّي راعي محل مابي احد يقول انزل انت منتب من ربعنا . 
ويشغل الباص ويقعّدون اللي واقفين ويمشي .. ويوم انه مشى وشفت الامور وش زينها حمدت ربي وكنها بدت تنفرج وكني مبشرن بسبعة اولاد توم وجاني من الملك مليون عانيّه ،


 

ورحنا لمزدلفة انا وأصدقاني الاندنوسيين   وقام يقرى علينا اللي جنب السواق في كتاب عن كيفية أداء مناسك الحج بمزدلفة وانا مركزن معهم اخاف يفوتني الاجر والثواب وعشان تكون الحجّه ميه ميه   . وكل ماقام يدعي قمت أأمن . وكنهم والله دخلو قلبي وحبيتهم سبحان الله . عاد يوم وصلنا لمزدلفة سلمت على الرجاجيل وصافحتهم واشّرت للحريم اللي قاعدين ورى ونزلت ادوّر ربعي ودقيت عليهم قلت وينكم ؟ . قالو آلحين ماسكين سرا مابعد دخلنا مزدلفة عشان فيه زحمة . قلت فاتكم حملتنا تونا واصلين وبنتعشى عقب شوي تعالو تعشو معنا 


 

ويالله لقيت ربعي ، وعزّمنا ان حنا ماعاد نتفارق أبد ونسوي نفس حركة الماليزيين نربط بعضنا بحرام ونمشي ورى بعضنا ، الموت في الجماعة رحمة ، 
ونمنا ذاك اليوم في مزدلفة على كراتين وجبنا جريدة الرياض وتقاسمناها ، عاد انا اخترت ارقد على صفحة الرياضة عشان وانا حاط راسي قبل ارقد اقرا لي الاخبار حقت نادي النصر ،


 

ويوم اذّن الفجر صلينا وانطلقنا لمكة عشان نعتمر ونرمي الجمرات ونفصخ الحرامات وافك المغّاط اللي راصّن تسلاي ، 
ورحنا لمكة ودخلنا في الزحمة وضاعت عفوشنا . اللي ضاع جواله واللي سرقت محفظته وكلن على همه سرى ، 
وصرنا كل يوم نروح نرجم عقب الظهر وياما حصاتن شلخة راسي وانا اتصبّر واقول : خلني بس ارجع للرياض واشوف امي وذيك الساعة احلق شنبي موس واحط عليه مرهم ان حجيت ثانية 


 

عاد كل ماقرّبت تغيب الشمس ذاك اليوم رحنا للمرجم ثانية نطلّ نشوف كم نعله طايحتن بالقاع ( الله من الفراغ بعد )


 

واذكر جاني باكستاني هو وامه واخوه وكلهم اجسام وكل واحدن كبري تسع مرات يقولون : وين الشيطان نبيه ؟
واشّرت على خويي قلت هذا هو عليكم به 


 

عاد هالجاليات مساكين يحسبون هالجمرات هي الشيطان . اللي يجيب بلكّه ويشلخها داخل الحوض واللي ينطل نعلته على الشاخص واللي يلعّنه عشانه مسوي بلا وهو اللي قايلن له سوّ تسذا 
 


 

عاد ازين شي ذيك السنة انهم توهم فاتحين مطعم البيك حول الجمرات . نمسك سرا ثمان ساعات عشان ناخذ لنا حرّاق ، اجل لو انهم يسوون ذبايح اتوقع بيدخل شهر صفر ماقضو من طبخه 


 

وجانا واحد وحنا بالحج يقول عندنا هدي تبون نذبح لكم ومارتحنا له . حسيناه بيدخّل ضحايانا في ثلاجة بيته . وجانا بعد مندوب الراجحي يقول عندنا هدي . نجدي للناس التجار واللي ساكنين بحي الصحافة ونعيمي للي عندهم فلوس بس يحبون الدنيا وبرابر لحقين السبالة ولايهون العود والصالحية ، عاد قلنا له ان حنا نحب الدنيا بس نبي الآخرة  .. ونبي نعيم وتوصّ لنا ، وطمر لنا خوينا وزير المالية اللي معه القطيّه وقال : لاتاخذون منه . انا اعرف واحد بالعزيزية عنده حوش وبناخذ عن طريقة . عاد مانقدر نقول شي . لو يقول ترى منتب مضحين قلنا ابشر . وإلى يومكم مدري هو ضحّى لنا والا لا  . بس الله لايحلله ان كانه زارفن فلوسنا . قال ايش قال خويي بالعزيزية وهو اصلاً ماقد راح لمكه إلا مرتين 


 

ورجعنا للرياض عقب تعب ووجع وقعدت اسبوعين وانا متحرولن في البيت توجعني مفاصلي وركبي وجاني شد عضلي في كل مكان . حتى في الورك جاني شد عضلي هاللي ماحقر عمره . وجاتني رسايل واجد من جماعتنا يباركون لي اني قضيت حجة العمر وعمتي عطتني هدية عبارة عن كتاب لاتحزن حق عايض القرني ويوم سألتها قبل فترة تذكرين ذاك الكتاب اللي معطتينه هديه يوم احج الله يعافيتس . قالت ايه اني لقيته منطولن في الصالة بين الجرايد وقلت اخليك تقراه . وش هالهدية البايخه اللي مالها طعم ،


 

والا واحد من جماعتي مهديني طقم دروش " صروال وفنيلة " ، والا ذاك اللي يقول اول ماجي للرياض باحط لك ذبيحة وللحين من ذاك اليوم ماشفته .


 

وعاد شف هالحريم لارحت للحج . يحللونك تحليل مهوب طبيعي . ان شالله تموت بس اهم شي جب لنا من مكة حنّا وسجادات ، عشان كذا اللي يبي يحج لاتدري عنه اي وحده من قريباته انه رايح يحج ،


 

الوكاد الحجّه الثانية اللي هي كانت الاخيرة كانت احلى من هذي بكثير . لافيها قطّه ولا فيها واحدن كل شوي ذالنا عشانه جايبنا 
ارخيت ريالي ورحت مع حملة . صحيح تسذبو علينا وقالو ترى عيشتنا بوفية مفتوح وصارو كل يوم يجيبون لنا رز ودجاج . بس على الاقل تحسّ ان لك مكان في الباص ولك مرقد ماأحد ينام فيه ،


 

كل عام وانتم بخير واللي يبي يحج نصيحة لايروح مع واحد معه جمس موديله 99 قسم بالله تراه نصاب وسروقن ابقع 
 
 
* اليوم يوم مبارك والدعوة فيه مستجابه ان شالله . لذلك ، الله لايحلل كل من يسرق الموضوع ويوديه منتدى ثاني !
،
 

  



 


0 التعليقات: