اعلن معنا

نصائح للنساء السعوديات

From: Alfata Altayer <sunbol_m2009@yahoo.com>


 
السلام عليكم ورحمة الله وبركاته.
أود ان اشكر جميع العاملين في مجموعة الصحاف على ما تبذلونه في خدمة جميع القراء والمشاركين, هذه أول مشاركة لي ولو ان الموضوع قديم ولاكن احببت ان اطرحه في هذه المجموعة لما لها من احترام وتقدير وحتى يستفيدون منه وخاصةً الأنسات المقبلات عل الزواج والسيدات المتزوجات وذلك أو الحد من نسبة الطلاق والأرقام المخيفة عن عدد حالات الطلاق , لذا ارجوا منكم نشر مقالي هذا لتعم الفائدة للجميع , وأقول لجميع الرجال أتقوا الله في نسائكم . ودمتم
 




السلام عليكم ورحمة الله وبركاته ...

لقد اثارت إهتمامي رسالة 

تتناقلها زوجات سعوديات 

عن اللي تبي الدلع والكلام الحلو ... و وين تلاقيه ..... !! ؟؟؟ 

فحوى الرسالة : - 

إن اللي تبي الدلع تاخذ لبناني 
واللي تبي الكلام الحلو تاخذ سوري 
واللي تبي مدري إيش تآخذ ..... 
واللي تبي مدري إيش تآخذ ..... 

واللي تبي الأجر تاخذ سعودي. 

عاد الأخيره هي الشاهد .... 

::

::

معلومة أفتتح فيها رسالتي: 

أنا من بيئة زراعية تؤمن أن الأرض الطيبة ... تعطيها ... تعطيك .. 

وكثر ما تهتم فيها ... يكون الثمر أطيب ..... 

::
::
::

إلى كل إمرأة سعودية تعتقد أنها مأجوره لأنها ماخذه زوج سعودي..... 

إلى كل إمرأة سعودية تعتقد أنها فاقدة الدلع مع زوج سعودي..... 

إلى كل إمرأة سعودية تعتقد أنها فاقدة الرومنسية مع زوج سعودي..... 

إلى كل إمرأة سعودية تعتقد أنها فاقدة الكلام الحلو مع زوج سعودي..... 

إلى كل إمرأة سعودية تعتقد أنها مظلومه عاطفيا لأنها مع زوج سعودي..... 

إلى كل إمرأة سعودية تبحث عن زوج حق دلع ولا كلام حلو...... 

::

أختي الفاضلة: 

إجلسي مع نفسك صباح يوم من الأيام 
بعد أن يغادر زوجك السعودي إلى العمل. 
راجعي يوم الأمس الذي مضى لحظة بلحظة، 
وأجيبي عن الأسئلة التالية: 

صباح الأمس الباكر؛ من أيقظ زوجك للعمل؟ أنت أم الساعة المنبهة؟ 

إذا كانت الساعة؛ أين كنت؟ 

إذا كنت أنت؛ 
كيف أيقظتيه؟ 
وبأي صوت نبهتيه؟
وفي أي صورة كنتي عندما تفتحت عينيه؟ 

بعد أن استيقظ، ودخل الحمام للدش؛
هل وجد حمامه جاهز؟ 
لما خرج والأمل يحدوه في وجبة إفطار؛
هل كنت جهزت له إفطاره؟

(ولا كوب قهوه وكيكة على المكتب متقاول مع البنقالي يجيبهم له كل صبح ؟) 

قبل أن يخرج للعمل؛ من أين أخذ ملابسه؟ 
(من بين يديك ولا من الدولاب) 

هل ساعدتيه في لبسه؟ (وكشختيه وعطرتيه) 
بعد اللبس (وقت الخروج)؛ 
هل من مودع؟ 

ولا أحسن إختاري أجابه واحدة مما يلي: 

1- خرج وأنا نايمة. 

2- صحيت من حركته في البيت، فتحت وحده من عيوني وقلت: وين رايح، العمل؟ بالسلامة. 

3- كنت سهرانه بالصالة، وشغالة على النت والشات وهو خارج قلت له لاتنسى الأغراض اللي وصيتك عليها. 

4- رافقته للباب، وكان وداع. 

( تبين مساعدة، نحذف أجابتين؟ بس المشكله مانقدر نحذف إلا إجابه وحده بس!!!) 

لما وصل المكتب
(طبعا إذا قام يفطر؛ الشباب بالمكتب عرفوا وش أنتي من حرمه) 
هل أتصلتي فيه تتطمنين إنه وصل بالسلامة؟ 

تالي النهار وهو راجع البيت من العمل، 
دق الجرس ( معه مفتاح بس يبي أحد يفتحله و يحسسه إن له وحشه)؛ 
هل أستقبلتيه؟ وشلون؟ 

بدا ينزع ملابسه؟ هل كنتي معه ونزعتي له ملابسه و..و.. ثم علقتيها بالدولاب؟ 
(ولا منطوله بطرف السرير) 

يبي يدخل الحمام وياخذ دش؛ 
(كرري السؤال حق دش الصباح). 

بعد الدش يبي أسترخاء، 
رجليه تألمه من الوقفه طول النهار والمشي، 
جسمه هلكان؛ هل ريحتيه؟
(طشت مويه وملح وهاتك يا تدليك) 

الآن يبي غفوه قبل الغدا، هل ساعدتي على توفير الجو الهادئ؟ 

لما صحي؛ هل وجد الغدا جاهز ولا هو اللي جابه معه من المطعم؟ 

بعد الغدا أكيد يبي شاي، 
هل قدمتي له الشاي، 
وجلستي معه سواليف، 
وكيف كان يومك؟ 

الآن فتره مستقطعه إلى الليل، 
وشلون قضيتوها؟ 

بالليل وقبل النوم على الأقل ساعتين
(إذا فيه عيال أكيد ناموا)؛ 
وش كنت لابسه؟ 
كيف رائحتك؟ 
وشلون صورتك وهيئتك أمامه؟ 

خلال الساعتين: وش من جو عيشتيه فيه؟ 
يمكن تتابعون فلم ولا مسلسل وسواليف، بس الجو العام شلون؟ 

وقت النوم، وأنتي رايحه السرير؛ وش كنت لابسه؟

كيف كانت تسريحة شعرك ؟ اكيد ما غيرتيها من سنين ؟


كيف وضعية النوم مع زوجك؟ 
(وضعية حنان ولا كأنكم أثنين أصدقاء أستأجروا غرفه بفندق وما لقوا لهم الا غرفه بسرير واحد (كنج بد) وكل واحد نايم بجهه) 

بإختصار لكل الأسئله السابقه: 

هل كنت أنثى مع زوجك السعودي وعيشتيه جو زوج وزوجه؟ 

طبعاًَ 
هذى مو كل الأسئله المطلوبة من زوجة أنثى، 
لكن المهم منها والمطلوب حتماًَ 
وحق الزوج فيها. 

إلى كل إمرأة سعودية 
تبحث عن زوج حق دلع ولا كلام حلو: 

ضعي درجه من 100 على كل سؤال، 
ووزعيها بحسب الأهميه، 
ثم أجيبي الإجابه الصحيحة، 
ومن ثم اجمعي الدرجات التي حصلتي عليها. 

كم مجوع الدرجات اللتي حصلتي عليها؟ 
0% 
ولا 10% 
ولا 50% ؟ 

طبقي النتيجة على المعلومه الزراعية التي أعطيتها أول الرساله عن الأرض. 
إعتبري النتيجه هي نسبة إهتمامك بالأرض. 
والأرض زوجك كيف بتكون الثمرة اللي تحصدينها؟ 

(الثمره أكيد الدلع والكلام الحلو و... و....) 
اسألي مزارع إذا احتجت مساعدة. 

في النهاية: أتمني من المرأة السعودية اللي تبي الدلع ما تاخذ لبناني، 


واللي تبي الكلام الحلو ما تاخذ سوري

واللي تبي...واللي تبي....واللي تبي.... 

كفايه يكون في العالم العربي كله بس السعوديين محرومين من أنثى. 

معلومة أختتم فيها رسالتي: 

تعرفون ليه الزوج السعودي تولع عيونه 
لما يشوف امرأه متبرجه وتقطر سعابيله. 

تعرفون ليه الزوج السعودي لما يجلس وزوجته يتابعون التلفزيون وتطل المذيعة عيونه مفنجلة 
بالشاشة. 


تعرفون ليه الزوج السعودي لما يتزوج من سورية 
ولا مغربية 
ولا...
ولا... 

يحس ان فعلاًَ 
فيه جنس آخر بالكون غير الذكور. 

لأنه في الأصل عايش

مع واحد من ربعه !!! بس بنص عقله.





===============



الصحاف

اكيد الموضوع بيصير فيه أخذ واعطى
الي عنده رد يرد بالموقع



8 التعليقات:

بنت جيران الصحاف يقول...

لا تعليق .. ورجاء الموضوع لا ياخذ اكبر من حجمة .. ممكن فيه حالات كذاا

بس نص الاسباب تقع على الزوج

ولا يما انثى اخذ واحدة ما يفهم وش انثى


وبس

اصلاا كلامكم ملينا منه وصار يجيب لي غثيان وقرف



رجاء لا احد يرد عليه

Lolo يقول...

يومك بيئي وزراعي ومدري وشو. محد قلك ان الرجل السعودي نبته شوكيه تعيش بالصحاري القاحله وبعدين وسط كل هالدراما اللي كاتبها ماتعرف ان اغلب النساء عاملات بالوقت الحالي وبالنسبه للمذيعات الحلوات اللي عاجبينك انت اصرف على مكياج المدام و واناقتها وماسكاتها و بوتكستاتها وناديها و خادااماتها وكوفيرتها وسواقها وبعدها لك الحق تعيب فيها مو ذي اللي انت وانت رحت وطلبت يدها يوه تغيرت بعد الزواج بحرام من الغثا كانت ملكه عند اهلها وأخيرا لا وحده تطبق كلامه كل رجل مهما كان لو أعطيته كل شي راح يتمرد اعطي حبه حبه ولا. بالذات للنبات الشوكي كثر السقي يضر يابيئي

غير معرف يقول...

المعذره يارجل
العيش بنصف عقل خير لمن لاعقل له

لو كنت تملك مقومات الرجوله لما اتهمت اول امرأه في حياتك بالرجوله
وهي امك

تحياااتي لنفسي
ههههههههههههههههههههههههههههههه

غير معرف يقول...

كثير أنا منصدهه منكم ياعيال ديرتي ايش هالكلام السوقي كل دقيقه ينط واحد ويتمصخر فينا على ايش شايفين حالكم وربي يكفيكم انا بنات أصيلات وفيات وذرابات وكلناذوق انتم بس معبين راسكم شي نفسي انو احنا رفلات ومافينا دلع وغنج وربي يراودني شعور اني أصور بنات الجامعه كل وحده تقول الحلا عندي ادري تقول تبالغ بس شي حتمي لك أنثى شي يميزها وزي ماتن تقول عطونا لازم زي ماتعطيها بتعطيك وتشيلك بعيونها ولاتنسى أنو البنت بطبعها حالمه ورمنسيه وبكذا تدلك بس اذا لقيت مقابلها جفا أكيد بتصد ولو أبصم أنك مو متزوج لانو أحسك كثير مو منطقي بحيك ومحايد الحين البنات تفتحو ويعرفو مو ساكنين بعشه......
جد بطيتو كبدناالسعوديه تصبيرة لوزين ياحيل الله
خلينا نغير شعارنا مايصلح الثوب الى رقعته يعني اهي الي بتفهمك وتساندك وتحتويك وعطونا انتم اطراء ومدح وحسسونا بانوثتنا وخلو عنكم التدقر والتريقه وبتلقونا مافيش زينا << أصلح دعايه جبن كيري
طوووووووووووووولت عليكم من حرتي وفرغت مافي جعبتي ....

بنت جيران الصحاف يقول...

صح عليك نور يا تحياتي لنفسي

وانا اشوفه اه ياقاضي يابها ايه العظمة دي كلها

وفارد عضلاته ويسب ورجل مدري ايش

وتارك كل مواضيع العالم وجالس يناقش في مواضيع النسوان

اتاري الي مربينه رجالين .... صح صح

نسيت انه كان عايش باسره كلها رجال

خخخخخخخخخخخخخخخخخخخخخخخخخخخخخ

غير معرف يقول...

الحمدلله والشكر على مثل هذي العقول ماشافت الا هذا الوضوع يعني ولا من زود الفضاوة
وبعدين الانثى تاج على راسك غصبن عليك
ومنهم امك يامتخلف ولا ماعندك غيرة
وبعدين اذا كنت رجال جيب موضوع للجنسكم يالمثالي انت
والله انت جنيت على نفسك والواحد ماقدر يتحمل نفسه لازم يرد ويقل ادبه للاشكال هذي
شي مخجل لا وبعد للمرأة السعوديه هذا اذا كنت سعوودي
لاحول ولا قوة الا بالله بس ....

غير معرف يقول...

بسم الله الرحمن الرحيم

اول شي هذا الموضوع جاني من زمان ع الايميل وفااااااااااااقع مرارتي


كل شي مرمي على ظهر الزوجه السعوديه
تخيل ان دوام الزوج الساعه 7 ونص يعني الزوجه لازم تقوم الساعه 5 عشان تسوي كل اللي قلته(تاكل الزوج تروشه تلبسه تودعه تعطره....)هذا اذا ما صار عندها عيال يروحون للمدرسه.. وقبلها تكون هلكانه في وظيفتها ولا في تدريس العيال والبيت وشغله اللي ما يخلص
انا مو ضد الرومانسيه بس بحدود العقل...لا تطلبون المستحيل وانتم ما تقدمون شي (الا من رحم ربي)
تشوفون ذا الحركات في المسلسلات التركيه بعدين تجون تصجونا..

الشي الثاني اللبس والتكشخ..
انا الف بالميه مع ان الزوجه تصير مرتبه ونظيفه لنفسها(تحتها الف خط) اول بعدين لزوجها..مره شفت حلقه في برنامج اوبرا وسوت تقرير كيف تجهز نفسها قبل ما تطلع على تصور
هي تقول انا وراي قريه من الناس تجهزني تقول اذا لبست تنوره قصيره يجون حقين المكياج يليصون رجولها كريم اساس وصورت نفسها مطلعه العصاقيل وهم يدهنونها..وشعرها تقول مستحيل اقطعه بالاستشوار.. كل يوم باروكه
تجلس بالساعات قبل التصوير تسمكر نفسها
فيه حلقه لها قريبه كانت طالعه تخيم
يوم قامت الصبح طلعت على حقيقتها(خلق الله حسن على قوله جدتي)


احنا ما نبي سوري ولا لبناني ولا مصري
احنا نبي رجال سعودي يخاف الله ومحافظ على دينه
نبي احترام لذاتنا ولعقولنا..نبي محبه
نبي تقدير.. نبي نعيش حياه(واقعيه) مع ازواجنا واولادنا

وفر هالشروط وشوف مكانتك عند المرأه السعوديه

تقبلوا خالص شكري
يمكن ارجع ثانيه اعلق لاني مررره مقهوره ههههههه

غير معرف يقول...

من قال لك اننا نبي لبناني ولا سوري مع الاحترام الشديد لهالجنسيتين
وبعدين لما جبت هاللسته الطويله العريضه الي تبط الكبد ان الحرمه لازم تقوم زوجها وتجهزله الحمام مافهمت كلمة تجهرله الحمام (يكرمون القارئن) ؟؟؟؟

تفتحله المويه مثلا ولا قصدك تغسله ولا تجهزله المعطس علشان يتنقع

يعني انت متصور الي ياخذ اجنبيه من العرب ان زوجته تسويله كل شي انت قلته رح خذلك اجنبيه وتعال احكيلنا وش صار معك والله انها لتلعن سلسفيل الي خلفوك ما يفهم السعودي الى السعوديه ولا يفهم السعوديه الى السعودي

بعدين الرجل ماله حقوق على المرأه الى حق الفراش بس وغيره لا الباقي تكرم منا ورحمة ورافه به نسويها ولا المفروض مثل ما انا اربي وانظف واغسل هو بعد يشاركني هل امور اذا جيتو من ناحية الدين

ولو اتكلم من اليوم لبكره انت واشكالك ماراح تفهم هالشي الظاهر انك تبي عبده تخدمك مو زوجه تقاسمها حياتك

ما اقول الله يبعدك انت والي زيك بالتفكير عنا وعن بناتنا ويطيحك باجنبيه تسعدك وتهنيك وتقومك وتجهزلك الحمام مرتين مره قبل الدوام ومره اذا جيت :) لانك ماتستاهل ظفر اصبع الصغير برجل البنت السعوديه