اعلن معنا

عضو تحت المجهر



السلام عليكم ورحمة الله وبركاته



اتمنى انكم بكامل الصحة والعافية
وجعل الله لكم هذه السنة سنة خير وسعادة وأفضل من سابقها >>> لا أحد يطمر علي ويقول مسيحي ولايجوز التهنئة  ترى ماهنيت فقط تمنيت لكم وافر الصحه والعافية

بسم الله نبداء مووضوعنا
لوحـظ بالأونة الاخيرة >> متعوب عليها لوحظ ـ
عزوف كثير من الكتاب سواء بالقروب او بالمنتديات بشكل عام عن الكتابة
واكثر ما يهمنا أعضاء القروب
وأسأل الله بأن يكون مانع خير
واتمنى عودتهم جميعاً سالمين لقروبهم وللأعضاء الذين ينتظرون جديدهم

راح انشاءالله نبداء من هالاسبوع
ولو اني احس ان الاختبارات قادمه والتوقيت مش ولابد ـ
لكن مايهمنا حنا موظفين والطلاب لاحقين على الخير انشاءالله

راح نبداء من اليوم بإستضافة مونديال 2026 وعمل خطة لإستضافته >>> انلحس الولد ـ
لا الصدز .. الصدز

راح نستضيف إنشاءالله عضو من أعضاء القروب كل اسبوع
وراح يتم وضع رابط موضوع القروب بالايميل
لإلقاء الأسئلة على العضو
وراح تكون المقابلة مدة اسبوع .. من يوم الخميس الى الاربعاء
والخميس الي بعده نبداء بعضو آخر

اي عضو عنده سؤال لضيفنا الكريم
يكتبه بنفس الصفحه وراح احط صور تحت كيفية المشاركة بالموقع ( المدونة ) وطريقة كتابة السؤال او التعليق
طبعاً مو اختراع صاروخ اسهل من السهل .. والكثير الكثير يعرفون كيف يشاركون

الي اتمناه من الأعضاء
الاحترام اولا واخيراً
واعلم ان كل ماتكتبه مدون عليك وراح تسأل عنه وتحاسب عليه
فلان ادمي مايعجبك لاتقل ادبك عليه .. إحتراماً لنفسك واحترام للقراء
عندك نقد هادف له اهلا وسهلاً .. عندك مدح واطراء اهلاً وسهلا .. عندك سؤال له على الرحب والسعة

بس بليززززز
بدون تعدي على الاشخاص

اتمنى من كل عضو قبل كتابة السؤال ان يسجل له نك نيم
لايكتب غير معروف ( لايترك الحقل فاضي ) حق الاسم



اكتب نك نيم اسمك الحقيقي الي تبي بس لاتترك الحقل فارغ عشان يفرق بين الأعضاء الي سألوا ويستطيع الضيف الرد على العضو بتحديد اسمه


ضيفنا الأول 

راح يكون العضو

ــ ـ ـمنكـــيThe Punisherالفلــــــــــــــ


عضو مايتحاج أعرف فيه .. من الكتاب المشهورين بالقروب وله شعبيته وله نقاده

من مواضيعه مايلي

اضغط على الرابط التالي



نرحب بالأخ الكريم

ونبداء أسئلتنا

راح يكون أول سؤال لي وهو :

اضغط هنا لمعرفة السؤال  ولكتابة سؤالك



فتكم بعافية





==============================



طريقة المشاركة بالموقع

http://als7af.com


حاب انوه لعموم الأعضاء عن الموقع والتصميم الجديد له ( المؤقت ) ـ
وكيفية المشاركة بالمواضيع


اولاً

دائما بالموقع يتم نشر الايميلات الي ترد الى القروب كل يوم بيومه بقدر المستطاع يعني بالعربي طازه   حق اليوم

وبعد كم يوم تنشر بالقروب والسبب لأننا مقيدين بعدد معين من الايميلات بشكل يومي

لمشاهدة الموقع او الايميلات والمشاركه بالتعليق عليها عن طريق الموقع على هذا الرابط

http://als7af.com/

تحت كل ايميل او موضوع بتشاهد هذا البار



اضغط على التعليقات للتعليق على اي موضوع

راح يفتح معك نافذه منبثقة <<< يازيني وانا انطقها   ـ

او صفحه جديده حسب متصفحك






بعض الأعضاء والي الاحظه عليهم دائما ينشرون تعليقاتهم بدون مايكتبون اسم او نك نيم
وينزل التعليق باسم غير معرف

اذا عندك حساب جي ميل بامكانك التسجيل فيه
او اختار الاسم
واكتب لك اسم مستعار عشان يصير اسمك من قائمة الاعضاء المعلقين على المواضيع






واختصاراً للوصول للموقع من خلال الدزاين في الأعلى







رقم 2 ينقلك على طول للموقع
رقم 3 البنر هذا يوضح لك اخر المواضيع المنشوره بالقروب
وبرضوا ينقلك للموقع


في حالة انتقالك للموقع راح تشوف على الجهة اليسرى تحت

ارشيف القروب
عن طريقه تشاهد المواضيع الي نشرت بالأمس او بأي يوم سابق

الي يظهر لك في الصفحة الأولى فقط أخر ثلاث مواضيع


اتمنى زيارة الموقع لمشاهدة ماتحدثت عنه


اشكر عموما الاعضاء على المساهمة في تطوير القروب

واتمنى من الأعضاء المساهمة في المواضيع الحصرية بالقروب
ويفكون من المنقووووول

موضوع واحد لك تتعب عليه

والله احسن من الف منقوله

وصدقني لو تكتب موضوع وتروح لقوقل وتبحث عنه
بتلاقيه بمنتديات ومواقع وقروبات ومدونات ... الخ


بس لاتنقل من الناس

انت كعضو تكتب أفضل منهم

جرب ومش حتخسر





فتكم بعافية





--







سبحان الله وبحمده ,,, سبحان الله العظيم
 






18 التعليقات:

الصحافـ تسوونامي ـ يقول...

حياك الله اخوي الفلمنكي

سؤالي

متى كانت بدايتك بالانترنت ؟
وهل كنت تكتب في مواقع ثانية ؟

سؤالي الثاني :

وش يعني لك قروب الصحاف .؟

هل تعرفت على اشخاص من القروب وصار لك بهم علاقه خارج القروب ؟ وتقابلت معهم ؟

وش الي تشوفه ينفع لتطوير القروب ؟

موفق واستحمل الاسئلة القادمه بصدراً رحب
واشكرك على قبول الاستضافه :)

razan يقول...

الفلمنكي هل انت من يكتب بـ يوزر آخر وهو "مُستقيل" ؟؟

toti al-shehri يقول...

الفلمنكي البنت الي قابلتها الايطالبه حقيقه ولا من خيالك الشاااااسع هع هع واذا حقيقه باقي تواصلت معك ؟؟؟؟

الاشهب يقول...

اخوي المنفلكي .. بحكم انك كاتب صقعتك الشهره من كل جهه ،،، كيف بنات القرووب معك وكم وحده طلعتا معها ؟؟؟

ما هي هوياتك؟؟ وما هي امنياتك الحقيقية مهب الاستهبالية :) ؟؟

بنت رجال يقول...

الاخ الاشهب
خاف الله ولاتقذف بنات الناس
ماتدري لو لك اخت ولاقريبه من ضمن اعضاء القروب ، اعضاء القروب ٣٠ الف
خاف الله ولاتقذف


الفلمنكي :

كم عمرك ؟
متزوج ؟
هل تؤيد الزواج عن حب؟
ياليت يكون جوابك صادق وبدون تصنع ومثاليه

Mohammed يقول...

سؤال صريح واتمنى الاجابه الصريحه
ومثل ما قالوا الاخوان , الاحترام والتقدير موجود وانا اخوك
لكن سؤالي شوي يمكن تفكروه استهزاء اوشي لكن بالعكس , خاطري اعرف هالاجابه منك من زمااااان, وشكرا لاتاحة الفرصه

< طولت ترى ههههههههه

السؤال/ اش الفايده وانت تكتب هـ الرسايل ؟ وايش احساسك وانت تألّف هذي القصص ؟

بقولك شي قبل لا تجاوب :)
اذا انت تتقبل الكلام والمعذره بكلامي هذا
لكن وجهة نظري *(الخاصه)*

رسايلك بصراحه ماتعجبني :)
ولا اتوقع اني بأثر عليك لو ماقريت رسايلك
انت لك ناس تتابعك وتنتظر رسايلك وهذا شي ملحوظ صراحه واهنيك

اتمنى ماتزعل من كلامي .. وقلت لك انها وجهة نظري الخاصه :)

واتمنى من الاخوان لو كان نظام التعلقيات لازم يمر ع الادراه قبل النشر .. اتمنى ينشر , او سؤاله هو بشكل شخصي قبل عرضه او الاجابه بدون عرض السؤال

* ملاحظه /
لما قلت ماتعجبني رسايلك .. مو معناته انت ماتعجبني
بالعكس, انا ما اعرفك بسلامتك لكن سمعتك بصراحه طيبه بهالقروب الطيب, والكل يشهد ولك مني كل احترام وتقدير ومحبه اخوي


المعذه طولت بالكلام :)

happy-laith يقول...

السلام عليكم اخوي فلمنكي
بما انك اول شخص ينسدح تحت المجهر
فااا حبيت اسائلك ماهو اجمل شي تحس ان القروب قدمه لك من جميع النواحي
وايضا لو كانت لك القدرة في اضافة او تغير شيء بالقروب ماهي هاللاشياء
وشكرا والى الاماااااام

Sun Shine يقول...

السلام عليكم ..
حبيت بس اقول لـMohammed اذا انت ما تفهم اللي كاتبه هذا من سنك وعقلكـ ..
المهم ..
الفلمنكككي < :d
اسجل اعجابي بطرحكـ ..
يعني احيان يتسم بالتغليف واحيان واضح جدا ..
هل لك تقوس معينه للكتابه ..!!
وماهو مستواك التعليمي .!!

callme يقول...

اخوي الفلمنكي
انا والله من المعجبين بكتاباتكـ
وبجوكـ احس جوكـ خوقااااقي
الزبدهـ

هل حقيقه انت أعزب وبدون وضيفهـ
<<أحس انكـ شمالي
اتمنى لكـ التوفيق
أخوكـ Callme العنزي

الفلمنكي يقول...

اولا قبل كل شي السلام عليكم ورحمة الله وبركاته
يشرفني ان اكون اول من اختير لاكون تحت المجهر في قروب الصحاف
وهالمجهر ماجاء الا مع بداية السنة الميلاديه عساه خير ان شالله علينا وعليكم واتمنى تكون اجمل من سابقاتها وحاب اقول في اخر ليله من السنه
الليله هاذي واضحه ليلة فراق ماهي بعاديه حاولت اعديها وعيت تعدي .
الصحاف تسونامي
بدايتي مع الانترنت منذو فترة طويله ممكن اول ماوصل لمملكتنا الحبيبه
وكنت اكتب في مواقع ثانيه
قروب الصحاف يعني لي الكثير اجد فيه الحريه لكي اخربش مابداخلي آيما خربشاني
نعم تعرفت على كثر من القروب وتقابلت معهم وتربطني صداقات بهم
من ناحية اللي ينفع لتطوير القروب ليس لدي الكثير اتوقع فيه اعضاء فالقروب عندهم الخبره لتطوير القروب
وشكرا على الاستضافه والسؤال.
razan:
لا لست انا مستقيل
toti:
لا من خيالي لوقابلت ايطاليه ماكنت جالس ارد عليكم هنا كان الان في روما .

الاشهب :
بنات القروب مثل خواتي واتوقع كافي رد بنت رجال عليك
هواياتي القراءه وركوب الخيل
امنيتي املك كوخ في موريشيوس اقضي فيه فترة استجمام بعيدا عن الضوضاء اللي حولي
بنت رجال:
عمري 30 ربيعا
عازب الى اشعار اخر
الزواج عن حب حلو ولو تزوجت عن غير حب برضوه حلو لانها راح تحبني وواثق من هالشي
محمد:
القصص اللي اكتبها لها فايده للي يفهم مابين السطور وهي مجرد يوميات امر فيها ومنها كثير خيال احساسي جميل دايما
happy:
اجمل شي احس ان القروب قدمه لي معرفة اشخاص جميلين تفكيرهم راقي مو شرط انه معرفتهم عن قرب اغلبهم عن طريق ردودهم لي ومشاركتهم في افكارهم
اما بالنسبه للاضافه والتغيير لم افكر ادخل بهالشي لان فيه اناس لهم القدره على ذلك ومنهم الصحاف .
sun:
شكرا على الاطراء
كتابتي مثل ماتقرونها فهمها من يفهم قصدي فيها ويجهلها كثير
مستواي التعليمي جامعي .
callme:
شكرا على الاطراء منك
ايه اعزب وابشرك لقيت وظيفه
لا ماني من الشمال
ونعم فيك وبقبيلتك .

NihaL يقول...

يااهلا والله ومسهلا بالفلمنكي المبدع ايما ابداعي < ماتقلد ابد خخخ
//

وش الشي اللي يعطيك الهام بالكتابه يعني لك جو معين او وقت معين يخليك تقول ابكتب ققصه؟؟ ويخليك مروق وانت تكتب .. ؟! وهل كل ماتكتبه واقع يصير ولا بس مجرد خيال .. < ياكثرتس
/

وفيه سوال ثاني ..

لو تقدر تمسح شي من الماضي وش بتمسح من حياتك ؟؟! < اذا تشوفه شخصي لاتجاوب ..

وسلامتكم
..

الفلمنكي يقول...

nihal:
اوقات الهام واوقات مواقف يوميه اسردها لكم فيها واقع وفيها خيال
السؤال الثاني اتحفظ على الاجابه
شكرا لك .

الفراشة يقول...

اهلين بالفلمنكي
بصراحة انا دايما معجبة بكتاباتك وخصوصا
اسطة
ضحكت من قلبي الله يوسع صدرك ويرزقك الزوجة الصالحة والفلة

بنت جيران الصحاف يقول...

صباح الخير :)

مررة انبسطت بالموضوع وخصوصا انت الي تحت المجهر

كان نفسي اعرف ايش ملهمك للكتابه بس انسال

لا بصراحه كنت بقولك لما تكتب قضه خياليه زي اسطه ههههههههههههههههههه
قول انها من الخيال وربي اصدق انا
والمشكلة اني قلت لاخواني اني عرفت القصه وجلست اسردها لهم
تراا اصدق انا على طول P:


وانت انسان مبدع وبصراحه انا من معجبات كتاباتك .. ماشاء الله عليك ربي عطاك هالموهبه وسخرها في طاعته
وبصراحه ان انسان محترم ومحترم قلمك
وربي تستحق الاحترام :) ارفع لك القبعه احتراما او عشانا سعوديين ارفع عقالي احتراما لك P:

غير معرف يقول...

ههههههه الفلمنكي هنا خخخخخخخخ

شوف بصراحة وانا أخوك ، انااقدر كتاباتك،
رغم أنك اول ماكنت تكتب في القروب كنت على طول احذف ايميلاتك بدون ما اقراهم ، لأني قريت كم إيميل وحسيتها ما اضافت لي شي ،،، كنت اكرهك خخخخ ( أسف كثير))
بعدين قلت ياولد خلني اقرأ ايش يكتب ،، ومابديت اقرأ الا صرت اضحك على استهبالاتك لوووول،،
وأكيد غيرت رأيي كثير كثير عن كتاباتك وأحسها ممتعه
وهذا الشي اللي أعجبني أنوا أجبرتني انو اغير رأيي في كتاباتك،،
انا متابع لكتاباتك من فتره الى فترة،،

عندي تعليق على الشعار،، انت حاط الشعار على حساب الأرجنتين لما كنت تشجعها في كاس العالم،، بس الشعار هذا لاسكتلندا في فلم بريف هارت،،،غيره يرحم والديك لووووووول علشان خاطر محبوتي اسكتلندا او لاتخاذه تعبير لك عن الأرجنتين


اشكرك كثير،،
أخوك الاسكتلندي :)
قووود لك

يوسف يقول...

حبيبي والله
حبيت اقولك انت اطلق واحد
بس سؤال لا هنت
تكتب في مجالات اخرى مثل الصحف اليوميه ..؟

fox يقول...

مرااااحب فلمنكي
منورنا يا باشا

السؤال: عندك صفحة بالفورمسبرينق؟
وش اللي ممكن يخليك تترك القروب؟
كم ساعة تجلس ع النت في اليوم؟
ههههه يلا صارت اسالة مو سؤال
نرجع لك مرة ثانية

sarab30 يقول...

حبيت اسجل اعجابي باسلوبك في الكتابة
و تسجيل افكارك و اطروحاتك بين السطور
بالتوفيق لك يا رب
سؤالي : كيف تقضي وقتك على الانترنت ؟ و ما هي اهم المواقع التي تهتم بها سواء للقراءة او الكتابة و المشاركه فيها ؟