اعلن معنا

انا وزوجتي رايحين سيريلانكا ؟؟

From: مسيووو مليونير . <millioonair@msn.com>







 

غمضت انا عيوني ... لجل ما اسمعك

4 FuNnNy0

millioonair@msn.com

0السادهـ ../ هو المليونير

 

 

 

صبح صبح ياعم الحج 0

وازيكوووووووووووو ياقدعااان 0

يسلموووووووووووووووو كل من سال وارسل وعاتب 0

لكن بقولكم  وراووو تاخرت بالكتابه

بس هذا بالحاله يبغاله موضوعن جديد 0

 

وقبل اجاوبكم على هالسؤال المحير خلوني اقول لكم سالفه قويه صارت ندخل منها على موضوعنا النقاشي القنبلي 

 الافتاري ثلاثي الابعاد 0

 

الخميس اللي طاف شفت اميمتي واخواتي رايحات للمشغل مواعدات الكوافيره <<< لبنانيه واسمها صعب وعجزت احفظه 0

 

هاللبنانيين ياحبهم للتعقيد باساميهم 0 شفيه حصه شفيه نوره شفيه صالح والنتيجه نورة بنت صالح وانتهينا 0

حتى الاسم لما تنطقه بلسانك تحس بعبق التاريخ خخخخخخخخ0

 

لكن تجيني وتقول اسمي جاكلين ايميل فرنسيس بنفس اليوم تلقاني نمت بدري من التعب خخخخخخخخ 0

 

ماعلينا يصطفلوا0

 

نرجع لموضوعنا

 

سالت امي منيره وخواتي منال وندى <<< محدن وصاه زين ايام الطفوله انه مايقول اسم اهله لاحد0

<<<ادري بيجيني كم واحد واخزياه استح تقول اسم امك وخواتك

<<يرد عادي عادي حتى الملوك اخوان نوره <<تقدر تقول شي

<<محجر لهم0

نرجع لموضوعنا المهم سالتهم

شعندكم كلكم رايحين للكوافير لايكون الاسبوع ذا اسبوع الشجره وانا مدري؟؟0

 

الا منال تدفني بيدها وتقول وخر ؟؟ وامي تقول ياكثر اسئلتك ياليتني ماجبتك

 

يؤ يؤ سلامات انتي وهي !! لايكون معنقز ومحد معطيني خبر بس !!0

<<ياشين جحده الام اذا هي ناويه تتكوفر مع بناتها0

تسمع الله يهديها بالشباب المتجدد خخخخخخ0

 

طبعا اختي الحنونه ندى 0هي امي من الرضاعه الاخويه متبنيه موهبتي من صغري صح انها ملحوسه شوي لكن تاخذ وتعطي معي خخخخ0

 

قالت ولاشي حبيبي مليونير كل السالفه اننا معزومات الليله عند اختي فاتن عزيمه كبيره وبيجون علية القوم ونبي نطلع على سنقة عشره

 

الحين فاتن عندها عزيمه ؟؟ عزيمة حريم وبنات وشخلعه  والا ؟؟

 

قالت ايه00

 

طيب

موفقين في عمليات التجميل اللي بتسوونها ..

 

جا بكره

 

لقيتهم جالسين وندى معهم وماغير سوالف من طقة " شفتي مرام امس وش لابسه يا فاتن؟؟"0

فاتن : يوووه اسكتي على ذوقها يجنن مره لبسها فخم بكل عزيمه تصير فتنة الحفل0

 

طبعا كل هالسوالف تصير وانا جالس بعيد شوي وقاط اذني

<<مسوي الولد اللي موب راعي سوالف حريم 0

<<يدور كلمة شفتي فلانه كيف طالعه قمر وشفتي كيف لبسها يخقق

<<ناوي فيديو كليبات ليليه0

 

وتطمر منال بس اسكتي يافاتن ماسمعتي ذبتها على ام فهد

 

فاتن : خخخخ ليششش وش قالت منيب فيه وقتها عاد ام فهد ياهي حقووود حقوود وتحب تقاهرها0

 

منال : خخخخخ تقول خخخخخ

<<تاشر بيدها وميته ضحك موب قادره اكمل0

 

فاتن : قووووولي وجع0

 

منال : خخخخخخ لحظه لحظه ميته ضحك خخخخخ0

 

فاتن : ياثقل دمك ياشيخه قووووولي بسرعه قبل يجي زوجي0

 

منال : خخخخخ ياشيخه كانت تقاهرها ام فهد وتعاندها في كل سالفه

 ووردت عليها مرام وقالت : قولي اني صح لو مره ياام فهد تكفين تكفين 0

 واوعدك المره الجايه البس من الهرم  مثلك خخخخخخ 0

 

نوال : خخخخخخخخخخخخخخخ من جدك ؟؟؟0

تعجبني قوة شخصيتها فديتها صديقتي  0مالومها في ام فهد ذي ياحبها للمقاهر0

 

طبعا انا اول مره تمر علي سالفه عالهوا مباشره عن مقاهر الحريم لبعض0

مادريت الا انا جالس على ركبي قدامهم واسمع كني راعيه بودي كير0

 

وقلت ياولد يامليونير لازم تسوي بحث في الفيزيا النوويه عن مقاهر الحريم

 

- مقاهر الحريم -0

 

هي ظاهره سعوديه تكمن في التقليل من شأن الغير ومهايط عنيف يصب في مصلحة الضمير المتكلم <<< لاعاد تشرح

 

هذي هناء قدر الله عليها وتزوجت اشهب الهب اسمه عبدالعزيز ..0

هناء من تزوجت صاروا يلقبونها حياة الفهد فرع الرياض خخخ0

 

المسكينه متحمله عصبية ونفسية الاشهب ..0

 

عبدالعزيز انسان يحب السفر والترويح عن النفس لكن بشرط اني اكون لوحدي خخخخخخخخخخخ0

 

عزوز الاشهب بالسنه يسافر من اربع لخمس مرات ووين يسافر ؟؟

سوريا لبنان واوروبا ..0

 

هناء .. من اربع سنوات ماسافرت الا مره 0وهالمره كانت عمره بمكه خخخ ناذره نذر عن جدتها ولا ماكانت النيه يسفرها ابد 0

 

مو باقي الا اقول هناء دخلت الجنه 0

وعزوز الاشهب دخل النار خخخخ0

 

المشكله مهيب في عزوز الاشهب

 

المشكله ان اغلب صديقاتها عارفين انها ماتسافر بالصيف

وبدا مقاهر الحريم 0

 

هناء تسولف طبعا0

 

انا ماهمني هالاشهب طززز فيه يسافر لموزمبيق ..0

لكن اللي يقهرني مقاهر الحريم في سوالف السفرات0

 

مره كنت في جلسه مع صديقاتي الا وحده تقول وين بتسافرون بهالصيف يابنات ؟؟

انا سمعت هالسؤال حسيت بمغص في البنكرياس ..0

مابي اتفشل كل وحده الحين بتقول باريس ولندن وموناكو والضعيفه مره مره

 بتقول ماليزيا ودبي0

 

وانا وش ارد عليهم ؟؟ وش اقول ؟؟0

 

لكن ياحبي لمقاهر الحريم 0

 

قاموا يقاهرون بعض ونسوني خخخخخخخخخخ0

 

قالت ليلى : انا والله زوجي جته دورة في النمسا وبياخذني معه0

 

هي قالته والا ماقالاته 0

الا تطمرساره ام شرّين وتقول : يؤ انتم ماتسافرون الا اذا جت زوجك دورة؟؟؟0 ييييييييييييييييه عليكم وش هذا0

ليلى : موب احسن من انه يسافر لحاله حبيبتي الا انتي وين بتسافرين ياحبة عيني ؟؟0

ساره : زوجي يبينا نروح سيريلانكا  ؟؟0

الا تسخسخ ضحك ليلى 0

وتميل من الضحك على صديقتها العزيزه ناهد وتنغزها انه اضحكي معي ساعديني قرشك الابيض ليومك الاسود بساعدك0

سيريلانكا عاد ياسوسو ؟؟ ليش بتزاورين شغالتكم لاهلها خخخخخخ00

ساره : شدراك يالقرويه انتي سيريلانكا جنة الله في ارضه خلصوا ترى اللي يروحون اوروبا ياشهيدة الحجاب خخخخخخخخخخخ0

وبدوا هواش وكل وحده تقاهر الثانيه في سفراتها اللي راحت 0

و لاخلصوا الا لما قلت انا : انا باروح اصيف عند اهلي في القويعيه ..0

وصرت سالفتهم لين انتهت الجلسه 0

<<مالوم تصيرين سالفتهم يالدلخه اجل قويعيه بعز المقاهر0

شكرا شكرا على هالسالفه

 

 

المهم يا اصدقائي الالكترونيييين 0

مقاهر الحريم لبعض مايتوقف هنا ..

فيه مقاهر اسمه المقاهر المخفي يعني بلغة الشوارع الحريميه دق من تحت لتحت0

 

وهذا النوع من المقاهر مايطلع الا اذا كانت السوالف عن الشكل والجمال

 

اوضح لكم الصورة اكثر 0

 

تجي الوحده وتبدا تلمح انها حلوه شلون ؟؟0

 

تقول انها راحت لزواج ال فلان .. وشافتها وحده وخطبتها 0 وانصدمت يوم درت انها متزوجه وعندها طفلين 0واللي يقهرك اكثر يوم تجيك عجوز مطقطقه الخمسين وتقول لشايبها : تصدق اليوم بالزواج انا وبنتك حلا يحسبونا اخوات .. منتب عاقله يالديناصور  0

اجل يحسبون بنتك هي اختك والحلو بالموضوع انها من تقول هالكلام يقوم زوجها الشايب يتمدد على بطنه بنص الصاله ويقول لها : تعالي بس همزي ظهري  وافركيه بالفيكس الاندونيسيي اللي بباب الثلاجه0

وخلي عنك هالخرط الفاضي0

خلصنا من المقاهر الخفي

نجي للحركات النص نص نص كووووووووم0

 

طبعا هالفكره ذي يتداولونها الحريم بطريقة المجامله

 

يعني تبين تعرفين من تكرهك ؟؟؟0

 

هي اللي اذا شافتك في عزيمه او زواج وتقول لك : يؤ يؤ محلوه ياام فهدوصغرانه

مابغيت اعرفك 0

 

هذي ادري انها ماتطيقك بعيشة الله خخخخ0

 وتوصل ظاهرة المقاهر عند الحريم عند مرحلة " زوجي يقول "

 

ترى ابثرتينا انتي وهالاشهب حقققققك0

 

اطلعي من مخي يرحم امممك0

 يسولفون عن عمليات تجميل الانف

ترد هالدلخه تقول " زوجي يقول ان عمليات تجميل الانف تؤثر على الخصوبه " خخخخ0

 

وعاد نوعية هالحريم  اللي سوالفهم كلها زوجي يقول وزوجي يقول

 

تجلس معها وتبداتقول شكل زوجها اكيدطاقن الديرتي و لابس بدلة كازانوفا ورابط كرافه وراكب حصان خخخخخخخخخخخ0

<<شطح0

 

ولو تشوفه وهو داخل البيت شايل كيس فيه لبن وخبز ولون البشره لون جالكسي خخخخ0

 

عاد يطمرون الحريم عليها فكينا من زوجك ترانا خابرين ثقافته وينها فيه 0

<<شكلهم دارين انه مركب قمر اوروبي0

اعطينا رايك انتي

تقول : ايه يالمقهوره علشان زوجي يسولف معي مهوب مثل زوجك مايسولف معك الا حطي الغدا والا يالله اطلعيانا عند باب اهلك خخخخ0

 الحريم كلهن مشاكل في مشاكل خصوصا هالمتزوجات

 

وكله كوم  و الخوف من العين كوم ثاني

اطلق الخيال لعنانك

 

هذا مسبب ازمه عاطفيه عند المتزوجات0

 

لو تعطينها كاس مويه وتشرق فيه قالت بس اكيد نظلتوني0

 

وماتطلع من البيت الا وهي ماخذه غساله من كل وحده موجوده0

 

والمشكله في هالظاهره السلبيه

 

انها تبدا تكذب علشان محد ينظلها0

 

ننظلك على ايش ياام ترهلات0

 

تلقينها ممشيه زوجها عالعجين مايلخبطوش

 

وتبدا تسولف قدام الحريم انه زوجها مايسمع كلامها وانه عصبي

 

وهو المسكين ئوطه مغمضه 0

تقول له الشمس تشرق من الغرب ينزل راسه ويقول معلومه جديده شكرا حبيبتي 0

 

لكن قدام الحريم لا اكيد بينظلوني عالسعاده الزوجيه اللي انا عايشتها

وكل سوالفها زوجي متعبني زوجي مبهذلني زوجي مضيق علي في حياتي

ومستحيل تعزمينها وتوافق من اول مره0 

الا لازم تقول بقوول لزوجي كود يوافق0 

ومايقهرك الا اذا جت تمشي من عزيمه

وحاولوا فيها المعزومات  انها تجلس0

تبوسم شوي  0وتقول والله زوجي يزعل ويعصب علي لو اتاخر

اجل حطيتيها على زوجك

منتب عارفه ان زوجك هالاشهب اذا حطك عند اهلك واول ماتنزلين من السياره ويمشي شوي الا يشغل  وما يطيق الصبررررا وقام يتنكس من زود الفرحه خخخخ

مقاهر الحريم بحر ماله قرار0

مقاهر الحريم لو تكتب عنه ويكيليكس علق الموقع من كثرها خخخخخ

 

باختصار عالم هالمتزوجات عالم كله مشاكل

 

حسب تخصصكم في جلساتكم وعزايمكم ..

عطونا مما قراتم وسمعتم وشاهدتم .. في مقاهر الحريم

 000

 

 

 

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

 


تعليق المشرفة

SOSY


 

YA 7BKM LSWALFNA HO 97E7 KTHER M8AHR BS 3AJBNA ALW9'3

 

 

 


 

 

 

 

 

 




2 التعليقات:

غير معرف يقول...

ههههههههههههههه والله انا حنا يالحريم مساكين ننرحم هذي بعض المواقف في جمعة اخواتك اذا قلتي خبر وقالوا قديمه والخبر طازه احس ودي اكفخهم والا اذا صارو يسولفون عن وحده في عزيمه وعجزت اتذكرها الا يقولون يوووه فاتك نص عمرك اجل ماشفتيها والا اذا جابت وحده شي تقول هذا مهدينيه زوجي طيب وش له تعلمينا ولو جاهااي شي قلت اكيد عين هذي بعض المواقف بس موضوعك حلو خليتني اقراه كله

غير معرف يقول...

هههههههههههههههههههههههههههههههههه
يوم شفت العنوان احسبك انت الي اعرست قلت متى امداه يعرس خخخخخ ولا بعد المقدمة تأهل انوو صدق اعرست ؛)

و بعد قلت يسويها وينزل صور شهر العسل خخخخخ

بس من جد مبطين عنك ووعن سوالف اخووك
لا تقطع واجد

= )