اعلن معنا

طحتوا من عيني يا 999

From: Abdullah 4492 <king4492@hotmail.com>





السلام عليكم
هذي سالفه صارت لي قبل فتره
نزلت باحد المنتديات باسمي عشان لاحد يقول سارقها





,,


الساعه 3 الفجر ليلة الخميس ..
الواجهه البحرية في الخبر ..
طالعين نتمشى انا وخويي بالسيارة ونشوف راعي جيب يمر من جنبنا وفاتح نافذة السيارة ومطلع منها كلب ..!
طبعا استغربنا من هالشي وضحكنا ومشينا شوي الا نشوف سيارة مسرعة ويدخل بالخط على راعي الكلب
ويبي يصدمه ويطلعه فوق الرصيف
توقعنا انه خويه يمزح معه ويبي يخوفه ويخوف الكلب اللي نقز لداخل السيارة
وقف جنبنا بالاشارة راعي الجيب وفتح النافذة وقام يسولف معنا وصار بيننا هالحوار البسيط

راعي الجيب / شفتوا اللي مطلع الدبدوب من السيارة( ويقهقه بصوت عاااااااالي )

أنا / ياخوي تستهبل انت ولا من جدك .... !!؟

راعي الجيب(يتكلم بكلم برووود) / لا ياخوي بالعكس لا استهبل ولاشي بس ابي استانس بس توني جاي من البحرين (نفس الضحكه العاليه اللي قبل شوي)

انا / ( اطالع في خويي واقول شكل الرجال معبي الطاااسه) قلت له اوكي بالتوفيق ياخوي

طبعا بعدها صار حوار غير منطقي ابد وكلام غير مفهوم ويدخل من موضوع ويروح لموضوع ثاني
وفوق كل هذا مو قادر يفرق بين الكلب والدب
عرفنا ان الرجال سكران ولا يدري عن اللي حوله وعلى طول قفلت النافذه وقلت لخويي بعد عنه وفكنا من شره


فتحت الاشارة ومشى قدامنا الرجال واشوفه مسرع والسياره تروح يمين ويسار وكل شوي يضرب بالرصيف ويرجع
انا للحين ساكت واقول الله يستر عليه عسى لايسوي مصيبة
لين وصلنا لثاني اشارة والرجال ماوقف وقطعها من غير اي مبالاة
عرفت وقتها ان الوضع خطر جدا و يمكن لاقدر الله يصدم في عائلة ولايذبح له احد على وضعه هذا
طبعا مثلي مثل اي شخص يسمع بالأمن اللي عندنا والشرطة لحماية الشعب ومن هالكلام
طلعت جوالي ودقيت على 999
اول اتصال شبك معي الخط وانتظرت دقيقه ولا احد يرد , انا قلت يمكن الشبكة !
دقيت مره ثانية وانا خايف لان السكران رايح على تقاطع خطير ولو قطع الإشارة اكيد راح يسوي مصيبة
ومثل المرة الاولى وجلست كم دقيقة ولا احد رد علي
قاعد افكر لو لاقدر الله كان الوضع اصعب من كذا
لو كانت في مصيبه صايره قدامي او مشكله ضروريه و احد احتاج الشرطة هل يجلس ينتظر على الخط طول الوقت ولا احد يرد ؟
صحيح كان الوقت متأخر بس مو عذر اكيد في مناوبه 24 ساعه ماتوقع ان بيجي وقت يقولون مركز الشرطه يقفل 12 بالليل مثلا


الرجال الله يستر عليه راح ولا ادري وش صار عليه
وانا وخويي وقفنا عند تفتيش عند الجامعه وبلغنا العكسر باللي صار وعطينها رقم اللوحه ومواصفات السيارة
شكرنا العسكري على اللي سويناه والحمدلله حسيت اني برئت ذمتي


بس بنفس الوقت تخيلت اني داق على 911 وقارنت بالرقم الموجود بجوالي 999
وللأسف طاحوا من عيني ربعنا ..

3 التعليقات:

مزاج كوفي يقول...

متى هم رقـوا

Callme يقول...

911
وراهم ناس تقاضيهم
وهم يعتبرون عملهم هذا انساني

لكن عندنا
ماحولك أحد
وربعنا يعتبرون عملهم مكدهـ يكدون عشان الراتب بس
برب كبر قريح

برهرهه يقول...

هذا غيض من فيض
قبل فتره جاء واحد غبي يستظرف علي مع الظهر ولاقدرت ارجع بيتنا بسببه
طبعا ماعرف اي رقم حق الزنقعات الا 999
اتصل اتصل اتصل .. لاحياة لمن تنادي

جد وقتها قعدت افكر ..

لو انسرقت مثلا بسم الله علي

وش فايدة 999

إلى الجحيم يا 999 من كل قلبي .

والله يعطيك العافيه على تصرفك الايجابي