اعلن معنا

نوافذ

From: Mr. A <mr_azoz9@hotmail.com>




السلام عليكم ورحمة الله وبركاته 

 

أخوتي وأحبتي في الله .. مما لا شك فيه أننا شهدنا أزمات عديدة منذو بداية هذا العام , ومما لا شك فيه أيضاً أن هذه الأزمات اعتبرت ممتعه لبعضهم فصاروا يتابعونها ليلاً ونهار من باب أنها مسليه ومن باب أنهم قاتلهم الفراغ وما عندهم شيء غيره يناظرونه <<– يناظر أبوه وأمه بطرف عينه , ولكن وللأسف هناك من أنحنى منحناً أخرى مستغلاً هذه الأزمات .. فلقد نهض من كان الغبار يكسوه وتحول الاطرم إلى شخصاً لسانه يطول اذانه وبدأ نشر السموم من باب : طلعوا المحتجزين

 

نحن … سوري قصدي أنا .. عذراً , من أنا لكي أتكلم عنكم ( تحسون فيه نكبه بتجي ) .. أنا وكفردٍ من أفراد هذا البلد الذي احتضنني 25 عاماً ( للأمانة بس .. سنوياً من يومين إلى خمس أيام أصير برى السعودية <<– براءة  ) أحببت أن أعبر برأيي البسيط عن ما يدور حالياً , ناهيكم عن رد المعروف لتلك السنين التي عشتها عن طريق تخصيص خمسة وعشرين دقيقة لكتابة هذا الموضوع .. لذا يلا نبدأ .. 1 2 3  <<– جالس يحسب الوقت

 

لنتخيل أننا جميعاً قد اجتمعنا في منزلٍ ما وها نحن نجلس في المجلس .. تدرون لالا ما يكفينا المجلس مشينا للصالة بس ( واضح الموضوع حواق من أوله ) .. اقتربوا ودعونا نلقي نظرة من النافذة الأولى , شاهدوا معي رجاءاً .. أترون تلك المراءة التي تمشي في الشارع ؟ .. تلك المراءة  قد خرجت من بيتها متجهةً إلى البقالة كي تشتري " دجاج ماجي " قبل أن يرجع زوجها من الدوام لأنه وبكل بساطة ما يطيع يشتريه

 

لنغلق النافذة الأولى ولنذهب للأخرى , أترون ما أراه الآن ؟ .. أترون كيف يكسو الغبار الجو ؟ .. هذا الغبار ما هو إلا بسبب مجموعة من الصبيان الشهبان الحفيان واللي لابسين كلهم بلوزة عليها رقم 9 , وجالسين يلعبون كوره

 

لنغلق النافذة ورجاءاً تأكدوا أنها مسكرة زينه ماله داعي يدخل الغبار للبيت ترى تونا ممسحينه .. أما زلتم معي ؟ حسناً لنلقى نظرة من هذه النافذة , هل ترون ذاك الشخص؟ .. ذاك الذي يركض خلف دراجة نارية وقد بان على وجهه التعب .. هذا واحد جالس يلاحق راعي دباب سارق جواله .. امممم ما علينا منه هذي سالفة بنجيها بعدين

 

ما قد رأيناه للتو ونحن نطل من الدريشة هذا ما يسمى بنعمة الأمن .. طررررق <<– شفيكم خفتوا ؟ .. هذا صوت تسكير الدريشة الأخيرة بس
 

عزيزي .. هل ستخرج من بيتك لو علمت بأن أهلك غير أمنين فيه ؟ .. هل ستخرج المرأة لو علمت بأن الأمن غير موجود ؟ لو لا فضل الله علينا بنعمة الأمن والسيطرة على النظام , لما رأينا الصبيه يلعبون بالكرة .. وأيضاً لكانت الكرة قد هربت من اقدامهم الشهباء من زمان

 

فلنغادر الصالة ونتجه للمخزن كي نختلس النظر من نوافذه .. هل ترون شيئاً ؟! ..  لحظه بس امسح الغبار ما قدرت اشوف شيء  .. أيوه .. وين وصلنا .. أيه صح ,هل ترون شيئاً ؟ .. نرى الآن مجموعة من الشباب يجلسون على الرصيف وقد احتدم الشجر بينهم بسبب نقاشٍ في أحد مباريات الكُرة .. تشاهدون أحدهم وقد أمسك بالبيالة ورمها على خويه كي يسمع وجهة نظرة .. ونشاهد الآخر وهو يتنحى عن البيالة مقلداً بذلك حركة فلم ماتركس الشهيره .. وصديقهم الآخير قد وقف خلفهم كي يصور هذا المشهد ويضعه في اليوتيوب 

 

لو طلب منك الاختيار من ستضع " عمدت حي " ؟ الذي يتميلح ويستعرض وهو يوخر عن البياله .. أم الشخص الذي قرر ضرب خويه بسبب موضوع بسيط .. ام اللامبالي والذي كان يصور هذا المشهد ؟ , لكلاً وجهة نظرة وافكاره , وبالطبع لكل شخص عيوبه , وأيضاً لكل شخص مميزاته وصفاته الحميدة والرائعة <<– جالس يعدل تشخصية شماغه وهو يناظر نفسه في المرايه

 

لا اريد الخوض في النعم التي لدينا من دراسة مجانية ( عارف انها سيئه لكن تخيلوا انكم بتدفعون عليها فلوس بعد )  .. مستشفيات حكومية .. دراسات العليا .. الأمن ( بغض النظر عن اللي يلحق الدباب تو ) .. وغير مقر لدينا بنظام الضرائب ( ولو ان ساهر ينوب عنه ) .. وغيره الكثير من المزايا التي لا تحصى , أهمها استقرار الأسعار مثلاً !! <<– تصدقون ماش ما قدرت اكذب في هالنقطة .. هاه بس مظاهره ؟ 

 

هذه كانت وجهة نظري البسيطة والمتواضعت والتي لا تمثلني أنا كشخص ولا تمت لي بصلة وأول مره أقرها في حياتي بعد .. وطالما انكم عطيتوني وجه ووصلتوا لهنا اجل كملوا شوي واقروا الأشياء اللي قاهرتني بالمره

 

بالنسبة " لي " أهم وأسهل موضوع واللي أشوفه يحتاج يُبت في أمرها بسرعه هو غلاء الأسعار .. يعني بصراحة لو بيزيد راتبك 90% ما راح تستفيد شيء لان كل شيء يغلى بعد  .. يعني مثلاً يقدرون يوظفون لهم عشرة أو خمس طعش أو خمسين ( بحكم البطالة المقنعة وكل واحد بيوظف ولد عمه وبيصير القسم كأنه استراحة شباب  .. لكن شنسوي هذي مشكلة ثانية ومالها حل برضو ) , عموماً بعد ما يجمعون هالعشرة يحطونهم في لجنة اسمها  ل خ ت ( لعن خير التجار ) .. وأي واحد يتميلح في الاسعار يسحبونه مع رجوله في السوق عشان يكون عضه وعبره .. صعبه ؟ .. لا تقول لي صعبه ولا حاجه .. هذا المساكين اللي يبسطون في الشمس ويبيعون خضار تلاحقهم الددسان الصفراء كل يوم !!

 

نقطة أخيرة  أغضبتي وستظل تغضبني ما حييت .. الحين الببسي زاد سعره 50% في يوم وليلة وقلنا عادي , يمكن اللون الازرق بيخلص في العالم ويحتاجون يغلون السعر .. المحلات والمطاعم تبيعه بريالين وقلنا عادي .. لكن مكينة الببسي ليه تبيعه بريالين ؟؟ .. اذا سعره مسجل ريال ونص ليه تبيعه لك المكينة بريالين ؟ .. مافيه صرف ؟؟ مهيب مشكلتي أنا !!! .. صغر حجمه , عطني علبة مويه , عطني علك , عطني تبن , او تدرون .. لا تعطيني شيء .. تحطه بريال وخلاص .. ليه كل شيء يروح على حسابنا حنا مو على حسابهم ؟ اتوقع هذا معتبرينه " منّه " علينا ومسمينه ( بدل مكينه ) .. طبعاً هذا كله يهون عند أن المكينة تأخذ فلوسك وما يطلع لك شيء منها كالعادة !!

 

 *  *  *

كتبته بدون تحرير أو تعديل , فقط أمسكت بالجهاز وبدأت افضفض له ولما رأيت أن هذه الفضفضه اكثر من أن يتحملها هذا المسكين قررت أن " أوهقكم " بها أيضاً ,  فلعلها تجد في نفوسكم مكاناً … وان لم تجد فـ إلى سلة المحذوفات وبئس المصير 

 

أكرر وأقول هذا الموضوع لا يمثل أي طائفة أو قبيلة أو منطقة وبالتأكيد لا يمثلني حتى !!  ولا يحرض على أي شيء سوى مقاطعة مكينة الببسي اللعينة <<– جالس يرجفها 

_________________

مـدونـتـي

www.mr-azoz.com


0 التعليقات: