اعلن معنا

سوالف حقيقية عن الصدف الغريبه ‏

From: NOMAS KSA <nomas.ksa@hotmail.com>







كنا نسولف انا والشباب عن الصدفة وعن المواقف الغريبة الي تدل على هول الصدف وبقولكم عن هالسوالف الي بعضها مضحك وبعضها يشيب الراس من غرابتها مع العلم ان كل السوالف الي بكتبها متأكد من صحتها ومن الممكن من غرابتها انها تكون صعبة التصديق




* صديق أخوي بالأمارات *

راح صديق أخوي للإمارات في رحلة عمل وفي أحد الأجتماعات تعرف على شخص إماراتي وطلعوا لأحد المطاعم يتغدون وبعد الغدا تبادلوا كروت العمل وبعدين رجع صديق أخوي الفندق 
في اليوم الثاني خذا الكرت يبغى يدق على رقم الإماراتي 
ودق الرقم وطلع رقم أخوي 

الصدفه انها ارقام الإمارات نفس أرقامنا ولكن مع تغيير فتح الخط ,والجوالات تطّلع الأرقام المتشابهة بالاسم حتى لو تّغير فتح الخط
 
الصدفة انه صديق اخوي تعرف على واحد في دولة ثانية نفس رقم أخوي 




* أثنين وثلاثين جنيه *

عمي راح يتعشى بمطعم هارديز ومثل ما تعرفون المصريين الي في هارديز كلهم خفيفين دم ما شاء الله عليهم
عمي طلب الطلب حقه 
قال المصري الحساب 32 جنيه << خفيف دم 
من الصدفه عمي كان قبلها بيوم جاي من مصر
وطلع من محفظته 32 جنيه بالضبط 
واعطا المصري الفلوس والمصري خاش جو مع مصر ونسى انه بالسعودية
لحظة ركز وشاف الفلوس بالجنيه تروع
جاته حالة ضحك هستيرية 
يقول لعمي أنت ساحر ؟؟




* الدم واحد *

ارسلني أبوي ليمني عنده ورشة بالصناعية وقالي هذا اتعامل معه من عشرين سنة وبيعطيك اسعار زينة
 بعد ما شاف السيارة وتوني ما قلت له انه ابوي فلان الفلاني ولا عمره شافني من قبل
قلت له ترا حنا زباين عندك من زمان وابوي مرسلني عليك علشان توصى فيني بالسعر
 قال ادري انك ولد فلان بن فلان آل فلان الشبه واضح ودمكم واحد


* ولد عمي وصديقه *

ولد عمي يقول مره مريت صديقي وطلعنا نتمشى وكلمه ولد عمه وهذاك الوقت كنت توني صغير سن
المهم يوم كلمه ولد عمه قاله ابيك توصلني لمكان ضروري ولازم تمرني 

المهم رحنا له وخذيناه وانا اول مرة اشوف ولد عم صديقي ولا اعرفه

وفي الطريق للمكان الي يبيه قال لولد عمه يا فلان عطني جوالك ابي اكلم ما عندي رصيد
قال ولد عمه جوالي طافي ما فيه شحن
وعلى طول عطيته جوالي يكلم

وخذا الجوال بيكلم ولا كمل المكالمة ورجع الجوال 

وفجأه قال رجعوني للبيت بسرعة لو سمحتوا 

قاله ولد عمه قربنا من المكان الي تبيه
قال رجعني بسرعه 

انا لا حظت ان الرجال ضايق وتغير علينا كانه ما يبي الا فرقانا

ورجعنا لبيته ونزل يوم نزل سكر باب السيارة بقوة 

وولد عمه اعتذر مني قال يمكنه تضايق من شي 

وفي الطريق قعدت افكر فيه وشنهو الشي الي ضايقه 

شوي ورحنا نتعشا وقبل ما ننزل المطعم اجريت اتصال 

وفجأه لقيت في المكالمات الصادرة 

اسم 
فلانه الفلاني 


نفس اسم عايلة صديقي وولد عمه 


 يعني الي ضايقه انه لقى اسم وحده من اهله عندي 
يعني دق على اهله وطلع الأسم مخزن بجوالي 

رجعت لصديقي وقلت له مشينا لولد عمك عرفت تضايق من ايش وبسرعه خلنا نروح لبيته

 وقلت لصديقي ان ولد عمك لقى رقم وحده من اهله عندي

وصديقي قال ليش الرقم عندك ؟؟

قلت له قبل ما اطلع من البيت جوالي كان خربان وحطيت شريحتي بجوال امي واخذته يعني الجوال جوال امي
واكيد امي تعرف وحدة من اهل ولد عمك

وتأكدت من أمي وطلعت اخت الرجال زميلة أمي بالمدرسة 

ونزلت صديقي في بيت عمه وفهم ولد عمه كل الموضوع 

بعد كم يوم قابلت صديقي وقالي كنت بتسبب تفكك أسري


وأتمنى المواقف تكون أعجبتكم 
نوماس

أتشرف بمتابعتكم في تويتر 

 

0 التعليقات: