اعلن معنا

أبيه وسيم وعنده فلوس ..أبيها جميله وأمها ميته...

From: لَيْلٍےّ <miss.dla3@gmail.com>







   دايم تهذر بمدونتها وعلى خوياتها هالمره قررت اسولف عليكم
<<<<اول مره تشارك بالقروب  تراني منذو مبطي مشتركه معكم .... شجعوني ولا تضيعون مشاركتي خخخخخخخخ ....





أول مره  يوقف معي الكلام خخخخ بالعاده من امسك الكيبورد والحتسي يمشي ورى بعض خخخ 
من زمانات الزمان وانا اشوف اعلانات عن مواقع الزواج وماجبت لها خبر عادي الموضوع لكن مع طووول الوقت وطووول الفضاوه وطووول الوقت اللي افكر فيه بكل شي بالدنيا  طرى على مواقع الزواج  ومير اقوم واكتب بقوقل ز و ا ويطلع لي زواج <<<لاه عاد خخخ
المهم ومير هالموضوع يفر راسي يمنتن ويسره واقول خلني اشوف وش سالفة هالمواقع وهل صدز بوه ناس تعرس من ذا المواقع ولا لاء 
وهل هي ببلاش يعني تخيلني فاتحه موقع واقول تزوجوا واوظف خطابات وعلى بلاش وطبعا كعادتي احب الاستطلاع <<<ابد مب لقافه 
المهم ومير اكتب ذاك اليوم موقع زواج ويطلع لي ذاك الموقع اللي يستضيفه ياهو <<<ابد ماعرفتوه   وادخل عليه ولاه يقول اذا عندك حساب في الياهو مايحتاج تسجل بس ادخل من حساب الياهو واسوي نفس الشي وادخل من حسابي الياهو  واروح واحط اني اطلق بنت بذا الدنيا واني اقدس الحياة الزوجيه وكل شي المهم اني اكوس بنت بذا الدنيا وحطيت مواصفات مايصدقها الخبل فكيف العاقل خخخخخ

واقعد افر بذا الموقع والاقي اوادم حاطين صورهم لا وبعد فلان الفلاني وارقام جوالات وايميلات وكل شي بالدنيا  انا خفت بصراحه وش هالموقع حسيته ترقيم عيني عينك   واطلع من الموقع ونسيت موضوع ذا الموقع عقب فتره طوووويله لقيت بايميلي ان موقع بنت الاكوس الناس هههههههههههه  طلعت ميزه اني اقدر انزل صورتي <<<<< لهم حق بصراحه يطالبوني بصورتي  خبركم يخافون اغشب عريس الغفله  خخخخخخخ المهم قلت مابدهاش خلني اشوف وش السالفه ولاهم بعد حاطين ميزات ثانيه الا وهي  اذا ابي احط جوالي وخاصتن للشباب معناته لازم ادفع فلوس واذا ايميلي لازم فلوس وبعد نكلم بعض مسن لازم فلوس  واني اقدر اتواصل بسرعه مع العروسه ولا بعد ايداع في بنك سامبا ومدري وشو الثاني ناسيه لا ومسهلين الامور يعني اقدر ادفع لهم عن طريق بطاقات كاش يو الفساد صار سهالات ماعاد هي مثل قبل  لازم تفكير وتخطيط ولازم روحه وتعني وحاله  ...

 
وتقعد الافكار تروح وتجي  واهوجس يعني هل الموضوع جد هل فيه احد بيدفع فلوس عشان الفساد يعني بدفع ذاك المبلغ عشان اقدر ارقم البنات <<<لان لقيت مواقع كاتبين اكبر موقع لتعارف الشباب والبنات  هالموقع كاتبيه عيني عينك يعني لا موقع زواج ولا غيره تعرفوا ودجوا بس اهم شي تدفعون حق الدجه ماينلامون بصراحه تعنو وكلفوا على انفسهم انهم فكروا بعيالنا وشولون يدجون 
محد له حق يلومهم في الفلوس اللي ياخذونها ابد ابد ....لا عاد وماشفتوا ذاك الموقع اللي يبي من  يبلغ هيئة الرقابه عشان ينحجب .اجل يدعوا للعنصريه والتفرقه بين ابناء الوطن العربي لا والخليجيه ذاك الموقع كاتب اكبر موقع خاص للسعوديات والثاني كاتب الخليجيات وحاطين بخط صغيرون  والمقيمين    .......

ومن هذا المنطلق قعدت افكر واقول ورى ما افتح لي موقع زوواج واحط ارخص رسوووم مانيب مكلفه على احد هماني بربح فلوس  وانا قاعده بيتنا خخخخ وفوق هذا انا قاعده اصقع راسين بالحلال   ...عاد هالمشروع تكاليفه جدا بسيطه وماتسوى من يحتسي عنها لكن الارباح خطيره وتغري بصراحه  خلوني احسب لكم بس  في 3 شهور ويكون الاعضاء وخاصه الشباب  300 شاب  

يوووه شلون نسيت اقول الاسعار بذا المواقع ...طبعا في 3 شهور من غير اي مميزات 200 ريال ..ومع المميزات 300  
ومده 6 شهور  300 من غير مميزات ومع مميزات 400 ..وطوال العام 600 ريال مع المميزات ..

انا الحين بحسب حق 3 شهور من غير مميزات ^_^  
قلنا 3 شهور (200*300)=(60,000) ريال بس  الله يديم الرخص   
طيب لوقلنا 6 شهور من غير مميزات (300*300)=(90,000)  يالله وش هالحلات  يعني لو نفس هالاعضاء استمروا لست شهور ولا سنه ولا نص هالاعضاء مو كلهم بشتري لي بيت  وبعد وش بسوي يمكن اسوي كل شي  <<<<الا يمكن تمسكين الريال ماتخلينه يطلع خخخخخخخخخخ  عاد البيت يمكن اشتريه اذا خذوا كل الميزات وقعدوا سنه كامله <<<استخفت

وقعدت اهوجس الدومين على الاستضافه كلها ماتاخذ مني 1000 الى 1500 لكن المكاسب  تخلي الواحد يتسخف   

 وبما اني بفتح ذا الموقع اخذت اراء كل ابو الناس اللي اعرفها واللي ما اعرفها  خخخخخخخ 

بعض اللي سألتهم موتوني ضحك من اقولها وش رايك بمواقع الزواج على طووول ماقد دخلتها  ولا اللي تقولي اصلا ما اعرفها مدري وش فيها يعني اثبات اننا بريئات واخلاق خخخخخ مايحتاج ادري لبى قلوبكم ..... طبعا انا اخذت اراء الجنسين ذكرا وانثى <<<مقدر على هالحتسي 
 البعض كان جوابه حلو ومقنع والبعض كأنه يعطيني رد وبس وخاصتن لي قلت انه لمدونتي مابوه حماس ابد خخخخخ والبعض الاخر لا والله حسسوني كأني اسوي شي مهم جدا جدا وان منه فايده كبيره  ..... 

هذي نظرتهم ورايهم لهذي المواقع :
ايمان :يعني بصراحه مااحس انهم يوفقون فعلا بين شخصين
*وان يوفقو فاكيد بيتطلقون
*هاذا احساسي
*مااثق فيهم
اجل بس يلعبون على خلق الله
*اللي يبغى يلعب بيروح لهاالمواقع
تزوج فتره يوسع صدره
*وبعدين يطلع
*يطلق
...................
ورده مفتحه (SHado):مواقع دعاره مقنعه .....واشخاص اخرون :ماله هدف وفارغ وسخيف وزواجهم  مايتم وان تم ماينجح 
...................
وين نوره عندك :امممم مدري غير موافق للشريعه ..اغلب اللي فيها غير جادين عشان كذا اكتسبت سمعه مو كويسه ..وبس  <<<اسمها بجوالي خخخخخخ (جوجو)
...............................
أموووله :ترويج للفسق لان بعضهم يدخلون مسووين زواج واهم 
................
يويو :هههههههههههههههه سخيفه وغير موثوقع وموقع لضعاف النفوس او اللعابين هذا بالنسبه لمجتمعنا ....مجتمعات  اخرى يكون شي عادي عندهم وياخذونه على محمل الجد 
...............
بيتو :مواقع غبيه وسخيفه ....ولما قلت لها انهم ياخذون رسوم على الشباب قالت وجع حقارير اصلا وش البنت اللي تبي تثق بالاشياء هذي واضح انها خرابيط .....وبعد مانقحت رايها قالت :مواقع تافهه ومتخلفه وهدفها غير واضح ممكن يكون اباحي حتى وفيها استغلال للناس واشوفها  ماتبعد  عن مواقع التشات  وغيرها لان كلها  تعارف بعيد عن مراي الاهل ..وغالبا اللي يلجأجون لها يكونون  من حثالة المجتمع
..............
(ام شدن ):اعتقد انها مواقع نسبة الصدق فيها 1% خصوصا وان نسبة المسجلين فيه الغير صادقين تطغى على نسبة المسجلين اللي غرضهم فعلا الزواج ..واعتقد الشباب  الان والبنات صار عندهم وعي لمثل  المواقع هذي وماصاروا مثل اول ونادر مانسمع اثنين تزوجوا عن طريقه الا اذا كانوا اجانب..اللي ابي اقوله ان العادات والتقاليد  لها دووور كبير في نجاحها او فشلها .
..............
Fahad_Sh : . انا اعتقد انها مواقع فاشله ونسبه نجاح الزواج منها اقل من ١٪ لانها عالم وهمي افتراضي واغلب اللي فيه ممثلين بأقنعه
........................
m_almutairi:عن نفسي مااعترف بمواقع الزواج وحتى اغلب العوائل مايرضون فيها .. بس اللي مالها الا هي يعني ماتوفقت او ماصار لها نصيب .. مالها الا هالمواقع بس للي مقطوعين من شجرة او للي ماجاهم نصيب وفقدوا الامل بالحياة
................
HeRaiRo
 اذا تقصدي مواقع الزواج الالكترونية، فأنا ما اشوف انها أنشأت للزواج بل للتعارف.مثل ما قلتلك هي للتعارف فقط و مو هدفها الزواج او يمكن انها استخدمت بشكل خاطئ من الشعب، وجهه نظر يمكن تكون صحيحه و يمكن العكس
...............
ميمو:مواقع الزواج لايمكن ان تحقق زواج ناجح لان سيخالطها الشكوك فطبيعة العرب لايمكن تغيرها مهما اختلفت الجنسيات فسيظل في شك دائم ومجرد دخول الشك في زواج ولو بشئ يسير معناه اوشك على الانتهاءلكن التوفيق بين الازواج شي حلو وممكن يخلق فرص زواج وحل مشاكل العنوسه لكن بتغير استراتيجيه المواقع وتكون تحت جهات رسميه بكذا ممكن نكون حققنا فائده للمجمتع...........
.............................
أراء اخرى :
شخصيآ من المُعآرضين لِ مثل هذهِ المَوآقع
ولكن لكي لآ نبخسُهآ حقهآ فَ بالتأكيد هُنآلك بعضُ الإيجَآبيه التي تخرجُ منهآ
ولكن برأيي أنَّ السلبيَه تغلُب..

هدف الشَبآب عمُومآ هُو التعَآرُف وَليس الزوآج
ولآ أعتقد من الحيآء والقيَم الإسلآميَه أن تقُوم فتآة مُسلمَه بعرض موآصفآتهآ بُغية الزوآج أو غيره .
.....
مدري والله بي يعني مثله مثل الخطابه :) .. .

يعني الخطابه نفس الشغل .. .


وانا ماتعجبني الخطابه .. .


بس تراها .. . ابدا مو شينه ..


اهم شي يكون الموقع صادق مايلعب بالناااس ..
.....
رأيي عن هالمواقع مايعجبوني لانو اللي يبي يخطب او شيء يروح للبيت

مو يدخل مواقع ومدري شنو وبعدين اتحداهم اذا عاشوا مبسوطين لانه الثقه راحت :)

كمان له ايجابيات هالموقع بس سلبياته اكثر وتأثر اذا حصل الارتباط او ماحصل :)

من رأيي حتى الشباب نفسهم يوم يشوفون البنت كيذا يغسل يده منها :)

حتى البنات بعد فترا تلاقيهم ملووو من الموقع وانسحبو منه لانه عرفوا الحقيقه من انفسهم ~ْ

شكرن لك ولطرحك .. 
......
آي دونت نو .. في سلبيات وايجابيات للموضوع ..

اول حاجه ,انا بوجهة نظري مايتجه لهالمواقع الا اللي يأسوا ومالقوا مطلبهم .. سواءا البنت ولا الشب ..
ثاني حاجه ,الثقه بتكون ضعيفه بين الطرفين ..

عموما هو موقع للزواج .. يعني ممكن يحدث معجزات

اللهـ يوفق الجميع 
.....
دائما نظرتنا لأي موضوع تكون من زوايه وحده
عمرنا بالسعوديه مانظرنا للموضوع من جميع النواحي
انا عني بلعكس مع وجود مثل هذي المواقع لكن مو اي موقع يبي يفتح نروح يمه
المفروض يكون فيه موقع رسمي خاص من موسسه خيريه معروفه ومو مشكله لو ان الدوله تفتح مثل هذا الموقع ويكون في ناس متخصصين ومسؤلين عن كل كلمه تنكتب وتكون المعلومات سريييه للغايه
ياما بنات وشباب محتاجين يتزوجون
مثال اقلك عليه لنفرض ان في ولد ابكم ويبغى يتزوج وماقلى لافي ديرته ولالقى في المجتمع
وين يروح يكتب لافته في الشارع ويقول انا ابكم وابغى اتزوج وحده تكون مثل حالتي وترضى بها ولا افضل انه يدخل الموقع المعين لمثل هذا الموضوع واكيد بيلقى
وللي كمان حالته الماديه زفت وتعرف مهور السعوديه انت كيف غاليه وهو مايقدر يدبر عشى ليله ويبغى يبعد نفسه عن الحرام وش افضل انه يروح ياخذله وحده اجنبيه من برا ولا افضل يروح موقع مثل كذا يلقى كثير من بناتنا يبغن الستر ومايهمهن الفلوس
بس المشكله مجتمعنا المريض وحركات بناتنا وشبابنا السخيفه اللي مافي مكان في ذا العالم مادخلوه حتى المواقع العلميه وماتبادلو فيها النكت والارقام
انا ودي ان يفتح مثل هذا الموقع ودي نعف كثير من بناتنا وعيالنا ونبعدهم عن الحرام الله يكفينا واياكم الحرام
يعني الواحد لايستحقر اي بنت او ولد يرجع لمثل هذي المواقع او يرجع للخطابه لانها مايدري عن الحياة اللي هو عايشها 
(هالرد عجبني جدا  )
........
موضوع حمآاسي :)..

طبعآ آنا من المعارضين لمواقع وقنوات الزواج ..
في البداية ماكنت آهضم الفكرة /لان برآيي مآافي آفضل من الزواج التقليدي من جمييع النوآحي ..

وآتوقع آغلب اللي يسجلوا في هالمواقع ، هدفهم تسليه لا آكثر ..

آذكر لك قصة ، لصديقتن لي :د < الله يوفقها ويسعدهآا ويذكرها بالخير
البنت هذي مدري وش بهآا صراحتن رغم صغر سنها ..جتها فترة جننتنا ابغا اتزوج طيب غصب بتزوج ..
حتى آني نقدت عليهآا والله :) .. ورعه تبي تتزوج غصب
وآنخطب كم مره وتتفركش الخطبه ،لسى نصيبها مآجا ..

الموهم ، وتطيح بقناة زواج .. وتقوم وترسل اشتراكها .. ومعلوماتها ومواصفاتها بنت الحلال
طبعآ لقت من عطاها وججه / وكلمتهم لين مارست ع واحد كبير
آوهمها انه بيجيها ويخطبها وآنتي آعجبتيني من مواصفاتك و.و.و. . .
وخلاها ترسل صورها :)

وبالاخير طلع تسذاااااب ابن تسذاب / ولا حتى يفكر يتزوج من المواقع ذي اصلا ..
بس الححمدلله البنت جاها نصيبها (زواج تقليدي) طبعآ.. والله يوفقها ويستر عليها ويسعدهآا

الزبده / المواقع والقنوات ذي لو يقفلونها ويممنعونها آحسن لهم والله ..
لانهآا كلها صارت لعب x لعب .. ناس تبي تسلى لا آكثر ..

..........
موضووع جمييل صراححهَ ،

انا من المعارضين لهآلموققعَ صرآحه لان مآفي زوآج يتممَ بهالطرييقه ، واذا تم هآلزوآج كله ايآم والا اشهر بالكثير ومنفصليين عن بعضَ ، مآيدوم أكثثررَ ، لآن مآفي ثققه بين الطرفييينَ ، او بالاخص ان الزوج تطييح من عيينه الزوججهَ مع الايآم لانه بيتذكر كيف كاانت طريقه زوآججهمَ ،


اللي بيفككر بهآلزوآج ليت يكنسل هالفكره من رآسه وينتظظرَ نصييبه يجيهَ لآنه ماراح ينججح أبد هآلزووآجَ آلآ بمشيئئه الله ،
:) 

........
كل واحد له وجهة نظر ؛
وانا من المعآرضين .. لأن سلبيآتهآ أكثر من الايجآبيات
........
آنآ ضدهـ لآن آكثرهم يكذبون هذآ آولآ :)

بعدين مين هذه آللي بترضى توصف نفسهآ وشكلهآ هذآ آذآ مآ طلبو منهآ بعد صوره خشتهآ آو جسمهآ كله قدآم آلآف آلآشخآص بدآعي آيش آلزوآج هذآ ثآنيآً :)

ثآلثآ وهو آلآهم يآليت يمنعون هآلموآقع
:) 
...........
هالمواقع منتشره وبكثره بالفتره الاخيره وانا اكيد من المعارضين له
لأن لو صآر نصيب بين الطرفين علآقتهم ماراح تطول لنعدام الثقه و لاختلآف البيئه والتربيه وغيرهآ كونها رضت عبى نفسها انها تصف نفسها على العالم والي مايشتري يتفرج
:) 
............
اللي يبيني يجيني
مو زين البنت تسوق روحها !! 
 ..............

أحس مــآإبهآإ ثقة والشك لازم منه
وفأي مشكلة رآإح تصير مهما كانت صغيرة راح تكبر وتسير حاجة يذلو بيها بعض 
 ...............
موأإأإقع فاااشله بصرأإحه :)

اصصلن مأإيخششها الا بنأإأإت .....
............
مع وضد

بنات هاليومين ما تهمهم الا المظاهر وهذا وش عنده وكم راتبه وما يرضون باي وايد يعني هالرجال لازم يتزوج اجنيه عشان ما يروح للحرام وما بيده الا كذا

والله يعلم اذا هالاجنيه بتسعده ولا بتعفس حياته

وفي بنات ما عليهم كلام بس مو لاقيين .. فمافيها شي لو دخلت بكل احترام وحدود موقع موثوق منه

والشي الثاني المهور اللي كنها اسعاار فراري .. ليش الرجال بيتزوج ولا جاي يشتري سلعه

اتقوا الله في بناتكم 
..............
مدري ولله بس احس انو مايصلح مره 
.......................
العهده على الراوي خخخ:تقول لك اختي دانوه
في وحده تعرفت ع وآحد من موقع للزوآج
وكآن صآدق معها
وطلب منها رقم البيت حقهم

وامه كلمت امهآ
وحددو يوم ووقت

ويوم جآها من الريآض

وجلس مع ابوها

ابو الولد رفض لانه ه قبيلي وهي مو قبيليه

 ...........................






ضددددددد طبعن
كنك خاش ع حراج خشي يابنت وتنقي زوج وطبعن بتدور ع الشكل ، بدون متعرف وش النيه وش السوابق :| 
.............
البدآيه شفت دبلتين قلت الولد آعرس من ورآي بعدين قريت الحتسي عرفت الطبخه :)

يالييييييييييييييييل موآقع الزوآج ذي ورآ مآيطلعون موآقع طلاق آطلز :) <-- برااا

لالااااااااااااا آدري يآفزفز عصبت وبتشوتني خخلاص توووبه

خلاص جينآ للجد والله <-- رشووو تتربع وتجيب النعنآع عشآن تتسلطن يعني

شوف آنآ مآرآح آسوي زي بعض النآس وآتفلسف ..

آنآ بقول نصيحه مني لوجه الله .. وعن تجربه شخصيه ..

موآقع الزوآج .. والتعآرف ( الفيس - تويتر - اللوق ....الخ ) - الشآت

والله ثم والله مآورآهآ فآيده لا حب ولا زوآج ولا بطيخ منيل علي خشته

ليه ..؟؟ سآلتني ليه ..؟

لآن اللي دآخلين ( مهوب الكل البعض ) دآخلين تسليه وتضيع وقت

آكثر من قصه وآكثر من شغله صآرت بموآقع الزوآج .. لي ولصديقآتي

بدآيتي مع موآقع الزوآج مع صديقتي كآنت لغرض الآستكشآف مو مثل مآالغير يفكر ..

دخلت بمعلومآت مزيفه عشآن آشوف والله آكتشفت والله آن كلهم نفس الطبعه

آبي آتزوج آوكي حلوين آلين هنآ طيب عشآن آعرف تنآسبيني ولالا آبي آقآبلك

وطبعآ هنآ الكآرثه ..

لآن البنت الغبيه اللي بتعطيه فرصه وتقوله آوكي وتروح بسآلفه ديت بدل الزوآج ..

ورجعت حذفت اليوز وسجلت بآسم ولد وشفت بلاوي من البنآت البعض آحسهآ مسكينه

زي الغريق المتعلق بقشه .. والبعض تدور شحن وخرآبيط وخرفآن وتضيع وقت ..

وكله من عمرنآ وذنوبنآ ..

سوري ع ـالآطآله بس آتمني اللي آبي آوصل له وصل لكم ..

آستغفري وآدعي ربك وبيجيك نصيبك الين عندك .. رزقك تذكري محد مآخذه غيرك ..

وآتركي هالموآقع عنك .. 
...............
ضد هالشي وبقوه
صعبه اروح لـ شخص اقول له تزوجني :)
وش بيضمني ان اللي بيجي واحد كويس ؟
وانه يكون صادق بهالشي

اعطيه معلومات كامله واوثق فيه وزي كيذا
ويمكن يضرني مو ينفعني

ومن يومين وحده تقول لي عن وحده من النت تدخل هالموقع

ان في شخص يقول لها مستعد اتزوجك بس
تكلمين شباب وتجلسين مع اخوياي

خير وين جالسين في بتزوجك ولابتزوج اخوياك انا :)
 
................
آممم ما اقتنعت بهالمواقع
آحسها حكي فاضي
والاغلب فيهم يستهبلون
يعني مافي شي جدي بس كلام
وولو صار وتززوجو 100% راح تصير بينهم خلافات كثير
لن مافي اتفاق بينهم
والي كان يربطهم مجرد شاشه وكلام ماله اي معنى
:)
 
.................
والله بالنسبه بهالمواقع :

ان الفائده منها قليله ان كان فيها فوائد
ان الشخص الراغب بالزواج ربما يجد الجمال ولاكن هل سيجد الاخلاق ؟؟
ان هذه المواقع ربما تستغل بعض روادها من السذج بسرقة نقودهم ( قريشاتهم ) وهذي صارت تسثير مرره

ان الكمخه اللي خاش وش يخليه يضمن ان اللي وشسمه ذا ضاعت المعلومه

ان ووشسمه ياخي احس ان كل الل يصدقون هالامور زلايب مع احترام يعني وش فيها يوم تروح تقول لاهلك انك بتخطب بالعكس بيفرحون وبينقون لك نقووة حلووه مرره

ان يوم يطرون لي موقع زواج تدري وش يطري في بالي

(( بنت تتسذب على شاب .. شاب يتسذب على بنت ))

وهذا كل اللي عندي
 
........................

موضوع حلو :)

بس المواقع هذي أحس فيها نصب كبير في العمر والمواصفات حتى اكثرهم اذا تزوجوا من مواقع مثل كذا ما يتفقون يعني ما يطولون لول

يعني بالعربي (للشعب السعودي ما تنفع ) :)

<<وده يستهبل بس خايف انه يتصفق :$
 
.....................
والله بالنسبه بهالمواقع :

ان الفائده منها قليله ان كان فيها فوائد
ان الشخص الراغب بالزواج ربما يجد الجمال ولاكن هل سيجد الاخلاق ؟؟
ان هذه المواقع ربما تستغل بعض روادها من السذج بسرقة نقودهم ( قريشاتهم ) وهذي صارت تسثير مرره

ان الكمخه اللي خاش وش يخليه يضمن ان اللي وشسمه ذا ضاعت المعلومه

ان ووشسمه ياخي احس ان كل الل يصدقون هالامور زلايب مع احترام يعني وش فيها يوم تروح تقول لاهلك انك بتخطب بالعكس بيفرحون وبينقون لك نقووة حلووه مرره

ان يوم يطرون لي موقع زواج تدري وش يطري في بالي

(( بنت تتسذب على شاب .. شاب يتسذب على بنت ))

وهذا كل اللي عندي
 
.......................
اناا اشووف
انها ما تصلح للسعودين :)

و احس ان العلاقه بينهم ما راح بتستمر لمده طويله :)

وغير كذاا المواقع هذي كلها نصب في نصب واغلب الاعضاء وهمين ..!! :)

وبعدها تدخل الموقع وتبحث وتشووف صور ووو
لاكن
لما تبي تتواصل مع الشخص اللي تبيه يقوولك اشترك وادفع ووو
يعني هدفهم معرووف (مااادي) :)

اناا رااي ان بناتنا السعوديات غاليات ومو رخيصاات علشان يسجلون بالمواقع هذي :)

و اشووف ان الخطابات اهون وافضل واستر من مواقع الانترنت :)
 
............................

كلامي من وآقع تجربه وآستفتآء وآحصآئيآت ودرآسه درسنآهآ آنآ ومجموعه بنآت من الجآمعه في منطقه ينبع ..

كل الشبآب مآقولك السعودي الا المجتمع الشرقي بصفه عآمه مستحيل يتزوج بنت يعرفهآ قبل الزوآج مستحييييييييييييييييييييل لو تزوجهآ تلاقي فيه آشيآء غلط

يآآنه بيطلقهآ بعد الزوآج بكم شهر آو آهله مآيبغونهآ آو مسوي بلوه ويبغي يستر نفسه وبعدين يطلق

وفي كل الحآلات الضحيه الشآب والبنت نفسهم مآدروآ آن هذآ اللي يسونه من الفرآغ وعدم العقل نسآل الله السلامه
 
....................
الحمد لله والصلاة والسلام على نبينا محمد وعلى آله وصحبه وبعد :
هذا يفتح بابا من الشر والفتنة، لا يجوز أن توضع صور الفتيات على الإنترنت لمن يرغب في الزواج، وكيف يجوز أن تجعل صور المسلمات وعناوينهن الإلكترونية عرضا عاما مستباحا لمن يرغب في التمتع بالنظر والتعارف، ولا يصح الاحتجاج على هذا الفعل بجواز النظر إلى المخطوبة، لان في عرض الصور تمكينا للخاطب وغيره من النظر، وحتى الخاطب لا يجوز له النظر إلى المرأة بهذه الطريقة لان جواز النظر متوقف على حصول غلبة الظن أن يجيبه أولياؤها وذلك لا يعرف إلا عن قرب ثم بعد ذلك يجوز له النظر إليها

والواجب أن يكون ثمة لجنة من الموثوقين، ويشرف عليها بعض أهل الفضل والصلاح والأمانة، وتقوم بسرية تامة بحفظ معلومات ـ دون صور شخصية ـ لمن يرغب في الزواج، دون نشر أي شيء نشرا عاما، وإنما ترسل المعلومات شخصيا، دون صور، ويدلون الراغبين لمن تصلح للزواج، كل في بلده، دون إرسال صورتها أو بريدها الإلكتروني، وعليه هو أن يذهب إلى أولياءها خاطبا، ويتحرى عنها، ويطلب الإذن بالنظر إليها، أو ينظر إليها إن غلب على ظنه إجابته، وتكون مهمة اللجنة القيام بالخطوة الأولى فقط، أما أن ترسل له صورة الفتاة ويتعرف عليها عبر الإنترنت ويقيم علاقة معها، وقد يحدث مالا تحمد عقباه، فما هذا العمل إلا أشبه بالسعي بالفساد والفواحش بين المسلمين تحت ذريعة التزويج والله المستعان.

والحاصل أنه إذا كانت اللجنة بالشروط المذكورة فلا بأس بالتعامل معها للتزويج وليس فيه إن روعيت آداب الإسلامية حط من كرامة الفتاة وإن كان الأبوان لا يرفضان بل يكرهان فلا باس، ولكن أؤكد جدا على الضوابط التي ذكرتها في الفتوى...
 

--
 ماش ماعجبتني الردود يحطمون  منتب مخليني اترزق منكم  لي فتحت موقعي  
P.S:مشكورين جداجدا لكل من رد وتفاعل معي وعذرا لبعض الاراء ماكتبتها حسيت جوابهم مو يم كلامي يمكن كان صيغة سؤالي غبي ومو مفهوم بس فيه كثير ردوا علي وعرفوا وش ابي  ...(شكريا لكل صقيقني في تويتر والفيس بوك والبلوجرين جدا جدا )




0 التعليقات: