اعلن معنا

شايف الغبن صابر


انا المواطن شايف الغبن صابر ( ١ )ـ


السلام عليكم ورحمة الله وبركاته

سبحان الله وبحمده ،،، سبحان الله العظيم

كل عام وانتم بخير 
ومباركً عيدكم
نسأل الله لنا ولكم القبول

قبل أبداء الي مايبي البربره الزايده يطمر للرد الثالث

احياناً الواحد قبل النوم يجلس يتذكر أشياء وسوالف،
تذكرت قبل شهر وانا جاي من المطار على اخر الليل ومعي اخوي
قال شوف ياصحاف بنأخذ تاكسي اما هذولا الكداده تراهم قلق وغثى ولو تنسى شيء بسيارته وين بتلقاه لو بترجع تتدوره
قلت له لابناخذ الاندرقراوند احسن وش رايك << امش بس الله يصلحك
المهم قلت له شورك وهداية الله 
اول ماطلعنا برى الصالات
جانا واحد من هالكداده وبصوت خافت ..... تاكسي شباب
والثاني يمر يشطفك وبرضوا عشان محد يسمعه سياره شباب
وكلهم نقول لهم لا لا مشكور


يوم رحنا للتكاسي الي صافه برى ,,, الا في اول واحد بالسرى موقف سيارته ورافض يحركها

وزي ما انتم عارفين ,,, برى طبعاً في شركه تنظمهم
هنا لا ،،،، كل واحد راكب راسه ويدور له زبون ساكن أبعد نقطة عن المطار

يعني لو تجي تقول له مثلا الحمرا او الروضه او التعاون الازدهار .... الخ من الاحياء الي شمال وشرق الرياض القريبه من المطار
يرفض طويل العمر يبي زبون للعريجاء او برى الرياض .. الخرج او المزاحمية .... الخ ,,,, ولا في احد طبعاُ يقدر يقول له بررم

خلاص يجلس بسيارته ومايحركها ,,,, عاد المشكله لو طحت لك بواحد مثل الي طحنا فيه
يبي امريكي ويوصله للسويدي يلله حلهااا وين تلقى له هالامريكي


المهم كتب الله الرزق لواحد بعد ماطفشنا اول تاكسي رافض يتحرك وركبنا مع واحد من الكداده
الي كنا رافضين نركب معهم بالبدايه وحنا مكسورين الجناح


طبعا بحكم انه سعودي 
مستحيل يشيل شنطتك يركبها بالسياره لازم انت تشيلها ,,,,, يلللله امرنا للله
سألنه وين سيارتك يالحبيب ؟


قال قرررريبه تحت بأول المواقف امرنا لله ندف العربيه لتحت يوم نزلنا تحت طبعا لاكانت قريبه ولا قاله الله
وسيارته كانت فورد قديمممممممم جداً ( الله يرزقه ) ( للي مايعرف الفورد امريكي ترى << ترى له غايه من ذكر هالمعلومه بتلاحظها إذا كملت )
 والسياره مظلله ومكتوومه تقول راكبيين مع مهرب
المشكله نزلنا تحت معاد يمديك تهون وش حادنا نركب معه ثم تتطفى علينا السياره بأي مكان بهالفجر
بس يلله الله يستر
اتكلنا على الله ومسكنا طريق المطار رايحيين البيت
ان اقول شكلي بنوصل البيت على اذان الفجر وابوي طالع بيصلي مستحيل بيقول اننا جايين من سفر
بيقول من ذا المهرب الي مسووين عمليه معه ومنزلكم
وحنا بالطريق بداءت السياره تتفتف
>> للي مو فاهم يعني تقطع كأنها بتطفي

قلت له وش السالفه يالحبيب
قال لااااا عادي بس يبي لها بنزين ، اشوا ان محطة المطار قريبة ، ولا لو طفت في مقطعه بأخر الليل حتى تكاسي مافيه

عاد هووو شكله الله يديم النعمه مدري وش حدنا نركب معه ، يمكن يوم جانا خفنا نقوله لا ماحنا راكبيين


وصلنا محطة المطار وأخذ فلوسه مقدماً طبعا عشان يحاسب
واول ماطلعنا من المحطه والله يمكن ٨٠٠ متر الا في واحد يأشر بيده على طول اووووع <<< صوت الفرامل ذا
وقف الرجال عند الي يأأشر بياخذه معنا 
قلت له وووووين عسى ماشر وراك وقفت
قال بناخذه معنا نكسب اجر
قلت له ومالقيت تكسب اجر ومسكت معك على الإحسان الا وحنا معك زباين
امش بس بلا اجر بلاخرابيط
المهم انه سمع كلامنا ومشيينا ولا اخذه
وحنا بالطريق الا بدت سيارررته تتفتف مررره ثانيه

ياللليللل الليللل

وش ذا الليله الي مدعي علينا ، من رحله وش طولها على هالكداد الي انكبنا فيه

قلت وش في موترك ؟
قال ضحك علي ابن الحررررام  <<<< طبعا بدون اي مقدمات لووووول
قلت منهوو ؟
قال السوري قايلله .... ركب لي طرمبه ( طرمبة بنزين) وماركبها زين
قلت وين باي صناعية , قال بالخليج , قلت وانت ماخذها اصليه ولاتجاريه ؟
قال: تسيييييف ( يعني كيييف ) ، الا اصلية انا ما اشتري لموتري الا اصلي ، اذا مالقيتها مكسيكيه ما اشتريها 
لازم اصليه. <<<<< ههههههه اجل مكسيكية يخرب بيتك ياشيخ


عاد هنا عرفت انه ماعندك احد أن للصحاف ان يمد رجليه
قلت له اخاف ضاحك عليك ومركب لك تجاريه، تراهم هالايام يركبون قطع كولومبيه ويقولون لك مكسيكيه
قال لاااااا متأكد من الفاتوره مكتوب مكسيكيه <<< مُصر الرجال انها اصليه ومكسيكية

قلت والله مشكله الواحد يخسر ويركب قطع مكسيكيه اصليه وتخرب باليوم الثاني
قال برجع للسوري الخسيس بكره واشوف وش مشكلتها ,,,,, واقول في نفسي الله يعينك يهالسوري

عاد الحين انبسطت عليه وتمنيت يمسك بي خط للشرقيه مو البيت
الرجال راعي سوالف وواضح انه ماتعوق معه النصبه
المهم الرجال مسرررررع طاير الظاهر يبي يرجع المطار ياخذ زبون ثاني 
وارقابنا ( اعناقنا ) بالسياره شوي وتتكسر من التفتفه 

عاد ودي اروعه واخوفه ابيه يهدي قلت له هدي يابن الحلال لايلقطك سهر
قال تصدق قبل اسبوع مسددهم ب ٥٥٠٠ ريال الرجال مافيه طب واضح انه نصاااااب


قلت له هد يابن الحلال لاتسرع


قال تدري الي يسرع بامريكا وش يسوون له؟
قلت حلووو بيبداء يتفلسف خليني اعطيه جووه

قلت وش يسوون ، قال اول مايوقفه المرور مافي شي اسمه رخصه واستماره وقسيمه
عاد انا عايش الموقف ومسوي نفسي منذهل اقول اجل وش يسوي


قاال على طول يقوله المرور ٥٠٠ ريال (طبعا مايعرف الدولار هو ) كاااااااااااش
قلت كاااااش ,,,, قال على طول مافي مثل هالخرابيط سدد شهر وبعدين تتدبل
لااااا هذولا ناس متتطورين مافي الا كاش عشان يحس بخطأه في وقتها
جلست اعطيه جوووه ، قلت والله هذا النظام الصح
عاد هو اول ماركبنا بيتأكد من وين حنا جاييين بالرحله وفقشت عليه قلت دبي وجت من الله الرجال بدء يتفلسف علينا وتحاشى دبي

المهم استمر ابوشلاخ بنصباته
قال هما العالم الي برررى ، مطووورين <<< يعني متتطورين

الله يرجه والله انه تحفه

قلت ايووه اسلم ، شكلك تعرف انظمتهم والي يسرع بألمانيا وش يسوون فيه
قال المانيا : واعطاني نظرة ازدراء ومدة لسان بسيطه مع اخراج بعض الصوت المسرحي
المانياااا غيرررر
قلت ليش
قال المانيا الي يسرع بعد يغرمونه كااااش اول مره بحوالي ٥٠٠٠ ريال اول مخالفه
المخالفه الثانيه يصادرون السياره
انا: يصادرووون السياره

قال: اي هذي المانيا وش فيك والله ان ولد عمي فيها
لووووول الله يرجك انت وولد عمك
قال وفي شيءً عجيب بالمانيا
قلت وشووو
قال تغييير الزييت ( قصده تغيير زيت السياره)
قلت ايه وش فيه بعد
قال لو تبي تغير زيت سيارتك لازم تأخذ موعد وبعد اسبوع تجي تغير الزيت ,,, ناس منظمييييين موب على كيفك اذا مسكت معك تغير زيت سيارتك تروح للبنشري
لوووووووووووول اقسم بلله انه حفله

وانا اقوله اهبببب والله هذا النظام موب عندنا


قلت له هذي المانيااا ,,,,,, وشلون اجل بريطانيا <<< ناوي يمسك به خط
قال ياقوووووم
بريطانيا هذي عندها علوم لو بهرج عليك منياااا للحجاز ماخلصت <<< واضح انه ماكان مجهز لسؤالي ههههههه لووول الله يرجه
قلت له اجل وشلون اليابان ونظامهم
قال لاااااا اتركك من ذا الفطس هم وعويناتهم تراهم مثل ربعنا همج
قلت وينك يالشقيري بس تسمع ,,, اشلغتنا ليش مانصير زيهم وهم ضاحكيين عليك العلم كله عند هالكداد

اتوقع الشقيري لو شاف هالكداد ... قال شوفوا سواقينا كيف يبربروا وسواقين اليابان كيف ساكتين

ليش مانصير زيهم

وصلنا البيت بحمدالله وسلامته ، بالبدايه كنت كارهه وكاره سيارته لعنت الساعه الي ركبت معه
وبعدها تمنيت والله ان البيت ابعد




خلال هذه الرحله الشيقه مع كل هالسوالف نستني بصراحه للحظات العناء والجهد الي واجهناه في المطار
مطار العناء والقهر, وبصراحه مابغيت اكتب هالموضوع ... لكن بعد وقت أبت نفسي الا ان اكتبه <<< متعوب عليها أبت
راح أتكلم عن وقائع حدثت امامي وأكيد الكثيرررر منا شافها في المطار،
قبل شهر تقريباً كنت بمطار الملك خالد الدولي ، كانوا في السابق ايام غصب واحد وغصب اثنين يضحكون علينا
ويطبلون بأنه اكبرر واحسن وافضل واسرع واملح واجمل و و و و ... الخ مطار بالعالم
يوم طلعت علينا القنوات التلفزيونية والناس تحسنت حياتهم أحوالهم وصاروا يسافرون ويشوفون ... اتضح انه لا اكبر مطار ولا انظف مطار ولا قاله الله
بل الأصح أزبل وأسوء مطار

لو بنتسأل المسئولية تقع على من هنا؟
على مدير المطار مثلاً ، اترك لكم الإجابة
انا ما اتكلم عن ميزانيات وامور نفترض انها مو موجوده مع اني أكاد اجزم بأن عقود النظافه والصيانة بالملايين وكل شيء موفر ماقصرت الدولة.
ماراح اتكلم عن النظافه بنتركها على جانب، بتكلم عن امر والله لايحتاج اي اختراعات ولا انتدابات ولا اجتماعات
 ولا ورش عمل ومن ذا الخرابيط الي تستنزف المال والهبات الشخصية التي يبحث عنها بعض المسئولين.
بالامس أقسم بلله الصف (الكيو, الطابور, اللاين) الخاص بالمسافرين الي بيقصون البوردنق باس (بطاقات صعود الطائرة) والعفش
 قسم بلله انهم وصلوا الى خارج الصالات !!!
ياناس مو معقول !!!
سرررررى وش طوله برى المطار !!!
ولا في احد ماكلها صح الا العمالة المساكين كل من جاء سقط عليهم ، طبعا ماتشوف هالحركات باي مطار بالعالم
مستحييييل اصلا برى تقدر تسقط على شخص باللاين
فوووووضه مافي احد ينظم هذي العالم!!
مع ان الشغله ماتحتاج شيء
بدل من ان تصف الناس لاين واحد تقول سرى تميس
حطوا المسارات الحلزونية مثل مطارات باقي دول العالم كله
كلها ١٠ اعمدة صغيره وطريقة حلزونية (زقزاق) وبينهم اشرطة تنظم السير ,,,
 لا احد يسقط عليك ولاتسقط على احد واذا خلص اي موظف تروح له ،
مو لازم كل موظف واقف قدامه طابور ونفسه بخشمه ( الي بعده )



فوضى كل موظف قدامه لااااين وش طوله



لنفترض انكم يامسئولين الخطوط او المطار ماتعرفونها ، ماراح اقول لكم روحوا دبي ,,, وأخذوا انتداب ولا اي دوله وشوف.
 مطاراتهم كيف طريقة تنظيم المسافرين

شوفوا هالصور وبتوضح لك الفكرة ، ترى الدعوة مو مستاهلة لكن بتساعد والله المسافرين على احترام النظام واحترام السرى،
 حتى موظفينكم بيسهل عليهم تأدية العمل على الوجه المطلوب



وأخذ بال سعادتك



بص بئه
لو كان عندكم مسافرين مثل هالعالم ,,, وش بتسوون















هذي اللاينات بتريح المسافرررين وبتررريح الموظفين على تأدية أعمالهم دون تجمع المسافرين حول الكاونترات

هاه شفتوا الصور ، والله ما اعتقد ان اصحاب القرار بالمطارات ماسافروا ولاراحوا اجتماعات خاصة في مجال العمل والتي يدعون فيها البحث عن راحة المسافرين
طبعا اكيد كان موفر لهم سكن ونقل سياره احسن من سيارته الشخصيه واوتيل فايف ستار وانتدابات ... الخ ، اكييييد انك شفت او لمحت كيف طريقة تنظيم المسافرين في المطارات الا اذا سيارتك توقف عند باب الطائرة هذا شي ثاني
بس ممكن المدير الي تحتك في الهرم شاف هالشيء، الدعوه مو مستاهله اختراعات
فقط انزلوا لأرض الميدان وشوفوا الفوضى
اطلع من مكتبك ٥ دقائق وشوف الامانة المستأمن عليها
مو بس شغالين تترززون قدام المسئولين بالصالات الملكية والمكاتب التنفيذية
الكلام هذا واللاينات اصلا موجوده بمطار الرياض عند ممر الجوازات للدخول للصالات لكن وش المانع ماتنحط مثلها عند اماكن بطاقات الصعود والعفش وعند الجوازات للقادمين !!!؟
هذا عينه فقط من الاصلاحات الي يقدر اي مسئول صاحب قرار من عملها دون اي اختراعات تذكر او ميزانيات وتسهل على المسافريين
حتى صورة البلد للقادم تتحسن مايقول وش ذا الشعب الهمجي كل واحد ساقط على الثاني !!
بالاضافه لاتنسون تزيدون عدد الموظفين مو معقول ٤ يخدمون الاف!!

فقط قليل من الذمه، مع شوية تفكير لتسهل حياة المواطن شايف الغبن صابر.


إن شاءالله راح يكون هذا الايميل أول سلسلة المواطن شايف الغبن صابر ، المواطن البسيط ، الذي يرغب بالعيش الكريم ، والعدالة الاجتماعية ، وحرية الرأي ، والاهتمام بالصحة و زيادة الامن والحرص على التعليم .... كلها راح تكون تعابير وفضفضة عما أواجه او يواجهه الانسان السعودي .

الشعب يررريد إصلاح المسئولين <<< واضح الي بالع العافيه ض١
مع كثرة الهتافات الشعبية بإصلاح الأنظمة، الا اننا ولله الحمد نعيش بنعمة ورخاء وامن نسأل الله ان يديمه ويصلح الراعي والرعية لما هو فيه خير للبلاد والعباد

بعض الإصلاحات التي يطالب فيه الشعوب سهله جداً ، لا إسقاط ولاتغييره ، ولامحاكمات وهالخرابيط
اصلاحات تنبع من المسئول المباشر في التعامل مع المواطنيين ، لاتحتاج اوامر ملكية ولا وزارية ، الصلاحيات ممنوحة ومعطاة للمدراء والباقي إقرارها وتحديث الانظمة السابقة التي عثى عليها الزمان وشرب.
الان مثلا تروح لأي ادارة وتواجه مسئول وتقوله عن مشكلتك والتي هي في الغالب مشكلة كثير من المواطنين اول مايرد عليك المسئول: لاااااا هذا النظام
طيب هذا النظام من وضعه !!!
مواطن سابق استلم المكان الذي انت فيه (المسئول) ووضع النظام بناء على ظروف الحياة ذلك الوقت (في الغالب الوقت كان في عهد الملك فيصل قبل اكثر من ٣٥ سنه) وطبعا هالمسئول الي اخترع الانظمه جلس على الكرسي 40 سنه
هذا النظام لاهو قرآن منزل ولا حديث شريف يتقيد به! ولا امر ملكي ملزم به، ولو نفترض بأنه امر ملكي وموافق عليه من المقام السامي بالعكس حسب علمي بأن مجلس الوزراء يرحب بتحديث الأنظمة فقط حدثوها (المسئولين) وارفعوا التحديث ليدرس وبعد ذلك يقر ويعتمد ( بس ناس ماتبي تشتغل :s )


الشعب يريد إصلاح المطار


فتكم بعافية


حـرره


الصحافـ تسوونامي ـ

28 شعبان ولم يرى النور الا 3 شوال 1432 <<< هرمنا والله ـ









--




سبحان الله وبحمده ,,, سبحان الله العظيم

 



 


( My Space )

follow me







0 التعليقات: