اعلن معنا

وداعة الله يازمان الوكارى

From: Abdulrzzaq abu-habshaushah <aroqi5@gmail.com>





--
بسم الله الرحمن الرحيم
السلام عليكم ورحمة الله وبركاته

مساء الخير ياجماعه

.

الوكري وما ادراك مالوكر

في الجزيره العربيه ( وكري .. وشرق ) وفي شمال افريقيا يطلق عليه ( قش .. وبرني )

الطير المتكاثر في الجزيره العربيه

لايكاد بيت صقار في وقت مضى يخلو منه إما مجني من العش او طرح الشبك بعد توفر

الحرار والبحريات لم يحرص اغلب الصقاقير على اقتناءه الا ان الصقاقير في

(نجد )التي تعتبر في نظري من النقاط الثابته للصقاره في

المملكه اللتي يدور حولها الصقاقيرلازال الوكري يجد مكانه بين

الحرار الشقر وشياهين البحر والجيرات

.


حسيت ان الزمن توقف يوم شفت الصوره مناحي الخمري ومحمد بن هلال وبعض

صقاقير من قبيلة الروسان واضح ان بين طيورهم وكارى

.


سعد بن مطلق بن سرحان الرويس . في مضحى والصقار سعود الديري يزين

الغدا والوكري حاضر في احد مقانيصه ولقد ذكر ابن سرحان الوكري في

قصيده رد على علي ( الفراوي )الديري الرويس أورد شي من قصيدة

الفراوي علي الديري الرويس يقول

ألا يــابو نايف جعــلكم دايم مسـرور ... ورجــلك تطــيب وقمة الرجم ترقاها

تذكرت وقـت فــات يـالـطـيب المذكـور ... عــلـيـقـه توزعها وألأخـرى تعــشاها

تجهز وتسرح قبل يظهر شعـاع النور ... تبي خبة خشف الــمـهـــا ما تـعـداهـا

شربتوا قراح الجم بالـدلو والـــناعــور ... ولاباقي حاجه تحســف عـلـى شراها

ولاكيف تنصح واحد فالـولع مسحــور ... علاجه قــرون الوســم لانــثرت ماها

ورد سعد بن سرحان الله يرحمه

أنا يالفراوي لو يــعـــــالــجــــــــني الدكـتـور...حرامٍِ علي إرجوم هبان ماأرقاها

أبا أسمح عن البندق وابا اسمح عن الناظور...عطينا الـــبنادق حقها يوم شلناها

وعطيناالصــــــــقاره يوم جا للصقــاره دور...قنصنا بخرشٍِ تنـــــثر الدم يمناها

وكاراًَترب الـشـعـب من مــاكـــرٍِمــشــهـور ...حمتها قبيلة روق ما أحدٍِ تهقواها

الشعب يقصد شعب العضيان في نجد

..

صوره في المقناص للعود سعد بن سرحان الرويس الله يرحمه وواضح قرناس وكري.

....
وقد ذكرالوكارى في بعض قصيده المرحوم خلف بن سرحان الرويس ومنها

يا مل قلب يــلــوعه بالـهــوى لايـــع .. لوع الوحش للطيار ليا ارتفع فوقه

خرشاً ترب الهضـاب اللي ورا النايع.. من خلقــته ما هوت رجلينه سبوقه

النايع جبل شمال نجد كانت تكثر فيه الوكارى


صورة المرحوم خلف بن سرحان الرويس في المقناص في اخر سنينه
وكأنه يبني قصيدته اللي منها يابدر
يا بدر لو تترك توال الصقاره ... منتب على تالي الصقارة بملزوم

خل الولع لمذبحــيــن الوباره ... والضب صار لهم عدو من القـوم
...

ومن باب الأستئناس بقصيد السراحين الله يرحمهم اللي تطرقوا فيه للمقناص
والطير يقول خلف بن سرحان الرويس

لاوالله الا براد اسهــيــل خــلانـي ... وركب علي اشهب القيض ومعاصيره

ياللـي تجي الـعــود قله لاتباطاني ... حــقــه عــلـــي اصله قدام اجي غيره

ما والله انساه كود الموت ينساني ... والا اشقر الــريـش ينسونه صقاقيره

رد العود سعد بن سرحان الرويس

يامرحبا بالجواب اللي تــنــصـــاني ... من عاد ابغلي وابا احشــم يابدا غيره

لاصار شايب وطيب واكبر اخوانــي ... يوم مــضـــالي تنومـسـني محاصيره

يقول دام الســويــبــــع مابعــد باني ... ماهوجس الـقـلب في نجـد ومحاديره

ماغير نتنا خطاة الأشــقــر الـعانــي ... نسرح مع الصــبـــح وندور مداويره


المرحوم خلف احد الطيور اللي شراه للتو من منطقه الخبت الشمالي وفي
قصايده لابد ان يتطرق للطير مهما كان موضوع القصيده وعلى سبيل
المثال قصيده غزليه زاد قوتها وجمالها حينما تطرق للطير
يا مل قلب يلـــوعـــه لايـــع الــفـرقا ... كــمـــا يلوع الحمام الورق شيهانه

إن حولن حــولــت وليا رقــن تـرقـا ... الشمس غابت وهي حدما وجيعانه

على عشير نحى مع روق عن برقـا ... عليه عـيـني بصافي الدمع غرقانه

أبو ثــمــان رهــاف ودقــة زرقـــــا ... موتي ولا صـدتـــه عــني وهجرانه

..

صورة العود ويحمل الصيد اللذي طاردة الى اخر ايامه ويرد على من ينصحه عنه
عــدوي اللــي عــن المقناص ينهاني ... ياكــثـــر مايلحقه من شرهتن مني

ما قط خم الــشــويــه مــن يد الـثــاني ... وادلال اهلهن على الشعله يفوحني

حتى ايش لو حط له معرض ودكاني ... هـــذي نــصـيـفه وجارتها يبيعني

..

اما انا فقد عشقتها من ذو نعومة اظافري وقضيت جزء من صقارتي معها هذي
اول وكريه ملكتها طرح الخبت الشمالي . ما اضن فيه احد اسعد مني في
تلك اللحظات
.


الله يرحمه علي المعيبر اخر مقناص لي معه وكان صاقر بشرق وكري خلصنا الحبارى وهد عليها شبه فصيل
وهقوتنا فيه كانت في محلها .. الله يجعل مثواك الجنه يابو مشاري



هالوكريه لما صادت الحبارى اول مره وهي ماقد شافتها
حسينا انا بنقرض الحباري هاك السنه نشاط وحيويه وفراغ ووسم مبكر

.

كنت أمضي اوقات طويله في البحث عنها . طوال اوقات السنه .. صوره التقطت
شرق مدينة فاس بالمغرب قريبه من مواكر للوكارى وشياهين جبل

...

وهذي صورة لماكر وكريه
واحد الأخوان يحاول تفقد العش والوكريه تمسحه وانا اصوره
...

ماكر وكارى وتظهر صورتي خلفه
.

نفس العش ويبان عدد بيض الوكاري للي بياخذ فكره
..

من اسعد الأوقات نهاية الرحله..نتوازع الوكارى
وعلى قول حمد الطيار
لحظة التوزيع فيها ويش اقول .. كل مافي القلب قالته الدموع ههههه

..

هذا نصيبي وكأني جبت للبلاد شي ماجابوه اللي واضحين خلفي في الصوره
...

لاعبين سعداء راجعين بالكاس والدرع .. يحتفلون في ساحة المطار

وشاركناهم الفرحه لكن فرحتي بالطيور ووصولنا وصولها

بالسلامه .. مخليتني اسعد منهم



الله ياوقت مضى يوم استوت الطيور في الموتر وانا منكف .

ما اغبط الشيخ محمد بن سلمان ال خليفه في البحرين

..

استفدت من زمالتي لكبار السن والمحترفين .. صار عندي معرفه في اشكالها

ولقد صقرت بماهو قريب للحر في شكله وهوفرخ ولاقرنس يقرب

شكله من الوكارى. وهي نادرة الوجود ولا اعلم بوجود لها في

الوقت الحاضر الاهذي
يسمى الرحيباوي.

هذا هو وكري لكن وجهه حر ..يقرب على 16*16
.

نحر الرحيباوي لاقرنس يقارب الوكري

.

وهذي وكريه راهيه ومقاسها يقرب من 15*15
انا اشوف صيدها للحبارى فيه صعوبه ولحوقها للكروان فيه صعوبه

.

تجي الوان الوكارى متعدده منها القمرا ء
.

ومن الوانها البيضاء
.

ومن الوانها الحمراء
.
الوكري يحتاج لأرض صيدها وفير فهو اذا غارم الصيد اصبح غلاس
لايمكن مجاراته اذاتل صادق واذا ضايف دقيق لايتعدى خمسة امتار
.

هذي الوكريه طلع ميه ميه اعتمدنا في ذالمقناص على الله
ثم عليها وكانت تطلع في كل يوم مرتين واكثر

..

الصيده المناسبه في الوقت الحالي لها الأرنب ويكون هددها مع السلق
غايه في المتعه
..

صحيح إذا ما اصبح الصبح عليها وهي عافره
من الجوع والبرد مايعجبك طلعها وهددها
..

عند وضعي لهالصورة كأن الوكارى
قاطعتني وإهمست همس النسيم **ارجوك ابعد ابعد مدام في الجوغييييييير
وأرد عليها

وداعة الله يازمان الوكااااااااااااااااااارى

*

والسلام
 






سبحان الله وبحمده سبحان الله العظيم ـ اللهم احسن خاتمتنا



0 التعليقات: