اعلن معنا

ياشيخ عندي سؤال ....؟؟

From: لَيْلٍےّ <miss.dla3@gmail.com>





فيني مر وحموضه  ويمكن يصير فشل في اعضائي كلها من اللي يتصلون على برامج الإفتاء ياوك ياتسبدي منهم عليهم اسئله قمة الغباء مير الغباء شوي احيانا احسهم ناس توها تسلم ولا حريم اول مره تجيهم الدوره (وللمتعنقليزين بايرود ) المشكله اللي يسألن اسئله عنها تلاقيهم حريم وشكبرهن من اصواتهم ولا مو باقي شوي وتوقف عنها خلاص وصلت سن اليأس ..اذكر  مرتن وحده داقه تسأل تقول انه دورتها مدري كم يوم وان هالشهر زادت عليها كم يوم وتسذا تقول اني اصلي ولا لاء ولا اللي يسألن متى تطهر وتسذا ابي اعرف انتم مادرستوا  ..مافيه نت مافيه ماما تسألينها ولا لازم على الهواء وسؤال ماصخ مثلتس موب سالفت عيب وحياء وانه لا تتكلمين عنها بس ابي اعرف هل مثلا يعني انا درست لحالي في مدرسه بروحي ومنهج لي خاص غير عن البشريه وتسذا ولا وشو بضبط ذاك اليوم شايشه انا اقول لامي انه دارسين هالاشياء بخامس وسادس والمتوسط كل سنه يعيدونها في مادة الفقه وبالثانوي درسناه في منهج الفقه كان عن الزواج والطلاق والنفاس وكان سنه كامله كل مايتعلق بالعاده الشهريه درسناه وراه ينسون شي يصير كل شهر
 ....ولا عاد نجي لأسئلة الغباء المستفحل  انا عندي أخو من الرضاع  يصلح بناتي يفتشون له ويسلمون عليه !!!! استفهامات لين بيتهم  وش ذا السؤال أخوتس يعني وش يصير لبناتكولد الجيران مثلا ولا وشو بالضبط ....ولا عاد الاسئله السقيمه بنتي متزوجه يصير زوجها يسلم على أمي تقصد جدة البنت يعني وش رايتس بنتس ذي موب حفيدتها وهذا يصير زوج بنتها  ....ولا عاد نجي للأسئله  الأزليه ياشيخ التشقير يجوز  ولا عباة الكتف حلال ..ياشيخ نلبس بناطلين ونلبس فوقها بلايز طويله يصير  حلال ....ياشيخ حلال لبس العدسات الملونه  ولا يصير نصبغ الشعر أشقر ولا تشبه بالغرب مدري وراه يحسسوني ان الغرب ربهم غير  وش دخل الاشقر للغرب  عمتي شعرها  اصفر اشقراني يعني مايصير تخلي لونه لازم تغيره عشان مايصير تشبه بالغرب ... 
ولا عاد لي جاء رمضان الله من حومت التسبد  ياشيخ جتني الدوره في العصر اكمل صيام ولا افطر ولا اقضيه مع صيام لازم ذا السؤال الماصخ ...ولا بعضهن تقعد تفصل بالساعه والدقيقه متى جتها لعل وعسى ماتقضيها  عقب الرمضان ..ولا اذا جاء شوال عاد تغيرت صيغه السؤال ياشيخ انا وقتها طويل يصير اصوم الست قبل لا اصوم قضاي ولا مايصلح ... ولا عاد سؤال يصير اكل مانع للدوره عشان العباده والصيام واني اتحسف بالشهر الفضيل ياشيخه روقينا قولي مالي خلق اقضي الايام تبي تفهمينا انتس القديسه 24 ساعه في مصلاك الا هامتس قضاء الايام ولا العباده ترى موب كلها صيام فيه  كل شي ماوقفت عليها وريحي ذا الراس قال متحسفتن بالايام الفضيله ما أصومهن الله من الهياط بس
لي حطت أمي على ذا البرامج اتطاق انا وياها اقولها غيريه قسما ماعندهم غير الدوره والتشقير والعباة  والصبغه كأن مافيه فتاوي ابد ولا فيه مشاكل بالحياة غير هالاشياء وتقعد امي تقول يمكن يجي شي نستفيد منه اقول لامي خلاص انتي كل هالاشياء ذي تعرفينها وش تبين تسمعينها له حريمنا ماعندهن سالفه غير هالخربطه ....مرتن امي حاطه عليها  وانا وياها لجه ابيها تغير القناة قلت شوفي إن جاء سؤال التشقير الحين بنغير وتقول ابد بيجي سؤال غيره ومير تسأل عن التشقير وتضحك أمي قلت لها احس أحيانا إن  معدين البرنامج هم اللي يخلون ذا الاسئله كل أبو دايم تنسأل ولا مو معقوله للحين ماوصلت المعلومه ويحركون البرنامج وكذا ......

عاد برامج الفتاوي ذي نبلعها يله نقول يمكن جهل وتسذا لكن برامج تفسير الأحلام ذي عالم  ثاني قسما شي يفقع المراره المشكله مايدق الا الحريم يا اختي لا تكثرين عشاء وأقري الورد قبل لا تنامين وماتحلمين  المشكله لي دقت وحده وقعدت تقص قصه حياتها موب حلم شي سالفتن وش طولها دخلت وطلعت وقابلت ذيك الحرمه اللي ما اعرفها وفي الحلم كنت اعرفها همين لقيت بزر همين صار رجال كبير همين تغطيت همين طحت همين شفت دم تحتي همين قمت ولاني في بيت موب بيتي وفي الحلم كان بيتي ولقيت زوجي واللي هو بالحلم واحد ثاني غير زوجي ... اذكر مزعتني ضحك من توصيفها للحلم ..شي مو طبيعي تحسها جامعتن كل حلوم الناس فيه حلمها هي ..ولا اللي كلهن يحلمن ويصيرن مسحورات ولا وحده كان يقولها تفسير حلمك انه شغالتكم ساحرتكم مدري قاعده تسوي سحر الزبده انها تفل حتسي الشيخ (تفل يعني تنقض كلامه وتقوله لاء وش زينها ذا الشغاله توجنن حاجه ماحصلتش ) وهو يقول انتي تسأليني وانا أجاوبك عاد الين هو حامت تسبده قال انتي وش فيك مو تسألين هذا تفسير حلمك وبس لا تقعدين تراددين بالكلام ...عاد انا وحدتن ماهيب راعية حلووم ابد وان حلمت فأكيد اني نايمه غلط ..المهم من صرت اشوفهن مع امي صايرتن حلوووم بشكل مو طبيعي ولا بعد احلم بحلوم الناس ذاك اليوم امي واختي يضحكون علي يقولون موب من جدك اقولهم قسم اني حلومهم امس كلها حلمتها كل اللي بالبرنامج ورى بعض صايرن راسي تسنه قناتنا الأولى مسوي اعاده برامج ...هذا وانا اقابل كمبيوتري  مدري لو اني منصته للبرنامج وش يبي يصير 


0 التعليقات: